អន្តរជាតិ

លោក ហ្សេលេនស្គី ព្រមានរុស្ស៊ីចំពោះការកាត់ទោសទាហានអ៊ុយក្រែន

លោក លី សេងហន
| ២២ សីហា ២០២២
ម៉ោង ១៦:០៣

ប្រធានាធិបតីអ៊ុយក្រែន លោក Volodymyr Zelenskiy ថ្លែងពាក់ព័ន្ធនឹងការវាយប្រហាររបស់រុស្ស៊ីលើអ៊ុយក្រែន។ (ហ្វេសប៊ុក៖ Володимир Зеленський)

ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskiy) បានប្រកាសនៅថ្ងៃទី២២ ខែសីហានេះថា រុស្ស៊ីអាចនឹងកាត់ទោសទាហានអ៊ុយក្រែន ខណៈទីក្រុងកៀវ (Kyiv) នឹងប្រារព្ធបុណ្យឯករាជ្យលើកទី៣១របស់ខ្លួន នៅសប្ដាហ៍ក្រោយ។ នេះបើតាមការចេញផ្សាយរបស់ទីភ្នាក់ងារសារព័ត៌មាន CNA នៅថ្ងៃទី២២ ខែសីហា ឆ្នាំ២០២២នេះ។

ដោយដកស្រង់សម្ដីលោក Zelenskyy ប្រព័ន្ធផ្សព្វផ្សាយបានរាយការណ៍ថា ប្រទេសរុស្ស៊ីកំពុងរៀបចំកាត់ទោសទាហានអ៊ុយក្រែនដែលត្រូវបានចាប់ខ្លួនក្នុងអំឡុងពេលឡោមព័ទ្ធទីក្រុង ម៉ារីយូប៉ូល (Mariupol) ជាសាធារណៈ ស្របពេលជាមួយនឹងបុណ្យឯករាជ្យរបស់អ៊ុយក្រែន នឹងប្រព្រឹត្តទៅនៅថ្ងៃពុធនេះ។

បុណ្យឯករាជ្យជាតិរបស់អ៊ុយក្រែន នៅថ្ងៃទី២៤ ខែសីហា ឆ្នាំ២០២២នេះ ក៏ជាថ្ងៃគម្រប់ខួប៦ខែ ចាប់តាំងពីរុស្ស៊ីបានឈ្លានពានអតីតសាធារណរដ្ឋសូវៀត នៅក្នុងសង្រ្គាមដ៏មហន្តរាយដែលបានសម្លាប់មនុស្សរាប់ពាន់នាក់។

លោក Zelenskyy បានព្រមាននៅក្នុងសុន្ទរកថាមួយថា៖ «ប្រសិនបើតុលាការគួរឱ្យស្អប់ខ្ពើមនេះកើតឡើង ប្រសិនបើប្រជាជនរបស់យើងត្រូវបាននាំទៅកាត់ទោសដោយបំពានលើកិច្ចព្រមព្រៀងទាំងអស់ នោះនឹងមានការរំលោភបំពានច្បាប់អន្តរជាតិទាំងអស់»។

លោកបន្តថា៖ «នេះនឹងធ្វើឱ្យការចរចាមិនអាចទៅរួចឡើយ»។

ទីក្រុងកៀវ (Kyiv) បានប្រកាសហាមប្រាមការជួបជុំជាសាធារណៈរួចហើយ។ ទីក្រុងខាកៀវ (Kharkiv) ក៏បានប្រកាសបម្រាមគោចរនៅថ្ងៃឈប់សម្រាកផងដែរ។

លោកបានព្រមានកាលពីល្ងាចថ្ងៃសៅរ៍ថា៖ «រុស្ស៊ីអាចព្យាយាមធ្វើអ្វីមួយដែលគួរឱ្យស្អប់ខ្ពើម ជាពិសេសអំពើឃោរឃៅ»។

លោកបន្ថែមថា៖ «គោលបំណងសំខាន់មួយរបស់សត្រូវ គឺធ្វើឱ្យយើងអាម៉ាស់មុខ និងដើម្បីសាបព្រោះភាពអស់សង្ឃឹម ការភ័យខ្លាច និងជម្លោះ»។

ទោះយ៉ាងណាក៏ដោយ លោកបានបន្ថែមថា៖ «យើងត្រូវតែរឹងមាំគ្រប់គ្រាន់ ដើម្បីទប់ទល់នឹងការញុះញង់ទាំងអស់»។

ទីប្រឹក្សាប្រធានាធិបតីអ៊ុយក្រែន លោក មីខាយឡូ ប៉ូដូលីយ៉ាក់ (Mykhaylo Podolyak) បាននិយាយថា រុស្ស៊ីអាចទម្លាក់គ្រាប់បែកកាន់តែច្រើនឡើង។

លោក មីខាយឡូ ប៉ូដូលីយ៉ាក់ (Mykhaylo Podolyak) បានបន្ថែមថា៖ «ពួកគេស្អប់យើង ហើយនិងទម្លាក់គ្រាប់បែក និងបាញ់មីស៊ីលទៅលើទីក្រុងរបស់យើងកាន់តែច្រើនឡើង រួមទាំងទីក្រុងកៀវ [Kyiv]»។

កាលពីថ្ងៃអាទិត្យ អាជ្ញាធរទីក្រុងកៀវ (Kyiv) បានហាមឃាត់មិនឱ្យមានការជួបជុំជាសាធារណៈចាប់ពីថ្ងៃទី២២ ដល់ថ្ងៃទី២៥ ខែសីហា។

នៅទីក្រុងខាកៀវ (Kharkiv) ភាគឦសាន អភិបាលតំបន់បានប្រកាសបម្រាមគោចរ កាលពីល្ងាចថ្ងៃទី២៣ ខែសីហា ដល់ព្រឹកថ្ងៃទី២៥ ខែសីហា។

លោក អូឡេក ស៊ីនេហ្គូបូវ (Oleg Synegubov) បានសរសេរនៅលើបណ្តាញតេឡេក្រាមថា៖ «យើងនឹងមិនអនុញ្ញាតឱ្យសត្រូវបង្កហេតុណាមួយនោះទេ។ ចូរមានការប្រុងប្រយ័ត្នតាមដែលអាចធ្វើទៅបាន ក្នុងអំឡុងពេលបុណ្យឯករាជ្យរបស់យើង»៕

រុស្ស៊ី, អ៊ុយក្រែន

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។