របបយោធាមីយ៉ាន់ម៉ាបានឃុំខ្លួនអតីតឯកអគ្គរាជទូតអង់គ្លេសប្រចាំប្រទេសរបស់ខ្លួន ក្រោមបទចោទល្មើសច្បាប់អន្តោប្រវេសន៍។ នេះបើយោងតាមមនុស្សបីនាក់ដែលដឹងពីស្ថានការណ៍នោះបាននិយាយនៅថ្ងៃព្រហស្បតិ៍នេះ និងត្រូវបានទីភ្នាក់ងារសារព័ត៌មាន CNA យកមកចុះផ្សាយ។
ប្រភពដែលថ្លែងក្នុងលក្ខខណ្ឌសុំមិនបញ្ចេញឈ្មោះ បាននិយាយថា អតីតឯកអគ្គរាជទូតអង់គ្លេសប្រចាំមីយ៉ាន់ម៉ា លោកស្រី វីគី បូមែន (Vicky Bowman) ដែលបច្ចុប្បន្នគ្រប់គ្រងមជ្ឈមណ្ឌលមីយ៉ាន់ម៉ាសម្រាប់អាជីវកម្មមានការទទួលខុសត្រូវ (MCRB) និងស្វាមីរបស់លោកស្រី ឈ្មោះ ថេន លីន (Htein Lin) ជាសិល្បករភូមា និងជាអតីតអ្នកទោសនយោបាយ ត្រូវបានឃុំខ្លួនកាលពីថ្ងៃពុធ។
ប្រភពដដែលបន្តថា លោកស្រី Bowman និងស្វាមីរបស់លោកស្រី ត្រូវបានចោទប្រកាន់ពីបទល្មើសអន្តោប្រវេសន៍។
ការចាប់ខ្លួននេះធ្វើឡើងបន្ទាប់ពីអង់គ្លេសបានប្រកាសថា ខ្លួនកំពុងដាក់ទណ្ឌកម្មថ្មីលើអាជីវកម្មដែលទាក់ទងនឹងរបបយោធាមីយ៉ាន់ម៉ា ហើយប្រទេសអង់គ្លេសបានចូលរួមក្នុងសំណុំរឿងប្រឆាំងនឹងមីយ៉ាន់ម៉ានៅតុលាការយុត្តិធម៌អន្តរជាតិ។
អ្នកនាំពាក្យស្ថានទូតអង់គ្លេសប្រចាំទីក្រុងយ៉ាំងហ្គោន បាននិយាយថា៖ «យើងមានការព្រួយបារម្ភចំពោះការចាប់ខ្លួនលោកស្រី Bowman។ យើងកំពុងទាក់ទងជាមួយអាជ្ញាធរមូលដ្ឋាន និងកំពុងផ្តល់ជំនួយផ្នែកកុងស៊ុល»។
លោកស្រី Bowman អាយុ៥៦ឆ្នាំ បានបម្រើការជាឯកអគ្គរាជទូតអង់គ្លេសប្រចាំនៅមីយ៉ាន់ម៉ា ចាប់ពីឆ្នាំ២០០២ ដល់ឆ្នាំ២០០៦។
លោកស្រី Bowman គឺជាជនបរទេសចុងក្រោយគេដែលត្រូវបានឃុំខ្លួននៅក្នុងប្រទេសមីយ៉ាន់ម៉ា។ លោក សៀន ធឺណែល (Sean Turnell) សេដ្ឋវិទូជនជាតិអូស្ត្រាលី និងជាទីប្រឹក្សាយូរឆ្នាំរបស់លោកស្រី អ៊ុងសាន ស៊ូជី និងផលិតករភាពយន្តឯករាជ្យជប៉ុន លោក តូរូ គូបូតា (Toru Kubota) ក៏កំពុងជាប់ឃុំដែរ។ រដ្ឋាភិបាលរបស់អង់គ្លេសបានអំពាវនាវឱ្យរបបយោធាមីយ៉ាន់ម៉ាដោះលែងពួកគេ៕