លោកឧកញ៉ា លីម ប៊ុណ្ណា ហៅ ខ្នា ដែលកាលពីពេលកន្លងទៅ ធ្លាប់ត្រូវបានប្រមុខរដ្ឋាភិបាលបញ្ជាឱ្យចាត់វិធានការទាក់ទងនឹងសកម្មភាពដឹកជញ្ជូនឈើខុសច្បាប់ទៅលក់នៅប្រទេសវៀតណាម បច្ចុប្បន្នត្រូវបានតែងតាំងជាជំនួយការលោកនាយករដ្ឋមន្រ្តី ហ៊ុន សែន។
លោកនាយករដ្ឋមន្រ្តី ហ៊ុន សែន កាលពីឆ្នាំ២០១៦កន្លងទៅ ធ្លាប់បានបញ្ជាឱ្យបង្រ្កាបការរត់ពន្ធឈើខុសច្បាប់ទៅវៀតណាម ខណៈការស៊ើបអង្កេតនៅពេលនោះបានរកឃើញថា លោក លីម ប៊ុណ្ណា និងឧកញ៉ាមួយរូបទៀត គឺជាគោលដៅចម្បងនៃការបង្ក្រាបពេលនោះ។ នេះបើតាមប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន ដែលបានថ្លែងប្រាប់កាសែតភ្នំពេញប៉ុស្តិ៍។
ប្រធានអង្គភាពអ្នកនាំពាក្យរដ្ឋាភិបាលរូបនេះក៏ធ្លាប់បានថ្លែងប្រាប់កាសែត ខេមបូឌា ដេលី ឱ្យដឹងដែរថា៖ «បុគ្គលទាំងពីរនាក់នេះគិតថា គេមិនអាចប៉ះពាល់បាន»។
លោកបន្តឱ្យដឹងនៅពេលនោះថា ក្រសួងមហាផ្ទៃបានប្រមូលភស្តុតាងដែលពាក់ព័ន្ធនឹងអ្នកជំនួញទាំងពីរនាក់នេះរួចហើយ។
យោងតាមសេចក្ដីសម្រេចមួយរបស់គណៈអចិន្ត្រៃយ៍នៃគណៈកម្មាធិការកណ្ដាលគណបក្សប្រជាជនកម្ពុជា ដែលចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី១៨ ខែសីហា បានសម្រេចតែងតាំងលោក លីម ប៊ុណ្ណា ជាជំនួយការលោក ហ៊ុន សែន ក្នុងឋានៈជាប្រធានគណបក្សប្រជាជនកម្ពុជា។
ទាក់ទិនករណីនេះ សកម្មជនការពារបរិស្ថាន លោក ហេង ស្រស់ បានថ្លែងឱ្យដឹងកាលពីថ្ងៃព្រហស្បតិ៍ម្សិលមិញថា ខ្លួនបានស៊ើបអង្កេតការជួញដូរឈើរបស់លោក លីម ប៊ុណ្ណា អស់រយៈពេលជាយូរណាស់មកហើយ។ លោកបានអះអាងថា សកម្មភាពដឹកជញ្ជូនឈើខុសច្បាប់របស់ឧកញ៉ារូបនេះ ត្រូវបានធ្វើឡើងក្នុងទឹកដីខេត្តកំពង់ធំ ក្រចេះ ព្រះវិហារ ពោធិ៍សាត់ និងស្ទឹងត្រែង ក៏ដូចជាដែនជម្រកសត្វព្រៃកែវសីមា ខេត្តមណ្ឌលគិរីផងដែរ។
លោកបន្ថែមថា៖ «យើងមើលឃើញថា សកម្មភាពនេះ [ការតែងតាំងជាជំនួយការលោកនាយករដ្ឋមន្រ្តី] គឺជាការលើកទឹកចិត្តដល់អ្នកដែលកាប់បំផ្លាញព្រៃឈើ ហើយដោយសារតែការអនុវត្តច្បាប់នៅកម្ពុជាមានភាពធូររលុង ឧក្រិដ្ឋជន [ក្នុងបទល្មើសព្រៃឈើ] ទាំងឡាយមិនត្រូវបានយកមកកាត់ទោសឡើយ»។
ទោះជាយ៉ាងណា អ្នកនាំពាក្យគណបក្សប្រជាជនកម្ពុជា លោក សុខ ឥសាន បានចាត់ទុកការចោទប្រកាន់នេះថា ជាការលើកឡើងដោយគ្មានមូលដ្ឋានច្បាស់លាស់។
លោកថា៖ «តាមរយៈការថ្លែងអះអាងទាំងនេះ តើពួកគេមានភស្តុតាងអ្វីយកមកបញ្ជាក់ដែរឬទេ? រាល់ការតែងតាំងទាំងឡាយ គឺជាសិទ្ធិរបស់រដ្ឋាភិបាល។ តើមានច្បាប់និងសិទ្ធិអ្វីខ្លះដែលមិនអនុញ្ញាតឱ្យយើងតែងតាំង? ការតែងតាំងគឺត្រូវបានធ្វើឡើងដោយសារតែពួកគេមានលក្ខណៈសម្បត្តិគ្រប់គ្រាន់ ខណៈលោកនាយករដ្ឋមន្ត្រីមិនមែនចេះតែតែងតាំងនោះទេ»។
លោកបន្តថា៖ «ឧកញ៉ានិងឥស្សរជនទាំងឡាយដែលទទួលបានការតែងតាំងតំណែងនេះ មិនបានធ្វើសកម្មភាពដូចអ្វីដែលគេបានលើកឡើងឡើយ។ ពេលខ្លះ ស្ថានភាពគឺសទេ ប៉ុន្តែពួកគេ [អ្នករិះគន់] បែជាថាខ្មៅទៅវិញ ដែលករណីនេះគឺជារឿងដែលមិនអាចទទួលយកបានឡើយ។ ប្រសិនបើគណបក្សប្រជាជន និងរដ្ឋាភិបាលបានធ្វើសកម្មភាពអ្វីខុស នោះប្រជាពលរដ្ឋនឹងមិនបោះឆ្នោតដើម្បីឱ្យយើងបន្តកាន់កាប់តួនាទីតទៅទៀតឡើយ។ តើប្អូនយល់ទេ?»
នៅក្នុងសេចក្តីសម្រេចមួយទៀតរបស់គណបក្សប្រជាជនកម្ពុជា ចុះថ្ងៃទី១៨ ខែសីហា ដដែលនេះ ក្នុងនោះគេក៏សង្កេតឃើញលោក មាស ប៊ុនឡី ដែលជាមន្រ្តីយោធាជាន់ខ្ពស់មួយរូប ក៏ត្រូវបានតែងតាំងជាជំនួយការលោក ហ៊ុន សែន ផងដែរ។
មន្រ្តីយោធាជាន់ខ្ពស់ខាងលើនេះ កាលពីពេលកន្លងទៅ ក៏ធ្លាប់ជាប់ពាក់ព័ន្ធនឹងជម្លោះដីធ្លីជាមួយក្រុមហ៊ុនចិន Today Bokor Development ប៉ុន្តែករណីនេះត្រូវបានដោះស្រាយក្រោមការសម្របសម្រួលពីលោក ដួង តារា ដែលជាជំនួយការរបស់លោកនាយករដ្ឋមន្រ្តី។ នេះបើយោងតាមសារព័ត៌មានក្នុងស្រុក CEN។
ទោះជាយ៉ាងណា យោងតាមសារព័ត៌មានត្រយង បញ្ហាជម្លោះនេះក៏បានឈានទៅដល់ការចាប់ខ្លួនជនជាតិចិនមួយរូបឈ្មោះ Wang Zhigan អាយុ៤២ឆ្នាំ ពីបទក្លែងបន្លំផងដែរ។
បុគ្គលឈ្មោះ Wang Zhigan នេះក៏ធ្លាប់មានតួនាទីជាជំនួយការរបស់លោក ដួង តារា ដើម្បីជួយក្នុងការទំនាក់ទំនង និងជ្រើសរើសអ្នកវិនិយោគចិនផងដែរ។ នេះបើតាមឯកសារមួយរបស់ទីស្តីការគណៈរដ្ឋមន្ត្រី ចេញកាលពីខែកក្កដា ឆ្នាំ២០២១៕
អត្ថបទដើមភាសាអង់គ្លេស៖ Timber Tycoon, Once Target of Crackdown, Made Hun Sen Adviser