ប្រធានរាជបណ្ឌិត្យសភាកម្ពុជា បានអះអាងថា ការនេសាទខុសច្បាប់នៅរដូវហាមឃាត់កំពុងកើតឡើងជាទ្រទ្រាយធំនៅតំបន់បឹងទន្លេសាប ហើយលោកបានព្រមានវិធានការច្បាប់ចំពោះអ្នកនេសាទទាំងនោះ ប្រសិនបើពួកគេនៅតែនេសាទដោយខុសច្បាប់បន្តទៀត។
ការស្នើរបស់ប្រធានរាជបណ្ឌិត្យសភាកម្ពុជា លោក សុខ ទូច នេះ បន្ទាប់ក្រុមស្រាវជ្រាវនៃរាជបណ្ឌិត្យសភាកម្ពុជា បានវរកឃើញការប្រព្រឹត្តបទល្មើសនេសាទនៅក្នុងខេត្តចំនួន២ គឺខេត្តពោធិ៍សាត់ និងខេត្តកំពង់ធំ ដែលជាការនេសាទទ្រង់ទ្រាយធំក្នុងរដូវបិទនេសាទ។
បើតាមសំណេរនៅលើហ្វេសប៊ុករបស់ លោក សុខ ទូច នៅថ្ងៃសៅរ៍នេះ ក៏បានបង្ហាញពីឈ្មោះបុគ្គលប្រព្រឹត្តចំនួន ៥៥នាក់ ដែលបានលួចរាយស្បៃមុងចាប់ត្រីជាទ្រង់ទ្រាយធំ ដោយក្នុងនោះ៣៩នាក់ ប្រព្រឹត្តសកម្មភាពក្នុងភូមិសាស្ត្រឃុំកំពង់លួង និងឃុំអន្សាចំបក់ ក្នុងស្រុកក្រគរ ខេត្តពោធិ៍សាត់ មានរបាំងសាច់អួនចំនួន ៤៧ខ្សែ។ ដោយឡែក ១៦នាក់ទៀត ប្រព្រឹត្តក្នុងភូមិសាស្ត្រ ឃុំផាត់សណ្តាយ ស្រុកកំពង់ស្វាយ ខេត្តកំពង់ធំ។
លោក សុខ ទូច លើកឡើងថា ប្រសិនបើពួកគេមិនបញ្ឈប់សកម្មភាពល្មើសច្បាប់ទាំងនេះទេ ខាងលោកនឹងស្នើសុំដីកាពីតុលាការដើម្បីចាប់ខ្លួនតែម្តង។
ហ្វេសប៊ុកលោក សុខ ទូច សរសេរថា៖« ប្រសិនបើក្នុងករណី ខាងក្រុមក្រុមស្រាវជ្រាវនៃរាជបណ្ឌិត្យសភាកម្ពុជាចុះទៅឃើញប្រព្រឹត្តជាលើកទី២ យើងខ្ញុំនឹងស្នើសុំដីកាចាប់បញ្ជូនខ្លួនទៅចាត់ការតាមនីតិវិធីច្បាប់»។
លោក សុខ ទូច មានប្រសាសន៍ប្រាប់វីអូឌីបន្ថែមថា អ្នកទាំងនោះ បានយកស្បៃមុងទៅរាយនៅកន្លែងត្រីពងកូន ដើម្បីយកលក់នៅទីផ្សារក្នុងស្រុក និងនាំចេញទៅក្រៅ។ លោកបញ្ជាក់ថា ការនេសាទខុសច្បាប់នៅកន្លែងត្រីពងកូនបានកើតឡើងជាទ្រទ្រាយធំតែម្តង។
លោកមានប្រសាសន៍ថា៖«វាចូលលក្ខណៈគីឡូដី។ អ៊ីចឹងជាទ្រទ្រាយធំហើយ ដែលយើងឱ្យឈ្មោះសុទ្ធតែគីឡូដីហើយ អត់មានតូចទេ។ គាត់[ជនល្មើស]រាយព័ទ្ធព្រៃលិចទឹកហើយចប់ហើយអត់មានស្អីទៀតទេ។ ត្រីចូលរកចំណីក៏អត់បាន ចូលពងក៏អត់បានបញ្ចប់តែម្ដងអាហ្នឹង។ ឱកាសហ្នឹង[ពួកគេ]រកលុយបានច្រើនពងត្រីមួយគីឡូប៉ុន្មាន យកមកលក់។ អ៊ីចឹង បានប្រជាជនយើងកុំហូបពងត្រីទៅ អាហ្នឹងហើយវាថ្លៃ ហើយថ្លៃហ្នឹងហើយដែលឱកាសមនុស្ស[ទៅរក]»។
នៅពេលសួរថា ចុះហេតុអ្វីបានជាមន្ត្រីជលផល ឬអាជ្ញាធរមូលដ្ឋានមិនទប់ស្កាត់ ចំពោះបទល្មើសនេសាទទាំងនេះ? លោកសុំមិនធ្វើអត្ថាធិប្បាយ ដោយឱ្យអ្នកសារព័ត៌មានសាកសួរជាមួយមន្ត្រីជលផល និងអាជ្ញាធរទាំងនោះផ្ទាល់វិញ។
លោកថា៖«សូមឱ្យទៅសម្ភាសន៍ ព្រោះមានដាក់ភូមិឃុំអស់ហើយ ចៅហ្វាយស្រុកនៅណាភ្នែកគាត់។ អាអស់ហ្នឹងមិនមែនលបទៅដាក់ណា ហើយឃើញទេ សាច់អួនថ្មីចែស ដាក់ប្រហែល ២សប្ដាហ៍។ អ៊ីចឹងទៅសួរចៅហ្វាយស្រុកហ្នឹងគាត់ធ្វើអី»។
អភិបាលរងខេត្តពោធិ៍សាត់ លោក គិត សុផា សុំមិនធ្វើអត្ថាធិប្បាយ ដោយឱ្យអ្នកសារព័ត៌មានទាក់ទងទៅអ្នកទទួលបន្ទុកការងារនេះ។
លោកថា៖«អត់ដឹងទេ ធ្វើការអត់ព័ត៌មាន អត់មានអង្គុយចាំតែចុចយកព័ត៌មានអ៊ីចឹងកើតទេ។ ចុចទៅរកខ្លួនឯង ហើយចុះទៅសួរខ្លួនឯង»។
ដោយឡែក អភិបាលរងខេត្តពោធិ៍សាត់ លោក ចេង ឡៃ ដែលទទួលបន្ទុកការងារនេសាទនេះក៏មិនអាចទាក់ទងបានដែរនៅថ្ងៃសៅរ៍នេះ។
ដោយឡែក អភិបាលខេត្តកំពង់ធំ លោក ងួន រតនៈ មានប្រសាសន៍ថា លោកបានឃើញរបាយការណ៍ដែលលោក សុខ ទូច បានផ្សព្វផ្សាយលើបណ្តាញសង្គម ហើយករណីនេះ លោកបានចាត់ទៅមន្ត្រីឱ្យចុះពិនិត្យ និងតាមដានរួចហើយដែរ។
លោកថា៖«ខ្ញុំបានឱ្យព័ត៌មាននេះ ទៅគណៈបញ្ជាការស្រាលហើយ ព្រោះយើងមានបញ្ជាការស្រាលនៅកំពង់ធំនេះ។ ២ ខ្ញុំបានបញ្ជូនឈ្មោះនោះទៅហើយ ឱ្យគាត់ស្រាវជ្រាវ ហើយមានវិធានការអ៊ីចឹង។ ទ្រង់ទ្រាយធំ ខ្ញុំមិនដឹងថា ម៉េច ប៉ុន្តែយើងមានកម្លាំងបញ្ជាការនៅនោះ ឃើញរបាយការណ៍ល្ងាចឡើងមានសកម្មភាពបង្ក្រាប អប់រំអីហូហែរ។ អ៊ីចឹងចាំមើល ក្រោយពីខ្ញុំផ្ញើឈ្មោះទាំង ១៦ នាក់ទៅ ចាំមើលគាត់រាយការណ៍យ៉ាងម៉េច»។
កាលពីថ្ងៃទី៣០ ខែឧសភា ឆ្នាំ២០២២ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានចេញសេចក្តីជូនដំណឹង ចំពោះរដូវបិទនេសាទទឹកសាបនៅឆ្នាំនេះ ចាប់ផ្តើមពីថ្ងៃទី១ ខែមិថុនា ដល់ថ្ងៃទី៣០ ខែកញ្ញា ឆ្នាំ២០២២ សម្រាប់ខេត្តជាប់បឹងទន្លេសាប និងទន្លេមេគ ង្គលើ រហូតដល់មួយផ្នែកនៃរាជធានីភ្នំពេញ និងខេត្តកណ្តាល ដែលស្ថិតនៅខាងជើងខ្សែស្របទន្លេចតុមុខ។ ចំណែក រដូវបិទនេសាទត្រូវធ្វើឡើងចាប់ពីថ្ងៃទី១ ខែកក្កដា ដល់ថ្ងៃទី៣១ ខែតុលា សម្រាប់ខេត្តព្រៃវែង ស្វាយរៀង តាកែវ ខេត្តកំពង់ស្ពឺ និងមួយផ្នែកនៃរាជធានីភ្នំពេញ និងខេត្តកណ្ដាលដែលស្ថិតនៅខាងត្បូងខ្សែស្របទន្លេចតុមុខ។
រដ្ឋបាលជលផលបញ្ជាក់ថា នៅក្នុងរយៈពេលបិទនេសាទនេះ អ្នកនេសាទទាំងអស់ត្រូវប្រើតែឧបករណ៍នេសាទលក្ខណៈគ្រួសារដែលមានចែងក្នុងប្រកាសចុះថ្ងៃទី២២ ខែតុលា ឆ្នាំ២០១២ ដូចជា ឧបករណ៍ លប សំណាញ់ ម៉ង សន្ទូចផ្លែមួយ តុម អង្រុត និងឧបករណ៍មួយចំនួនទៀតដែលច្បាប់អនុញ្ញាត។
ថ្លែងក្នុងពិធីបិទសន្និបាតបូកសរុបការងារឆ្នាំ២០២១ និងលើកទិសដៅអនុវត្តការងារឆ្នាំ២០២២ របស់ក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២៣ ខែមីនា ឆ្នាំ២០២២ លោកនាយករដ្ឋមន្ត្រី ហ៊ុន សែន បានបញ្ជាទៅកងទ័ពនិងកងកម្លាំងនគរបាលអាចប្រើប្រាស់ឧទ្ធម្ភាគចក្របាញ់ពីលើអាកាស ដើម្បីបង្ក្រាបបទល្មើសនេសាទ ប្រសិនបើជនល្មើសតដៃ។
លោក ហ៊ុន សែន ក៏បានស្តីបន្ទោសទៅមន្ត្រីពាក់ព័ន្ធថា បង្ក្រាបបានតែបទល្មើសនេសាទតូចតាច ខណៈបទល្មើសធំៗ ដែលប្រព្រឹត្តដោយអ្នកមានលុយ មានអំណាចមិនត្រូវបានបង្ក្រាបឡើយ។ បញ្ហានេះ លោកក៏បានចោទជាសំណួរពាក់ព័ន្ធអំពើពុករលួយឬ ការស៊ីសំណូកសូកប៉ាន់រវាងមន្ត្រី និងជនល្មើសផងដែរ។
លោកនាយករដ្ឋមន្ត្រី ក៏បានព្រមានពេលនោះដោយថា នឹងដកអភិបាលខេត្តជាប់បឹងទន្លេសាបចោល ប្រសិនបើបទល្មើសនេសាទនៅតែកើតមានឡើងក្នុងដែនគ្រប់គ្រងរបស់ខ្លួន ប៉ុន្តែរហូតមកទល់ពេលនេះ មិនទាន់មានអភិបាលខេត្តណាមួយត្រូវបានដកចេញពីតំណែងឡើយ បើទោះបីជាបទល្មើសនេសាទតំបន់បឹងទន្លេសាបត្រូវបានគេរកឃើញថាបន្តកើតមានក៏ដោយ៕
