មន្ត្រីជាន់ខ្ពស់ក្រសួងមហាផ្ទៃ អះអាងថា ពុំមានករណីវាយ ទាត់ ធាក់ លើសកម្មជនគណបក្សសង្គ្រោះជាតិដែលតុលាការបានរំលាយ នៅក្នុងពន្ធនាគារត្រពាំងផ្លុង ដូចការលើកឡើងរបស់សាច់ញាតិពួកគេឡើយ ខណៈមន្ត្រីរូបនេះចាត់ទុកការលើកឡើងនោះថា គ្រាន់តែជាការបង្កើតរឿងមួលបង្កាច់រដ្ឋាភិបាលដើម្បីបានប្រយោជន៍ពីបរទេស។
កាលពីថ្ងៃទី២៦ ខែសីហា ឆ្នាំ២០២២ សាច់ញាតិសកម្មជនគណបក្សសង្គ្រោះជាតិដែលតុលាការបានរំលាយ បានលើកឡើងថា មន្ត្រីពន្ធនាគារបានបញ្ជាឱ្យអ្នកជាប់ឃុំដូចគ្នា វាយ ទាត់ ធាក់ស្វាមីរបស់ពួកគាត់ទាំង១៤នាក់ នៅក្នុងពន្ធនាគារត្រពាំងផ្លុង ខេត្តត្បូងឃ្មុំ ខណៈស្វាមីរបស់ពួកគាត់មានវ័យចំណាស់ និងមានជំងឺជាប់ខ្លួនផង។
អ្នកនាំពាក្យក្រសួងមហាផ្ទៃ លោក ខៀវ សុភ័គ នៅថ្ងៃចន្ទនេះ បានច្រានចោលការលើកឡើងនេះ ដោយថា ពុំមានករណីហិង្សាណាមួយកើតឡើងទៅលើអ្នកជាប់ឃុំជាសកម្មជនបក្សប្រឆាំងនៅក្នុងពន្ធនាគារត្រពាំងផ្លុងឡើយ។ លោកថា ក្នុងបន្ទប់នីមួយៗនៃពន្ធនាគារ មានជនជាប់ឃុំចន្លោះពី៣០ ទៅ៤០នាក់ ដូច្នេះបើមានការវាយតប់មែន នឹងមានគេដឹងឮហើយ។
លោក ខៀវ សុភ័គ ចាត់ទុកការលើកឡើងរបស់សាច់ញាតិសកម្មជនបក្សប្រឆាំង ឬ «ក្រុមស្ត្រីថ្ងៃសុក្រ» នេះថា ជារឿងប្រតិដ្ឋ មានចេតនាបង្កើតរឿង និងនិយាយអាក្រក់ពីរដ្ឋាភិបាលកម្ពុជា ដើម្បីបានប្រយោជន៍ពីបរទេសប៉ុណ្ណោះ។
ទោះជាបែបនេះក្ដី មន្ត្រីជាន់ខ្ពស់ក្រសួងមហាផ្ទៃរូបនេះប្រាប់ឱ្យសាច់ញាតិក្រុមបក្សប្រឆាំងទាំងនេះរកភស្តុតាង និងដាក់ពាក្យប្ដឹង បើរកឃើញថា សាច់ញាតិរបស់ខ្លួនរងអំពើហិង្សាក្នុងពន្ធនាគារមែននោះ។
លោក ខៀវ សុភ័គ ថ្លែងថា៖ «អ៊ីចឹងយើងចាត់ទុកថា រឿងហ្នឹងជារឿងប្រតិដ្ឋទេ វាមិនមែនរឿងពិតទេ! ហើយមន្ត្រីពន្ធនាគារក៏មិនមែនអ្នកវាយ អ្នកតប់ដែរ។ អ៊ីចឹងអ្នកណាអ្នកវាយអ្នកតប់ សូមឱ្យមានពាក្យបណ្ដឹងច្បាស់លាស់មក ម៉ោងប៉ុន្មាន? នៅទីណា? អ្នកណាវាយ? […] ខ្មែរយើង ពូមិនជឿថាដល់ថ្នាក់ហ្នឹងទេ! ដំណាក់កាលនេះហើយ មិនជឿថាវាយដំច្រំធាក់គ្នាក្នុងគុកក្នុងអី។ ខ្មែរយើងល្អតើ! និយាយស្ដាប់គ្នាបាន ចរិតជាខ្មែរ ឈាមជាខ្មែរ មិនដែលមានអីទេ។ [ករណីសង្គមស៊ីវិលស្នើឱ្យស៊ើបអង្កេត ដើម្បីធានាថាពិតជាគ្មានអំពើហិង្សា?] ទោះជារដ្ឋាភិបាលយើងស៊ើបអង្កេត ក៏គាត់មិនដែលជឿដែរ ស៊ើបអង្កេតមិនដែលជឿបន្តទៅទៀត អាហ្នឹងបទពិសោធន៍កន្លងមកអ៊ីចឹង»។
ភរិយារបស់សមាជិកក្រុមប្រឹក្សាខេត្តព្រៃវែង មកពីគណបក្សសង្គ្រោះជាតិដែលតុលាការបានរំលាយ អ្នកស្រី សោម ចន្ធូ ចាត់ទុកសាររបស់មន្ត្រីក្រសួងមហាផ្ទៃនេះ ថាជាការឆ្លើយយករួចខ្លួន ដោយមិនបានស្វែងរកការពិតជាមុន។
អ្នកស្រី សោម ចន្ធូ ថា៖ «គាត់ឆ្លើយយកតែរួចខ្លួនគាត់ ខ្លួនគាត់ហ្នឹងមិនបានវាយទេ ប៉ុន្តែអ្នកដែលនៅក្នុងពន្ធនាគារនេះ វាធ្វើបាប! ហើយខ្ញុំទៅពីម្សិលមិញ សុទ្ធតែថាក្រុមខ្ញុំហ្នឹងមករញ៉េរញ៉ៃណាស់ មកផ្សាយព័ត៌មានអីទៀតហើយចាំមើល ប៉ូលិសហ្នឹងវានិយាយអ៊ីចឹង […] យកទៅ ទៅងាប់តែហ្មង គ្មានឱ្យរស់ទេ! បើចូលទៅដល់ វាយគ្នាប៉ុណ្ណឹងហើយ នៅថាមិនវាយទៀត»។
ក្រៅពីនោះ អ្នកស្រីថា មន្ត្រីពន្ធនាគារមិនអនុញ្ញាតឱ្យពួកគាត់ចូលសួរសុខទុក្ខស្វាមីទេ កាលពីថ្ងៃម្សិលមិញ ដោយពួកគេទាមទាររកសៀវភៅគ្រួសារ បើទោះអ្នកស្រីមានអត្តសញ្ញាណបណ្ណ និងកាតចាក់វ៉ាក់សាំងក៏ដោយ។ បើតាមភរិយាសកម្មជនបក្សប្រឆាំងរូបនេះ មន្ត្រីពន្ធនាគារត្រពាំងផ្លុងពុំបានទាមទាររកសៀវភៅគ្រួសារពីសាច់ញាតិអ្នកជាប់ឃុំដទៃទៀតឡើយ។ អ្នកស្រីចាត់ទុកថា នេះជាការបង្កឧបសគ្គ ដើម្បីកុំឱ្យពួកគាត់បានជួបស្វាមី។
អ្នកស្រីបន្ថែមថា កូនប្រុសគាត់ជួបជាមួយឪពុកប្រមាណ១៥នាទីប៉ុណ្ណោះ ខណៈសមត្ថកិច្ចប្រមាណ៣០នាក់បានព័ទ្ធជុំវិញ និងផ្ទៀងស្ដាប់គ្រប់ម៉ាត់ ដែលធ្វើឱ្យស្វាមីគាត់ពុំអាចរៀបរាប់ពីការរងទុក្ខ ក្រោយផ្ទេរពីព្រៃស ទៅត្រពាំងផ្លុង។
នាយកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍ថា ករណីសកម្មជនបក្សសង្គ្រោះជាតិរងអំពើហិង្សានៅពន្ធនាគារនេះ មានការចាប់អារម្មណ៍ខ្លាំងពីសហគមន៍ជាតិនិងអន្តរជាតិ ដែលរឿងនេះ រដ្ឋាភិបាលគួរតែស៊ើបអង្កេតឱ្យបានម៉ត់ចត់ មុននឹងចេញការឆ្លើយតប។
លោកបន្តថា ជនជាប់ឃុំមានសិទ្ធិដូចពលរដ្ឋដទៃ ដោយគ្រាន់តែតុលាការបានដកសិទ្ធិដើរហើររបស់ពួកគេប៉ុណ្ណោះ ដូច្នេះពួកគេមិនត្រូវទទួលរងការវាយដំ ការធ្វើទារុណកម្មណាមួយឡើយ ហើយពួកគេមានសិទ្ធិជួបសាច់ញាតិ មេធាវី និងប្រើប្រាស់ថ្នាំសង្កូវបានពេញលេញផងដែរ។
លោក អំ សំអាត ថ្លែងថា៖ «អង្គការសង្គមស៊ីវិលយើងចង់ឃើញតែតម្លាភាព និងភាពយុត្តិធម៌ទេ គឺនៅតែទទូចដដែលទេ ថាត្រូវធ្វើម៉េចឱ្យមានការស៊ើបអង្កេតប្រកបដោយតម្លាភាព និងយុត្តិធម៌ ដើម្បីភាពស្អាតស្អំ និងយុត្តិធម៌ទាំងអស់គ្នា។ បើរកទៅឃើញថាមានការវាយដំ មានការប្រើប្រាស់នូវអំពើហិង្សា ត្រូវចាត់វិធានការតាមផ្លូវច្បាប់។ ហើយបើរកអត់ឃើញ អាហ្នឹងអាជ្ញាធរ និងក្រសួងពាក់ព័ន្ធ អាចបញ្ចេញរបាយការណ៍របស់ខ្លួនថា មិនមានរឿងហ្នឹងកើតឡើងទេ។ អាហ្នឹងគឺជាការមួយបង្ហាញនូវតម្លាភាព និងយុត្តិធម៌ទាំងសងខាង»។
បើតាមក្រុមភរិយាសកម្មជនបក្សសង្គ្រោះជាតិដែលតុលាការបានរំលាយ ដើមចមដែលនាំឱ្យសាច់ញាតិរបស់ពួកគេរងអំពើហិង្សាក្នុងពន្ធនាគារត្រពាំងផ្លុងនោះ ដោយសារតែពួកគាត់បានទិញរបស់ហូបចុក ថ្នាំសង្កូវ និងសម្ភារប្រើប្រាស់ផ្ញើទៅស្វាមី ប៉ុន្តែត្រូវបានមន្ត្រីពន្ធនាគារប្រមូលយកទៅដុតចោល និងតម្រូវឱ្យពួកគាត់ទិញសម្ភារទាំងនោះនៅខាងក្នុងពន្ធនាគារវិញ។ ក្រោយមក ប្តីរបស់ពួកគាត់បានតវ៉ារឿងការកម្ទេចនោះ ខណៈសម្ភារនៅខាងក្នុងពន្ធនាគារមានតម្លៃខ្ពស់ ទើបនាំឱ្យឆ្មាំពន្ធនាគារទាំងនោះមិនពេញចិត្ត ហើយបញ្ជាឱ្យអ្នកជាប់ឃុំជាមួយគ្នាវាយតប់ពួកគាត់តែម្តង។
កាលពីថ្ងៃទី២១ ខែសីហា សមត្ថកិច្ចបានផ្ទេរសកម្មជនបក្សប្រឆាំងចំនួន១៤នាក់ ក្នុងចំណោមអ្នកជាប់ឃុំផ្សេងទៀត ចេញពីពន្ធនាគារព្រៃស រាជធានីភ្នំពេញ ទៅកាន់ពន្ធនាគារត្រពាំងផ្លុង ខេត្តត្បូងឃ្មុំ ក្បែរព្រំដែនវៀតណាម ដោយគ្រួសារនិងមេធាវីអះអាងថាមិនបានបញ្ជាក់ពីមូលហេតុច្បាស់លាស់ និងមិនបានជូនដំណឹងដល់ពួកគេឡើយ។
សាច់ញាតិសកម្មជនគណបក្សសង្គ្រោះជាតិ បានបង្ហាញការព្រួយបារម្ភពីបញ្ហាសុខភាពសាច់ញាតិរបស់ពួកគេ ក្រោយពួកគាត់ចាត់ទុកការផ្ទេរស្វាមីគាត់ទៅពន្ធនាគារត្រពាំងផ្លុងនេះ ថាជាការគំរាមកំហែងផ្នែកនយោបាយ និងធ្វើទុក្ខបុកម្នេញកាន់តែធ្ងន់ធ្ងរមួយកម្រិតទៀតដល់ស្វាមីពួកគាត់ ជាពិសេសធ្វើឱ្យគាត់កាន់តែជួបបញ្ហាប្រឈមច្រើនក្នុងការធ្វើដំណើរទៅសួរសុខទុក្ខស្វាមី ជាដើម៕
