លោកនាយករដ្ឋមន្រ្តី ហ៊ុន សែន ក្រើនរំលឹកនិងដាស់តឿនដល់អាជ្ញាធរមូលដ្ឋានត្រូវសកម្មក្នុងការដោះស្រាយបញ្ហាក្នុងមូលដ្ឋានរបស់ខ្លួន ជាពិសេសត្រូវចុះពិនិត្យនិងជួលជុលផ្លូវដែលរងការខូចខាត ដោយលោកថា មិនមែនឱ្យកាន់តំណែងហើយអង្គុយលេងនោះទេ។
ក្នុងពិធីបើកការដ្ឋានសាងសង់ស្ពានអាកាសក្នុងរាជធានីភ្នំពេញ នៅថ្ងៃទី៣១ ខែសីហា ឆ្នាំ២០២២នេះ លោកនាយករដ្ឋមន្ត្រី ហ៊ុន សែន មានប្រសាសន៍ថា កន្លងមក លោកបានបញ្ជាឱ្យដកអភិបាលក្រុងតាខ្មៅ ខេត្តកណ្ដាល ចេញពីតំណែង ដោយសារតែមន្ត្រីរូបនោះមិនយកចិត្តទុកដាក់ក្នុងការបំពេញការងារ និងមិនបានចុះទៅពិនិត្យមើលជួសជុលផ្លូវដែលរងការខូចខាតឡើងវិញ។
ជាមួយគ្នានេះ លោកបានដាស់តឿនដល់មន្ត្រីអាជ្ញាធរក្រុង-ស្រុក-ខណ្ឌទាំងអស់ រួមទាំងប្រធានមន្ទីរសាធារណការ និងដឹកជញ្ជូន រាជធានី-ខេត្ត ត្រូវចុះពិនិត្យមើលនិងជួសជុលផ្លូវដែលខូចខាតឡើងវិញ និងត្រូវដោះស្រាយបញ្ហាផ្សេងៗដែលកើតមាននៅក្នុងមូលដ្ឋានរបស់ខ្លួន។
លោកថា៖ «មិនមែននិយាយសំដៅតែទីក្រុងភ្នំពេញ និងខេត្តកណ្ដាលទេ គឺគ្រប់ខេត្តទាំងអស់ ដែលទទួលខុសត្រូវមើលទីក្រុង ទីប្រជុំជន ត្រូវមើលផ្លូវ»។
លោកនាយករដ្ឋមន្រ្តី ហ៊ុន សែន បន្ថែមថា៖ «ដោយសារតែមានការងារច្រើននៅក្នុងមូលដ្ឋាន រាជរដ្ឋាភិបាលបានចេញ បានរៀបចំធ្វើវិសោធនកម្មច្បាប់បង្កើនអាសនៈឱ្យថ្នាក់រាជធានីនិងខេត្ត បង្កើនអាសនៈឱ្យក្រុង ស្រុក ខណ្ឌ ព្រោះការងារកាន់តែច្រើនទៅៗ ការផ្ទេរអំណាចពីខាងលើទៅឱ្យខាងក្រោម គឺមានច្រើន។ ការផ្ទេរនេះមិនមែនទៅដើម្បីអស់លោកទៅអង្គុយជំនុំគ្នាលេងអុកទេ អត់ទេ! […] ព្រោះការងារមួយរយជំពូក ចុះផ្ទេរទៅឱ្យមូលដ្ឋានហើយ អ៊ីចឹងមូលដ្ឋានត្រូវចេះមើល»។
លោកក៏បានបញ្ជាទៅមន្ត្រីពាក់ព័ន្ធ ត្រូវទប់ស្កាត់និងដាក់ពិន័យឱ្យបានតឹងរ៉ឹងតាមច្បាប់ ចំពោះករណីរថយន្តដឹកលើសទម្ងន់កំណត់ ដែលជាកត្តារួមចំណែកនាំឱ្យខូចផ្លូវផងដែរ៕