នគរបាលខេត្តព្រះសីហនុបានឃុំខ្លួនបុរសជនជាតិចិនម្នាក់ និងបានសង្គ្រោះជនជាតិម៉ាឡេស៊ីចំនួន១៦នាក់ដែលត្រូវបានបង្ខាំងទុកនៅទីតាំងមួយក្នុងក្រុងព្រះសីហនុ។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានមានប្រសាសន៍កាលពីថ្ងៃទី៣១ ខែសីហា ឆ្នាំ២០២២ ថាប្រតិបត្តិការជួយសង្គ្រោះនេះជាការឆ្លើយតបទៅនឹងពាក្យបណ្ដឹងដែលបានរាយការណ៍ទៅកាន់បណ្ដាញទូរសព្ទទាន់ហេតុការណ៍របស់ក្រសួង អំពីទីតាំងមួយនៅភូមិ៦ សង្កាត់លេខ៤ ក្រុងព្រះសីហនុ កាលពីថ្ងៃអង្គារ ទី៣០ ខែសីហា ឆ្នាំ២០២២។ ដោយមានការសហការពីម្ចាស់ទីតាំង មន្ត្រីនគរបាលបានចុះពិនិត្យទីតាំងនោះ និងបានរកឃើញបុរសនិងស្រ្តីជនជាតិម៉ាឡេស៊ី។ នគរបាលក៏បាននាំខ្លួនបុរសជនជាតិចិនម្នាក់មកសាកសួរបន្ថែម។
លោក ខៀវ សុភ័គ បានថ្លែងថា៖ «ក្នុងចំណោមមនុស្សទាំង១៦នាក់ អ្នកខ្លះមានលិខិតឆ្លងដែន អ្នកខ្លះមិនមាន។»
លោកបន្ថែមថា៖ «ឯកសារមួយចំនួនរបស់ពួកគេត្រូវបានដកហូត។ រឿងរបស់ពួកគេមិនខុសគ្នាទេ… [ពួកគេ] ទទួលបានប្រាក់ខែខ្ពស់ ប៉ុន្តែត្រូវបានបង្ខាំង និងមិនត្រូវបានអនុញ្ញាតឱ្យចាកចេញពីក្រុមហ៊ុនឡើយ។ អ្នកទាំងអស់នោះស្នើសុំត្រលប់ទៅប្រទេសរបស់ខ្លួនវិញ ហើយបន្ទាប់ពីបានសាកសួរ [យើងជឿថា] គ្មានការធ្វើទារុណកម្មឡើយ»។
លោកបន្តថា អ្នកដែលត្រូវបានបង្ខាំងទាំង១៦នាក់នោះត្រូវបានអនុញ្ញាតឱ្យនៅតែក្នុងក្រុមហ៊ុនឬបន្ទប់របស់ពួកគេប៉ុណ្ណោះ។ អ្នកទាំងនេះជំពាក់បំណុលថៅកែ ដូច្នេះត្រូវធ្វើការដើម្បីដោះបំណុល។
លោក ស ខេង បានសរសេរនៅលើហ្វេសប៊ុករបស់លោកថា៖ «យើងបើកប្រតិបត្តិការសង្រ្គោះរាល់ថ្ងៃ ព្រោះមានពាក្យបណ្ដឹងពីបងប្អូនរបស់ជនរងគ្រោះ ឬអាជ្ញាធរនៅក្រៅប្រទេស។ ប៉ុន្មានថ្ងៃនេះ យើងបានទទួលពាក្យបណ្ដឹងចំនួន៤០ករណី»។
ក្នុងប្រតិបត្តិការដាច់ដោយឡែកមួយ នគរបាលខេត្តព្រះសីហនុបានជួយសង្គ្រោះជនជាតិវៀតណាមចំនួន៥នាក់ បើទោះបីជាអាជ្ញាធរបានបដិសេធថា មិនមែនជាការបង្ខាំងក៏ដោយ។
លោក ណុប បញ្ញា ស្នងការរងនគរបាលខេត្តព្រះសីហនុ ទទួលបន្ទុកបទល្មើសព្រហ្មទណ្ឌ បានថ្លែងថា កម្លាំងរបស់លោកបានជួយសង្គ្រោះជនជាតិវៀតណាមចំនួន៥នាក់ ក្នុងនោះ ប្រុស៣នាក់ និងស្រី២នាក់ ពីកន្លែងធ្វើការក្នុងខេត្តព្រះសីហនុ កាលពីថ្ងៃអង្គារ ទី៣០ ខែសីហា ឆ្នាំ២០២២។ ក្រោយពីសាកសួរអ្នកគ្រប់គ្រងរួចមក សមត្ថកិច្ចបានកំណត់ថា ពុំមានការបង្ខាំងនិងធ្វើទារុណកម្មទេ ហើយអ្នកទាំង៥នាក់គ្រាន់តែចង់ត្រលប់ទៅស្រុកកំណើតវិញប៉ុណ្ណោះ។
លោកបន្ថែមថា៖ «យើងនៅតែបន្តនីតិវិធីជាមួយពួកគេ»។
លោក ផាន់ វាសនា ប្រធានមជ្ឈមណ្ឌលប្រចាំបញ្ជានៃអគ្គស្នងការដ្ឋាននគរបាលជាតិ បានថ្លែងថា នគរបាលខេត្តព្រះសីហនុបានឆ្លើយតបនឹងពាក្យបណ្ដឹងដែលបានទទួលហើយថា ទីតាំងបង្ខាំងមនុស្សទុកនោះ គឺនៅភូមិ៤ ឃុំ៤។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន បានប្រាប់ វីអូឌី កាលពីថ្ងៃពុធ ទី៣១ ខែសីហា ឆ្នាំ២០២២ ថាមន្ត្រីនគរបាលគ្រោងធ្វើសន្និសីទសារព័ត៌មានមួយ ដើម្បីពន្យល់ពីមូលហេតុដែលនគរបាលចាត់ទុកករណីទាំងនេះថាជា «វិវាទការងារ» និងថាមិនមែនជាការបង្ខាំងមនុស្សទុកទេ។
ជាមួយគ្នានេះដែរ មន្ត្រីនគរបាលបានប្រកាសថា នឹងនិរទេសជនជាតិវៀតណាមដែលត្រូវបានរកឃើញនៅទីតាំងសង្ស័យការងារដោយបង្ខំតាមព្រំដែនស្ថិតក្នុងឃុំជ្រៃធំ ស្រុកកោះធំ ខេត្តកណ្ដាល។
គួរបញ្ជាក់ថា កាលពីថ្ងៃទី១៨ ខែសីហា ឆ្នាំ២០២២ មនុស្ស៤២នាក់បានរត់ចេញពីកាស៊ីណូជ្រៃធំ និងបានលោតចូលទន្លេបិញយី (Binh Di) ដើម្បីហែលឆ្លងទៅប្រទេសវៀតណាម។ ក្នុងចំណោមអ្នកទាំងនោះ មានម្នាក់អាយុ១៦ឆ្នាំបានលង់ទឹកស្លាប់។
លោក កែវ វ៉ាន់ថន អ្នកនាំពាក្យអគ្គនាយកដ្ឋានអន្តោប្រវេសន៍ មានប្រសាសន៍ថា នគរបាលបានរកឃើញមនុស្ស១១នាក់ទៀតនៅកាស៊ីណូជ្រៃធំ ដែលមិនមានលិខិតឆ្លងដែន ប៉ុន្តែលោកបដិសេធផ្តល់ព័ត៌មានអំពីការស៊ើបអង្កេតនោះ។
លោកបានមានប្រសាសន៍ថា៖ «យើងបានធ្វើការលើករណីនេះ និងបានស្នើឱ្យថ្នាក់ដឹកនាំរបស់យើងបណ្ដេញ [ពួកគេ] ចេញ ហើយនៅពេលដល់កាលកំណត់ ត្រូវប្រកាសបណ្ដាញចេញ យើងនឹងបណ្ដេញពួកគេចេញ ដោយអនុលោមតាមច្បាប់ស្តីពីអន្តោប្រវេសន៍»។
លោក កែវ វ៉ាន់ថន បានបដិសេធផ្តល់ព័ត៌មានបន្ថែមអំពីការស៊ើបអង្កេតរបស់នគរបាលចំពោះកាស៊ីណូនេះ ហើយបានបង្វែរសំណួរទៅនគរបាលខេត្តកណ្ដាល ប៉ុន្តែមន្រ្តីនគរបាលខេត្តកណ្ដាលមិនបានលើកទូរសព្ទទេ៕
បកប្រែ និងសម្រួលចេញពីអត្ថបទដើមភាសាអង់គ្លេស៖ At Least 21 More Foreign Nationals Freed in Human Trafficking Raids