អាល្លឺម៉ង់ នឹងពង្រីកវត្តមានយោធារបស់ខ្លួននៅក្នុងតំបន់ឥណ្ឌូ-ប៉ាស៊ីហ្វិក តាមរយៈការបញ្ជូននាវាចម្បាំងបន្ថែមទៀត និងចូលរួមសមយុទ្ធជាមួយសម្ពន្ធមិត្តទាំងឡាយ ខណៈខ្លួនក៏នឹងឃ្លាំមើលពីការកើនឡើងនៃឥទ្ធិពលយោធាចិនផងដែរ។
នេះបើតាមការឱ្យដឹងពីប្រមុខការពារជាតិអាល្លឺម៉ង់ដែលបានថ្លែងប្រាប់ទីភ្នាក់ងារសារព័ត៌មាន Reuters។
ទាក់ទិននឹងករណីនេះ លោក អេប៊ែរហាដ ហ្សន (Eberhard Zorn) បន្តថា កងកម្លាំងប្រដាប់អាវុធអាល្លឺម៉ង់ (Bundeswehr) គ្រោងនឹងបញ្ជូនទាហានទៅចូលរួមក្នុងសមយុទ្ធហ្វឹកហ្វឺននៅប្រទេសអូស្ត្រាលី នៅឆ្នាំក្រោយ ខណៈកងទ័ពជើងទឹកក៏នឹងបញ្ជូនកងនាវានៃកប៉ាល់ជាច្រើនគ្រឿងបន្ថែមទៀតទៅកាន់តំបន់ នៅក្នុងឆ្នាំ២០២៤ខាងមុខផងដែរ។
ថ្លែងក្នុងបទសម្ភាសមួយដែលធ្វើឡើងនៅក្រសួងការពារជាតិ ក្នុងទីក្រុងប៊ែរឡាំង លោកបន្ថែមថា៖ «នេះហើយជាសកម្មភាពដែលយើងចង់ធ្វើក្នុងការបង្កើនវត្តមានរបស់យើងនៅក្នុងតំបន់»។
ការថ្លែងដោយប្រមុខការពារជាតិអាល្លឺម៉ង់រូបនេះ ក៏ត្រូវបានធ្វើឡើងស្របពេលដែលភាពតានតឹងទាំងឡាយនៅតំបន់ឥណ្ឌូ-ប៉ាស៊ីហ្វិក បាននិងកំពុងតែកើនឡើងផងដែរ ជាពិសេសបន្ទាប់ពីករណីដែលប្រទេសចិនបានបង្កើនការធ្វើសមយុទ្ធយោធាដ៏ធំបំផុតមិនធ្លាប់មាន នៅជុំវិញកោះតៃវ៉ាន់ កាលពីដើមខែសីហា។
ទោះជាយ៉ាងណា ទាក់ទិននឹងសំណួរថាតើអាល្លឺម៉ង់អាចនឹងបញ្ជូននាវាចម្បាំងឆ្លងកាត់ច្រកសមុទ្រតៃវ៉ាន់ ដូចដែលសហរដ្ឋអាមេរិកធ្វើដែរឬយ៉ាងណានោះ លោក អេប៊ែរហាដ ហ្សន បានឆ្លើយតបថា វាគឺជាបញ្ហារសើបមួយ។
លោកថា៖ «យើងមិនចង់ឱ្យនរណាម្នាក់មានការខឹងសម្បា ដោយសារតែវត្តមានរបស់យើងឡើយ ខណៈយើងសុខចិត្តជ្រើសរើសក្នុងការបង្ហាញសញ្ញាដ៏រឹងមាំនៃសាមគ្គីភាព ជាមួយសម្ពន្ធមិត្តរបស់យើងជំនួសវិញ។ យើងគាំទ្រសេរីភាពនៃការធ្វើនាវាចរណ៍ និងការការពារបទដ្ឋានអន្តរជាតិនានា»។
គួររំលឹកថា កាលពីឆ្នាំ២០២០កន្លងទៅ អាល្លឺម៉ង់ក៏ធ្លាប់បានចេញផ្សាយនូវយុទ្ធសាស្ត្រឥណ្ឌូប៉ាស៊ីហ្វិករបស់ខ្លួនមួយផងដែរ ដោយផ្ដោតសំខាន់លើការពង្រឹងសម្ពន្ធភាពជាមួយបណ្ដាប្រទេសប្រជាធិបតេយ្យក្នុងតំបន់៕