ក្រុមការងារអន្តរក្រសួង បានណែនាំដល់អគ្គនាយកផលិតកម្មមហាហង្ស ដែលជាអ្នករៀបចំកម្មវិធីកញ្ញាឯក Miss Grand Cambodia ឱ្យឈ្វេងយល់វប្បធម៌ ទំនៀមទម្លាប់ ប្រពៃណី អត្តសញ្ញាណជាតិ និងទាំងគុណតម្លៃនៃស្ត្រីខ្មែរបន្ថែមទៀត ក្រោយកម្មវិធីនេះរងការរិះគន់យ៉ាងខ្លាំងពីមហាជន ជុំវិញការស្លៀកពាក់មិនសមរម្យ។
ក្នុងកិច្ចប្រជុំណែនាំនេះក៏បានធ្វើឡើងក្រោយពីលោកនាយករដ្ឋមន្ត្រី ហ៊ុន សែន កាលពីថ្ងៃទី៣១ ខែសីហា ម្សិលមិញ បញ្ជាទៅរដ្ឋមន្ត្រីក្រសួងវប្បធម៌ និងវិចិត្រសិល្បៈ ពិនិត្យមើលឱ្យបានដិតដល់លើកម្មវិធីកញ្ញាឯក Miss Grand Cambodia បន្ទាប់ពីមានការរិះគន់យ៉ាងខ្លាំងពីសំណាក់ប្រជាពលរដ្ឋក្នុងបណ្ដាញសង្គម ជុំវិញការស្លៀកពាក់មិនសមរម្យ និងការបង្ហាញសារជាល្បែងបៀរ និងអាប៉ោង ជាដើម។
ក្នុងសេចក្ដីប្រកាសព័ត៌មានរបស់ក្រសួងវប្បធម៌ និងវិចិត្រសិល្បៈ បានឱ្យដឹងថា នៅថ្ងៃទី១ ខែកញ្ញា ឆ្នាំ២០២២នេះ ក្រុមការងារអន្តរក្រសួងមកពីក្រសួងវប្បធម៌និងវិចិត្រសិល្បៈ ក្រសួងកិច្ចការនារី និងក្រសួងព័ត៌មាន បានជួបជាមួយអគ្គនាយកផលិតកម្មមហាហង្ស លោក អ៊ិន សុភិន និងអ្នកពាក់ព័ន្ធមួយចំនួនទៀត។
ក្រសួងបន្តថា៖ «ក្នុងកិច្ចប្រជុំនោះ ស្ថាប័នពាក់ព័ន្ធបានធ្វើការណែនាំដល់អគ្គនាយកផលិតកម្ម មហាហង្ស ឱ្យឈ្វេងយល់គ្រប់ជ្រុងជ្រោយបន្ថែមទៀតពីវប្បធម៌ ទំនៀមទម្លាប់ ប្រពៃណី អត្តសញ្ញាណ ព្រមទាំងគុណតម្លៃនៃស្ត្រីខ្មែរ ហើយសហការឱ្យបានស៊ីជម្រៅជាមួយស្ថាប័នពាក់ព័ន្ធ ដើម្បីចៀសវាងនូវកំហុសឆ្គងដោយចេតនាឬអចេតនាណាមួយ ដែលនាំទៅដល់ការប៉ះពាល់ និងធ្វើឱ្យអាប់ឱននូវវប្បធម៌ជាតិ និងគុណតម្លៃរបស់ស្ត្រីខ្មែរ»។
ប្រភពដដែលបន្តថា ក្នុងកិច្ចប្រជុំនោះ ម្ចាស់ផលិតកម្មមហាហង្សក៏បានធ្វើការសូមអភ័យទោសចំពោះសាធារណជននូវកំហុសឆ្គងដែលបានកើតឡើងនៅក្នុងដំណើរការកម្មវិធីប្រកួតកញ្ញាឯក Miss Grand Cambodia ដោយសន្យាថា នឹងបង្កើនកិច្ចសហការជាមួយក្រសួងស្ថាប័នពាក់ព័ន្ធ និងមិនបង្កើតកំហុសបែបនេះទៀតនោះទេ។
ក្រោយពីបេក្ខភាពបវរកញ្ញាបង្ហាញឈុតប្រចាំខេត្តនីមួយៗ កាលពីរាត្រីថ្ងៃទី២៤ ខែសីហា ឆ្នាំ២០២២នេះ គេសង្កេតឃើញមានឈុតតំណាងខេត្តចំនួន២ ដែលទទួលរងការរិះគន់យ៉ាងខ្លាំងពីសំណាក់មហាជន ដោយក្នុងនោះ ឈុតកញ្ញាឯកដែលប្រកាសថាប្រចាំខេត្តស្វាយរៀង និងបន្ទាយមានជ័យ បានស្លៀកឈុតតំណាងដែលបង្ហាញពីការលេងល្បែងស៊ីសង ក៏ដូចជាឯកសណ្ឋានផងដែរ ខណៈកញ្ញាឯកដែលប្រកាសថាប្រចាំខេត្តស្ទឹងត្រែង បានស្លៀកសម្លៀកបំពាក់ស៊ិចស៊ីជ្រុលហួសហេតុ។
យ៉ាងណា បន្ទាប់ពីទទួលបានការរិះគន់យ៉ាងខ្លាំងពីសំណាក់មហាជន ទំព័រហ្វេសប៊ុកផ្លូវការរបស់ស្ថាប័ន Miss Grand Cambodia បានចេញលិខិតបំភ្លឺ និងសុំទោសដល់សាធារណជន ព្រមទាំងប្រកាសដកឈុតតំណាងក្រុងបាវិត និងក្រុងប៉ោយប៉ែត ចេញពីការប្រកួត៕