សាលាឧទ្ធរណ៍រាជធានីភ្នំពេញ សម្រេចមិនដោះលែងកញ្ញា សេង ធារី ឱ្យមានសេរីភាពនោះទេ ខណៈសវនាការបណ្ដឹងឧទ្ធរណ៍នាថ្ងៃនេះ មន្ត្រីពន្ធនាគារក៏មិនបានយកកញ្ញា សេង ធារី ចូលរួមដែរ។
ប្រធានក្រុមប្រឹក្សាជំនុំជម្រះសាលាឧទ្ធរណ៍រាជធានីភ្នំពេញ លោក យន់ ណារ៉ុង នៅថ្ងៃនេះ បានបើកសវនាការបណ្ដឹងឧទ្ធរណ៍សុំដោះលែងកូនក្ដីរបស់មេធាវីការពារក្ដីឱ្យកញ្ញា សេង ធារី ប៉ុន្តែតុលាការ និងមន្ត្រីពន្ធនាគារ មិនបានយកកញ្ញា សេង ធារី មកចូលរួមក្នុងសវនាការនេះឡើយ។
មុនពេលបើកសវនាការ មេធាវីការពារក្ដីឱ្យកញ្ញា សេង ធារី គឺលោក ជូង ជូងី បានសម្ដែងការខកចិត្ត ដោយចាត់ទុកការមិនបញ្ជូនកូនក្ដីរបស់ខ្លួនពីពន្ធនាគារខេត្តព្រះវិហារ មកចូលសវនាការនេះ ថាជាការរំលោភសិទ្ធិកូនក្ដីធ្ងន់ធ្ងរ។
ទោះបីជាមេធាវីកញ្ញា សេង ធារី បានលើកឡើងបែបនេះ ប៉ុន្តែប្រធានក្រុមប្រឹក្សាជំនុំជម្រះសាលាឧទ្ធរណ៍ លោក យន់ ណារ៉ុង មិនបានបញ្ជាក់ពីមូលហេតុនោះឡើយ។
ព្រះរាជអាជ្ញាសាលាឧទ្ធរណ៍ លោក អ៊ឹម សុផាន បានលើកឡើងក្នុងបន្ទប់សវនាការថា បណ្ដឹងស្នើសុំដោះលែងកូនក្ដីរបស់មេធាវីការពារក្ដីឱ្យកញ្ញា សេង ធារី មិនបានបញ្ជាក់ពីមូលហេតុច្បាស់លាស់ឡើយ។ ម្យ៉ាងវិញទៀត លោកថា កញ្ញា សេង ធារី ត្រូវសាលាដំបូងរាជធានីភ្នំពេញ ផ្ដន្ទាទោសដាក់ពន្ធនាគារ ៦ឆ្នាំ ដោយមិនព្យួរទោសឡើយ។
លោកថា៖ «អ៊ីចឹងអយ្យការយល់ឃើញថា តុលាការមិនគួរឱ្យនៅក្រៅឃុំ [សម្រាប់កញ្ញា សេង ធារី]»។
ឆ្លើយតបនឹងការលើកឡើងនេះ លោកមេធាវី ជូង ជូងី លើកឡើងថា តុលាការជាន់ទាបបានចេញសាលក្រមផ្ដន្ទាទោសកូនក្ដីឱ្យជាប់ពន្ធនាគារ៦ឆ្នាំ ប៉ុន្តែការសម្រេចនេះមិនមែនជាសាលក្រមស្ថាពរទេ។ លោកបញ្ជាក់ថា កាលណាសាលក្រមមិនទាន់ស្ថាពរ កូនក្ដីរបស់លោកក៏គ្មានទោសដែរ។ ករណីនេះហើយដែលលោកស្នើទៅប្រធានក្រុមប្រឹក្សាជំនុំជម្រះដោះលែងកញ្ញា សេង ធារី ឱ្យមានសេរីភាពវិញ។
ក្រោយពីបើកសវនាការប្រហែល១ម៉ោង លោកចៅក្រម យន់ ណារ៉ុង បានសម្រេចប្រកាសសាលដីកាភ្លាមៗ ដោយមិនដោះលែងកញ្ញា សេង ធារី ឱ្យមានសេរីភាពនោះទេ។
ប្រាប់អ្នកសារព័ត៌មានបន្ទាប់ពីបញ្ចប់សវនាការ លោកមេធាវី ជូង ជូងី លើកឡើងថា រូបលោកនឹងប្ដឹងសាទុក្ខចំពោះសេចក្ដីសម្រេចរបស់សាលាឧទ្ធរណ៍នេះ ទៅតុលាការជាន់ខ្ពស់បន្តទៀត ក្នុងពេលឆាប់ៗនេះ។
លោកថា៖ «ការប្រកាសជាសម្ដីអត់បានបញ្ជាក់មូលហេតុអីជាក់លាក់នៅឡើយទេ គឺចៅក្រមគាត់និយាយតិចៗ គាត់មិនបានបង្ហាញពីសម្អាងអីឱ្យបានជាក់លាក់ទេ ដែលយើងចាប់បាន។ ខ្ញុំយល់ថា ការសម្រេចហ្នឹងមិនត្រឹមត្រូវទេ ហើយខ្ញុំនឹងរៀបចំបែបបទ ដើម្បីប្ដឹងសាទុក្ខឱ្យគាត់»។
មន្រ្តីការពារសិទ្ធិមនុស្សនៃសមាគមអាដហុក លោក យី សុខសាន្ត ដែលឃ្លាំមើលពីដំណើរការសវនាការនេះ យល់ឃើញថា ការមិនបញ្ជូនកញ្ញា សេង ធារី មកតតាំងក្ដីនៅចំពោះតុលាការនេះ ជាការរំលោភនីតិវិធី។ លោកបន្តថា ការបន្តឃុំខ្លួនកញ្ញា សេង ធារី នៅពន្ធនាគារទៀត នឹងធ្វើឱ្យប៉ះពាល់ដល់មុខមាត់រដ្ឋាភិបាលកម្ពុជា ដោយសារសកម្មភាពរបស់កញ្ញា សេង ធារី ជាការសម្ដែងមតិ។
លោកថា៖ «ការបន្តឃុំខ្លួនកញ្ញា សេង ធារី វាធ្វើឱ្យប៉ះពាល់មតិជាតិ និងអន្តរជាតិ គេអាចថ្កោលទោសមកលើរាជរដ្ឋាភិបាល គ្រាន់តែធ្វើការសម្ដែងមតិ។ ខ្ញុំគិតថា រដ្ឋាភិបាល ក៏ដូចជាចៅក្រម គួរសម្រេចឱ្យកញ្ញា សេង ធារី បាននៅក្រៅឃុំ ដើម្បីស្តារមុខមាត់ប្រទេសជាតិយើងឡើងវិញ កុំឱ្យមតិជាតិ និងអន្តរជាតិ គេរិះគន់ថា តុលាការស្ថិតនៅក្រោមការត្រួតត្រារបស់រដ្ឋាភិបាល»។
លោក យី សុខសាន្ត បន្តថា ការបញ្ជូនកញ្ញា សេង ធារី ទៅឃុំខ្លួននៅពន្ធនាគារខេត្តព្រះវិហារ ជាការធ្វើទារុណកម្មផ្លូវចិត្ត ព្រមទាំងធ្វើឱ្យប៉ះពាល់ដល់សេដ្ឋកិច្ចគ្រួសារ ដែលត្រូវចំណាយថវិកាច្រើននៅពេលទៅសួរសុខទុក្ខ។
កាលពីថ្ងៃទី១៥ ខែមិថុនា ឆ្នាំ២០២២ កញ្ញា សេង ធារី ត្រូវបានសមត្ថកិច្ចរាជធានីភ្នំពេញ បញ្ជូនចេញពីពន្ធនាគារព្រៃស រាជធានីភ្នំពេញ ទៅឃុំនៅពន្ធនាគារខេត្តព្រះវិហារ ក្រោយពីសាលាដំបូងរាជធានីភ្នំពេញ ផ្ដន្ទាទោសកញ្ញាបានមួយថ្ងៃ។
ទាក់ទិនរឿងនេះ មេធាវីការពារក្ដីឱ្យកញ្ញា សេង ធារី គឺលោក ជូង ជូងី ក៏បានដាក់លិខិតទៅក្រសួងមហាផ្ទៃ ដើម្បីស្នើសុំផ្ទេរកូនក្ដីពីពន្ធនាគារខេត្តព្រះវិហារ មកពន្ធនាគារព្រៃស នៅរាជធានីភ្នំពេញវិញ ដោយថា ការឃុំខ្លួននៅខេត្តដែលមានចម្ងាយឆ្ងាយ មានការលំបាកច្រើន។
កញ្ញា សេង ធារី ដែលមានសញ្ជាតិអាមេរិកាំង និងជាមេធាវីអន្តរជាតិមួយផងនោះ ត្រូវបានលោក រស់ ពិសិដ្ឋ ចៅក្រុមជំនុំជម្រះនៃសាលាដំបូងរាជធានីភ្នំពេញ ផ្ដន្ទាទោសដាក់ពន្ធនាគារ៦ឆ្នាំ ខណៈថ្នាក់ដឹកនាំ និងអ្នកគាំទ្រគណបក្សសង្រ្គោះជាតិដែលត្រូវបានតុលាការរំលាយ ចំនួន៥០នាក់ផ្សេងទៀត ត្រូវបានតុលាការផ្តន្ទាទោសដាក់ពន្ធនាគារចន្លោះពី ៥ឆ្នាំ ទៅ ៨ឆ្នាំ ក្រោមបទចោទប្រកាន់ «ញុះញង់ និងរួមគំនិតក្បត់ជាតិ» ជុំវិញការប្រកាសជំហរគាំទ្រការធ្វើមាតុភូមិនិវត្តន៍ថ្ងៃ«៩វិច្ឆិកា»របស់លោក សម រង្ស៊ី៕
