អ្នកជំនាញនុយក្លេអ៊ែររបស់អង្គការសហប្រជាជាតិ នៅថ្ងៃព្រហស្បតិ៍នេះ បានចាប់ផ្ដើមចេញដំណើរពីទីក្រុងហ្សាប៉ូរីសហ្ស៉ីយ៉ា (Zaporizhzhia) ដើម្បីទៅកាន់រោងចក្រថាមពលនុយក្លេអ៊ែរដែលកាន់កាប់ដោយរុស្ស៊ី នៅភាគខាងត្បូងនៃប្រទេសអ៊ុយក្រែន បើទោះបីជាតំបន់នេះត្រូវបានរាយការណ៍ថាមានការប្រយុទ្ធគ្នាក៏ដោយ។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ទាក់ទិននឹងករណីនេះ ប្រធានទីភ្នាក់ងារថាមពលបរមាណូអន្តរជាតិ (IAEA) លោក Rafael Grossi បានឱ្យដឹងថា ក្រុមការងារនៃបេសកកម្មបានដឹងអំពីការកើនឡើងនៃសកម្មភាពយោធានៅក្នុងតំបន់នោះ ប៉ុន្តែពួកគេនៅតែបន្តទៅមុខជាមួយនឹងផែនការរបស់ខ្លួន ដើម្បីទៅកាន់រោងចក្រថាមពលនុយក្លេអ៊ែរ និងជួបជាមួយបុគ្គលិកនៅទីនោះ។
លោកបន្តថា៖ «មកដល់ចំណុចនេះហើយ គឺយើងមិនបញ្ឈប់សកម្មភាពរបស់ខ្លួនវិញឡើយ»។
គួរបញ្ជាក់ថា ក្រុមការងារនៃបេសកកម្មរបស់អង្គការសហប្រជាជាតិ បានធ្វើដំណើរមកដល់ទីក្រុងហ្សាប៉ូរីសហ្ស៉ីយ៉ា កាលពីថ្ងៃពុធ ខណៈពួកគេគ្រោងនឹងទៅកាន់រោងចក្រនុយក្លេអ៊ែរ ដែលស្ថិតនៅចម្ងាយ៥៥គីឡូម៉ែត្រពីទីក្រុង នៅថ្ងៃព្រហស្បតិ៍នេះ ក្នុងគោលបំណងដើម្បីបញ្ចៀសគ្រោះមហន្តរាយនុយក្លេអ៊ែរ។
ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំង បន្ទាប់ពីរុស្ស៊ីបានបើកការឈ្លានពានទ្រង់ទ្រាយធំមកលើប្រទេសក្បែរខាងរបស់ខ្លួនមួយនេះ ដែលធ្វើឡើងបន្ទាប់ពីការប្រកាសសង្រ្គាមមួយដោយប្រធានាធិបតី លោក វ្លាឌីមៀរ ពូទីន។
ករណីនេះក៏បានបង្កឱ្យមានជាការព្រួយបារម្ភពីបណ្ដាប្រទេសលោកខាងលិច ដែលថា ការប៉ះទង្គិចរវាងប្រទេសទាំង២នេះអាចនឹងវិវត្តទៅជាសង្រ្គាមដោយប្រើប្រាស់អាវុធនុយក្លេអ៊ែរ គីមី និងជីវសាស្ត្រ ជាដើម។
ទោះជាយ៉ាងណា អ្នកនាំពាក្យវិមានក្រឹមឡាំងមួយរូបធ្លាប់បានបញ្ជាក់ឱ្យដឹងកាលពីពេលកន្លងទៅថា គោលនយោបាយសន្តិសុខរបស់រុស្ស៊ីកំណត់ថា ប្រទេសរបស់ខ្លួននឹងប្រើប្រាស់អាវុធនុយក្លេអ៊ែរសម្រាប់តែករណីដែលអត្ថិភាពរបស់ខ្លួនត្រូវបានគំរាមកំហែងប៉ុណ្ណោះ៕