ក្រុមយុវជនខ្មែរថាវរៈ បានអះអាងថា សមត្ថកិច្ចខេត្តព្រះវិហារបានដាក់របាំងរារាំងពួកគេ និងក្រុមស្រ្តីថ្ងៃសុក្រ មិនឱ្យធ្វើដំណើរទៅកាន់មុខពន្ធនាគារខេត្ត ដើម្បីបង្ហោះប៉ោងប៉ោងលើកទឹកចិត្ត និងទាមទារឱ្យមានការដោះលែងកញ្ញា សេង ធារី នោះទេ។
សមាជិកក្រុមយុវជនខ្មែរថាវរៈ លោក ហ៊ុន វណ្ណៈ បានឱ្យដឹងថា នៅថ្ងៃសុក្រនេះ ក្រុមយុវជនខ្មែរថាវរៈ និងស្ត្រីថ្ងៃសុក្រ (ភរិយាសកម្មជនគណបក្សសង្គ្រោះជាតិដែលតុលាការរំលាយ) ចំនួន១៣នាក់ បាននាំគ្នាធ្វើដំណើរទៅកាន់ពន្ធនាគារខេត្តព្រះវិហារ ដើម្បីបង្ហោះប៉ោងប៉ោងផ្ញើសារលើកទឹកចិត្តដល់កញ្ញា សេង ធារី ដែលកំពុងជាប់ឃុំនៅទីនោះ។ តែយ៉ាងណា លោកថា នៅពេលទៅដល់ជិតពន្ធនាគារ សមត្ថកិច្ចជាច្រើននាក់បានដាក់របាំងរារាំង និងមិនអនុញ្ញាតឱ្យពួកគេទៅកាន់មុខពន្ធនាគារខេត្តឡើយ។
លោកចាត់ទុកការរារាំងពីសំណាក់សមត្ថកិច្ចនេះ ថាជាការបំបិទសិទ្ធិសេរីភាពរបស់ពលរដ្ឋក្នុងការដើរហើរ និងសម្តែងមតិ ដែលមានចែងក្នុងរដ្ឋធម្មនុញ្ញ។
លោក ហ៊ុន វណ្ណៈ ថ្លែងថា៖ «ខ្ញុំថាស្ថាប័នរដ្ឋប្រើប្រាស់សមត្ថកិច្ចដែលជាមន្រ្តីរាជការស៊ីប្រាក់ខែបានមកពីពន្ធរបស់ប្រជាពលរដ្ឋ ប្រើប្រាស់កម្លាំងទាំងអស់ហ្នឹងមកបំបិទសិទ្ធិប្រជាពលរដ្ឋខ្មែរដែលធ្វើដំណើរ ថាជិះឡានទៅ តែដើរគេមិនឱ្យទៅ យើងដឹងថាសិទ្ធិសេរីភាពរបស់យើងត្រូវបានគេរំលោភបំពាន»។
ចំណែកសមាជិកក្រុមយុវជនខ្មែរថាវរៈម្នាក់ទៀត កញ្ញា ឆែម ស្រីគា បានឱ្យដឹងដែរថា ការដែលពួកគាត់ទៅកាន់ពន្ធនាគារខេត្តព្រះវិហារ គឺក្នុងគោលបំណងសម្តែងក្តីនឹករលឹក និងអរគុណកញ្ញា សេង ធារី ដែលបានតស៊ូមតិដោយអហិង្សាដើម្បីលើកស្ទួយប្រជាធិបតេយ្យនៅកម្ពុជា។
កញ្ញាបន្តថា៖ «ខ្ញុំគិតថា រដ្ឋាភិបាលកំពុងខ្លាចកម្លាំងយុវជនដែលគាត់ចេះប្រមូលផ្ដុំគ្នា ដែលគាត់ចេះទាមទារនូវសិទ្ធិសេរីភាព ដូចនៅក្នុងបូរបស់យើងហ្នឹងដែលមានសេរសេរថា “សេរីភាព”»។
បើតាមកញ្ញា ឆែម ស្រីគា ក្រៅពីការបង្ហោះប៉ោងប៉ោង ពួកគេក៏បានតែងខ្លួនជា «នាងសេរីភាព» ដូចអ្វីដែលកញ្ញា សេង ធារី ធ្លាប់ធ្វើក្នុងថ្ងៃដែលតុលាការប្រកាសសាលក្រមលើសំណុំរឿងរបស់កញ្ញា និងមានការកាត់ក្រដាសជារូបព្រាប ដែលជាសារទាមទារឱ្យមានការដោះលែងកញ្ញា សេង ធារី ឱ្យមានសេរីភាពផងដែរ។
វីអូឌី មិនទាន់សុំការឆ្លើយតបពីស្នងការខេត្តព្រះវិហារ លោក សួស សុខដារ៉ា និងស្នងការរង លោក នួន សុវិរិទ្ធ បាននៅឡើយទេ។
ប្រធានសមាគមសម្ពន្ធនិស្សិតបញ្ញវន្តខ្មែរ លោក កើត សារ៉ាយ យល់ថា ការសម្តែងមតិតាមរយៈការបង្ហោះប៉ោងប៉ោងនៅមុខពន្ធនាគារខេត្តព្រះវិហារនេះ ជាការបង្ហាញពីទឹកចិត្តពលរដ្ឋខ្មែរដែលគាំទ្រសកម្មភាពកញ្ញា សេង ធារី និងជួយឱ្យគាត់មានអារម្មណ៍ថាមិនឯកា បើទោះបីគាត់កំពុងជាប់ឃុំ។
លោកថា៖ «ការធ្វើនោះទៀតសោត ក៏ជាផ្នែកដ៏សំខាន់មួយក្នុងការជំរុញនិងលើកទឹកចិត្តឱ្យកញ្ញា សេង ធារី ដែលកំពុងតែនៅក្នុងពន្ធនាគារ ត្រូវបានអាជ្ញាធរយកទៅដាក់ឱ្យនៅឯកានៅកណ្ដាលព្រៃភ្នំ នៅខេត្តព្រះវិហារហ្នឹង»។
កញ្ញា សេង ធារី ដែលមានសញ្ជាតិអាមេរិកាំង និងជាមេធាវីអន្តរជាតិមួយផងនោះ ត្រូវបានលោក រស់ ពិសិដ្ឋ ចៅក្រុមជំនុំជម្រះនៃសាលាដំបូងរាជធានីភ្នំពេញ ផ្ដន្ទាទោសដាក់ពន្ធនាគារ៦ឆ្នាំ កាលពីថ្ងៃទី១៤ ខែមិថុនា ឆ្នាំ២០២២ ខណៈថ្នាក់ដឹកនាំ និងអ្នកគាំទ្រគណបក្សសង្រ្គោះជាតិដែលត្រូវបានតុលាការរំលាយ ចំនួន៥០នាក់ផ្សេងទៀត ត្រូវបានតុលាការផ្តន្ទាទោសដាក់ពន្ធនាគារចន្លោះពី ៥ឆ្នាំ ទៅ ៨ឆ្នាំ ក្រោមបទចោទប្រកាន់ «ញុះញង់ និងរួមគំនិតក្បត់ជាតិ» ជុំវិញការប្រកាសជំហរគាំទ្រការធ្វើមាតុភូមិនិវត្តន៍ថ្ងៃ«៩វិច្ឆិកា»របស់លោក សម រង្ស៊ី។
ទោះយ៉ាងណា ក្រោយការប្រកាសសាលក្រមមួយថ្ងៃ គឺកាលពីថ្ងៃទី១៥ ខែមិថុនា ឆ្នាំ២០២២ កញ្ញា សេង ធារី ត្រូវបានសមត្ថកិច្ចរាជធានីភ្នំពេញ បញ្ជូនចេញពីពន្ធនាគារព្រៃស រាជធានីភ្នំពេញ ទៅឃុំនៅពន្ធនាគារខេត្តព្រះវិហារ។ បន្ទាប់ពីកញ្ញាត្រូវបានបញ្ជូនទៅពន្ធនាគារខេត្តព្រះវិហារ អស់រយៈជាង២ខែមកនេះ មន្រ្តីស្ថានទូតអាមេរិកប្រចាំកម្ពុជា នាយិកាប្រតិបត្តិនៃមជ្ឈមណ្ឌលសិទ្ធិមនុស្សកម្ពុជា និងអ្នកផ្សេងទៀត ក៏បានទៅជួបនិងលើកទឹកចិត្តដល់កញ្ញា សេង ធារី បើទោះបីជាពន្ធនាគារនៅខេត្តឆ្ងាយយ៉ាងណាក្តី។
ទាក់ទិនរឿងនេះដែរ មេធាវីការពារក្ដីឱ្យកញ្ញា សេង ធារី គឺលោក ជូង ជូងី ក៏បានដាក់លិខិតទៅក្រសួងមហាផ្ទៃ ដើម្បីស្នើសុំផ្ទេរកូនក្ដីពីពន្ធនាគារខេត្តព្រះវិហារ មកពន្ធនាគារព្រៃស នៅរាជធានីភ្នំពេញវិញ ដោយថា ការឃុំខ្លួននៅខេត្តដែលមានចម្ងាយឆ្ងាយ មានការលំបាកច្រើន៕