ការធ្វើសម្បទាន និងការចាក់ខ្សាច់លុបបឹងតាមោក បានបង្កឱ្យមានក្ដីបារម្ភចំពោះការបណ្ដេញចេញ ទឹកជំនន់ និងអំពើពុករលួយកាន់តែខ្លាំងឡើងចាប់តាំងពីឆ្នាំមុន។ ដីជាច្រើនហិកតាត្រូវបានផ្ទេរទៅឱ្យបុគ្គលដែលជាប់សែស្រឡាយមន្រ្តីរដ្ឋាភិបាលមួយចំនួន រួមទាំងកូនស្រីរបស់រដ្ឋមន្ត្រីក្រសួងដែនដី នគរូបនីយកម្ម និងសំណង់ ភរិយាសមាជិកព្រឹទ្ធសភា និងភរិយារបស់មេបញ្ជាការកងពលតូចលេខ៧០។
នៅក្នុងអនុក្រឹត្យដែលបង្ហាញពីការផ្ទេរដីរដ្ឋ បង្ហាញថា ដីបឹងតាមោក ២កន្លែងទៀតត្រូវបានផ្ទេរទៅឱ្យកំពូលតារាចម្រៀង លោក ព្រាប សុវត្ថិ និងបុគ្គលម្នាក់ទៀត។
អនុក្រឹត្យដដែលនោះក៏បង្ហាញពីដីសម្បទានសេដ្ឋកិច្ចដែលត្រូវបានកាត់ឆ្វៀលចេញពីតំបន់ការពារក្នុងខេត្តរតនគិរី និងខេត្តបន្ទាយមានជ័យ។
ក្នុងអនុក្រឹត្យចុះហត្ថលេខាដោយលោកនាយករដ្ឋមន្ត្រី ហ៊ុន សែន កាលពីថ្ងៃទី១៣ ខែមេសា ឆ្នាំ២០២២ និងដែលត្រូវបានចេញផ្សាយជាសាធារណៈក្នុងសប្តាហ៍នេះ លោក ព្រាប សុវត្ថិ ទទួលបានដីបឹងតាមោក ក្នុងខណ្ឌព្រែកព្នៅ ចំនួន៣ហិកតា ស្មើនឹង៣ឡូត៍ ដែលឡូត៍នីមួយៗមាទំហំ២,៧ហិកតា ០,២ហិកតា និង០,១ហិកតា។
វីអូឌី មិនអាចទាក់ទងសុំការអធិប្បាយពីលោក ព្រាប សុវត្ថិ បានទេ កាលពីថ្ងៃព្រហស្បតិ៍ម្សិលមិញ។
លោក គី សេង ជាបុគ្គលទី២ ដែលទទួលបានដីបឹងតាមោកនៅក្នុងអនុក្រឹត្យនេះ ប៉ុន្តែសាវតារបស់បុគ្គលនេះនៅមិនទាន់ដឹងច្បាស់នៅឡើយ។
នៅក្នុងអនុក្រឹត្យដដែលនោះបង្ហាញទៀតថា ដីទំហំ៤៤០ហិកតា នៅស្រុកភ្នំស្រុក ខេត្តបន្ទាយមានជ័យ ត្រូវបានធ្វើសម្បទានទៅឱ្យគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី៣ (LASED III) ដែលទទួលបានមូលនិធិពីធនាគារពិភពលោក ដែលមានគោលបំណងចេញបណ្ណកម្មសិទ្ធិដីធ្លីជូនគ្រួសារក្រីក្រ។ លើសពីនេះ ដីទំហំ៣ ៥០០ហិកតា នៅស្រុកកូនមុំ ខេត្តរតនគិរី ក៏ទំនងជាត្រូវបានបែងចែកទៅឱ្យគ្រួសារក្រីក្រផងដែរ។
អភិបាលរងខេត្តរតនគិរី លោក ញ៉ែម សំអឿន មានប្រសាសន៍ថា ប្រជាពលរដ្ឋបានតាំងទីលំនៅក្នុងតំបន់នេះជាយូរមកហើយ ប៉ុន្តែប្រជាពលរដ្ឋមកពីកន្លែងផ្សេងក៏អាចទទួលបានបណ្ណកម្មសិទ្ធិដីនេះដែរ។
លោកថា៖ «យើងលើកទឹកចិត្តប្រជាពលរដ្ឋនៅឃុំត្រពាំងក្រហម ប៉ុន្តែប្រជាពលរដ្ឋដែលមកពីខេត្តក៏អាចស្នើសុំបណ្ណកម្មសិទ្ធិបានដែរ។ យើងនឹងស្រាវជ្រាវ និងស្វែងរកអ្នកដែលមិនមានផ្ទះនិងដី។ យើងមិនទាន់បានកំណត់ចំនួនប៉ុន្មានគ្រួសារនៅឡើយទេ»។
លោកបន្ថែមថា៖ «ដីនេះក៏ជាផ្នែកមួយនៃគម្រោងរបស់ធនាគារពិភពលោកដែរ។ យើងនឹងបង្កើតភូមិថ្មី ហើយមានហេដ្ឋារចនាសម្ពន្ធ និងអ្វីៗផ្សេងទៀត។»
ដំណាក់កាលមុននៃគម្រោងនេះបានប្រឈមនឹងការចោទប្រកាន់ថា មានការបណ្ដេញចេញដោយបង្ខំ ដើម្បីទុកដីឱ្យអ្នកចំណូលថ្មី ហើយជាទូទៅសម្បទានដីសង្គមកិច្ចត្រូវបានរាយការណ៍ថាមានអំពើពុករលួយ។
អ្នកតស៊ូមតិជនជាតិដើមភាគតិច លោក គ្រឿង តុលា ធ្លាប់មានប្រសាសន៍ថា លោកមានមន្ទិលថាតើដីនេះពិតជាបានទៅដល់ដៃពលរដ្ឋក្រីក្រឬអត់។
លោក តុលា ថ្លែងថា៖ «ក្រសួងរៀបចំដែនដី នគរូបនីយកម្ម និងសំណង់ បានចែកដីសម្បទានសង្គមកិច្ចជាច្រើនដងរួចមកហើយ ប៉ុន្តែអ្នកដែលទទួលបានភាគច្រើនជាអ្នកមាន និងមិនមែនជាពលរដ្ឋក្រីក្រពិតប្រាកដនោះទេ»។
បកប្រែ និងសម្រួលចេញពីអត្ថបទដើមភាសាអង់គ្លេស៖ Pop Star Preap Sovath Gets Controversial Boeng Tamok Lake Land
