យ៉ាងហោចណាស់មនុស្សប្រុសស្រីចំនួន ៧នាក់រងរបួសធ្ងន់ស្រាល ព្រមទាំងខូចខាតសម្ភារៈមួយចំនួន ដោយសារឆេះដេប៉ូប្ដូរហ្គាសរថយន្ត និងឆ្លងទៅឆេះផ្ទះប្រជាពលរដ្ឋនៅផ្លូវម្ខាងទៀត ស្ថិតនៅខណ្ឌសែនសុខ រាជធានីភ្នំពេញ។
យោងតាមរបាយការណ៍របស់លោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញបានឱ្យដឹងកាលពីរសៀលថ្ងៃទី៣ ខែកញ្ញានេះថា មានករណីអគ្គិភ័យឆាបឆេះទីតាំងលក់ និងបញ្ចូលហ្គាស ស្ថិតនៅចំណុចក្បែរផ្សារបឹងបៃតង តាមបណ្ដោយផ្លូវលេខ១៩២៨ ហៅផ្លូវសម្តេច ជា ស៊ីម ភូមិក្រុងថ្មី សង្កាត់គោកឃ្លាង ខណ្ឌសែនសុខ រាជធានីភ្នំពេញ។ ភ្លាមៗនោះ លោកបានបញ្ជាកម្លាំងសមត្ថកិច្ចជំនាញឱ្យចេញរថយន្តពន្លត់អគ្គិភ័យគ្រប់គោលដៅជួយអន្តរាគមន៍បាញ់ពន្លត់។
លោក ព្រហ្ម យ៉ន បន្តថា នៅក្នុងហេតុការណ៍ អគ្គិភ័យឆាបឆេះនោះ បានបណ្តាលឱ្យមនុស្សប្រុសស្រីចំនួន ៧នាក់រងរបួសធ្ងន់ស្រាលត្រូវបានបញ្ជូនទៅមន្ទីរពេទ្យភ្លាមៗ ក្នុងនោះមានម្ចាស់ទីតាំងការ៉ាសហ្គាសមានឈ្មោះ ប៉ែន ធារិទ្ធ ផងដែរ។
របាយការណ៍ដដែលបន្ថែមថា ក្នុងប្រតិបត្តិការនោះ កម្លាំងជំនាញបានប្រើរថយន្តពន្លត់អគ្គិភ័យសរុបទាំងអស់ចំនួន ២២គ្រឿង រួមមាន រថយន្តការិយាល័យចំនួន ១២គ្រឿង និងរថយន្តរបស់ក្រុមហ៊ុនឯកជន២ ចំនួន ៨គ្រឿងផ្សេងទៀត៕