ប្រជាពលរដ្ឋកំពុងមានជម្លោះដីធ្លីរាប់រយនាក់ មកពីខេត្តកោះកុង នៅថ្ងៃអង្គារនេះ បាននាំគ្នាប្រមូលផ្ដុំនៅមុខក្រសួងយុត្តិធម៌ ខុទ្ទកាល័យនាយករដ្ឋមន្ត្រី និងក្រសួងស្ថាប័នមួយចំនួនទៀត ដើម្បីជំរុញឱ្យមានដំណោះស្រាយរឿងដីធ្លី និងសុំឱ្យមានកិច្ចអន្តរាគមន៍ទម្លាក់ចោលគ្រប់បទចោទ និងដោះលែងពលរដ្ឋរងគ្រោះដោយសារដីធ្លីឱ្យមានសេរីភាពឡើងវិញ។
ប្រជាពលរដ្ឋមកពីខេត្តកោះកុង និងកំពុងរងបណ្ដឹងនៅតុលាការ លោក ឈឹម សាផាន មានប្រសាសន៍នៅមុខក្រសួងយុត្តិធម៌ថា ក្រុមរបស់ពួកគាត់ មានពលរដ្ឋចំនួន៨៤៣គ្រួសារ ដែលរងគ្រោះដោយសារបញ្ហាជម្លោះដីធ្លីជាមួយក្រុមហ៊ុនស្ករអំពៅរបស់លោកឧកញ៉ា លី យ៉ុងផាត់ តាំងពីឆ្នាំ២០០៦ មក។
លោកបន្តថា រយៈពេលជិត២០ឆ្នាំមកហើយ ពួកគាត់នៅមិនទាន់បានទទួលដំណោះស្រាយនៅឡើយ បើទោះបីជាពួកគាត់បានស្វះស្វែងរកការអន្តរាគមន៍ពីអាជ្ញាធរមូលដ្ឋានដល់ថ្នាក់ខេត្ត ហើយផ្ទុយទៅវិញ រូបលោក ក៏ដូចជាតំណាងពលរដ្ឋមួយចំនួន បែរជារងបណ្ដឹងនៅតុលាការថែមទៀត។
ករណីនេះ លោកបានស្នើដល់ក្រសួងយុត្តិធម៌ជួយអន្តរាគមន៍ទៅសាលាដំបូងខេត្តកោះកុង ឱ្យទម្លាក់ចោលបទចោទប្រកាន់ទៅលើតំណាងពលរដ្ឋ និងជំរុញឱ្យមានដំណោះស្រាយរឿងដីធ្លី។
លោកថា៖ «បាត់បង់ដីធ្លីហើយ រងការចោទប្រកាន់នៅតុលាការទៀត ខ្ញុំថាមានភាពអយុត្តិធម៌បំផុត អយុត្តិធម៌បំផុត! អ៊ីចឹងហើយបានសហគមន៍ទាំងអស់នាំគ្នាមកហ្នឹង [ក្រសួងយុត្តិធម៌] […] ខ្ញុំសង្ឃឹមថាក្រសួងយុត្តិធម៌នឹងផ្ដល់ភាពយុត្តិធម៌ដល់សហគមន៍ដែលរងគ្រោះនៅខេត្តកោះកុងទាំងមូល»។
បើតាមតំណាងពលរដ្ឋរូបនេះ ក្រៅពីក្រសួងយុត្តិធម៌ ពួកគាត់ក៏នឹងយកញត្តិទៅដាក់នៅខុទ្ទកាល័យនាយករដ្ឋមន្ត្រី និងក្រសួងស្ថាប័នពាក់ព័ន្ធមួយចំនួនទៀតផងដែរ។
វីអូឌី នៅមិនទាន់អាចសុំការបញ្ជាក់ជុំវិញករណីនេះពីអ្នកនាំពាក្យក្រសួងយុត្តិធម៌ លោក ជិន ម៉ាលីន បាននៅឡើយទេ។
អ្នកសម្របសម្រួលសហគមន៍នៅសមាគមសម្ព័ន្ធសហគមន៍កសិករកម្ពុជា លោក ញ៉ិល ភាព ដែលឃ្លាំមើលការប្រមូលផ្តុំនេះ មានប្រសាសន៍ថា ប្រជាពលរដ្ឋទាំងនោះមកពីជិត១០សហគមន៍ ក្នុងខេត្តកោះកុង ដែលមានជម្លោះដីធ្លីជាមួយក្រុមហ៊ុនរបស់លោកឧកញ៉ា លី យ៉ុងផាត់, ក្រុមហ៊ុនហេងហ៊ុយអភិវឌ្ឍន៍ និងក្រុមហ៊ុនចិនយូញៀន ខណៈពលរដ្ឋខេត្តកំពង់ស្ពឺ ដែលមានបញ្ហាវិវាទដីធ្លីដូចគ្នាដែរនេះ មិនអាចឡើងមកចូលរួមដាក់ញត្តិបាន ដោយសារមានការរារាំងពីសំណាក់អាជ្ញាធរ។
លោកសង្កេតឃើញថា សកម្មភាពប្រមូលផ្តុំតវ៉ា និងដាក់ញត្តិរបស់ពលរដ្ឋធ្វើឡើងស្របតាមច្បាប់ និងបទដ្ឋានគតិយុត្តជាតិនិងអន្តរជាតិ ជាពិសេសច្បាប់ធម្មនុញ្ញនៃព្រះរាជាណាចក្រកម្ពុជា ដើម្បីឱ្យមានដំណោះស្រាយរឿងដីធ្លីសម្រាប់ពួកគាត់ ក៏ដូចជាស្នើឱ្យមានការទម្លាក់ចោលនូវបទចោទនានាទៅលើពួកគាត់។ ករណីនេះ លោកថា អាជ្ញាធរគួរតែរកមធ្យោបាយសម្របសម្រួល ដើម្បីរកដំណោះស្រាយដើម្បីបញ្ចប់វិវាទដីធ្លីឱ្យបានឆាប់ ជាជាងធ្វើការហាមឃាត់ ឬចោទប្រកាន់ ឬចាប់ខ្លួនពលរដ្ឋដែលរងគ្រោះទាំងនោះ។
លោកថា៖ «ពួកគាត់គឺជាប្រជាពលរដ្ឋ ជាផ្នែកមួយនៃរដ្ឋ ហើយពួកគាត់មានបញ្ហាដីធ្លី ដូច្នេះបញ្ហាហ្នឹង អ្នកដែលទទួលបន្ទុកដោះស្រាយហ្នឹងគឺរាជរដ្ឋាភិបាលហ្នឹងឯង។ អ៊ីចឹងអត់អាចគេចវេះបានទេក្នុងការដោះស្រាយនេះ។ អ្វីដែលជាយន្តការល្អបំផុត គឺត្រូវតែសម្របសម្រួលឱ្យមានការដោះស្រាយណាមួយដែលមានភាពយុត្តិធម៌ត្រឹមត្រូវតាមទំហំដី តាមភាពជាក់ស្តែងដែលគាត់បាត់បង់ អាហ្នឹងបានបញ្ហាវិវាទហ្នឹងត្រូវបានបញ្ចប់»៕