រដ្ឋមន្រ្តីក្រសួងការបរទេសអង់គ្លេស លោកស្រី លីស ត្រាស់ (Liz Truss) នឹងឡើងកាន់តំណែងជានាយករដ្ឋមន្ត្រីអង់គ្លេស ជំនួសលោក បូរីស ចនសុន (Boris Johnson) នៅថ្ងៃអង្គារនេះ ក្រោយពីលោកស្រីជាប់ឆ្នោត។
តាមការចេញផ្សាយរបស់ទីភ្នាក់ងារសារព័ត៌មាន Reuters នៅថ្ងៃទី០៦ ខែកញ្ញានេះ ឱ្យដឹងថា លោកស្រី លីស ត្រាស់ (Liz Truss) បានយកឈ្នះគូប្រជែងរបស់លោកស្រី គឺលោក រីស៊ី ស៊ុនណាក់ (Rishi Sunak) ក្នុងការបោះឆ្នោតរបស់សមាជិកគណបក្សអភិរក្សនិយម សម្រាប់ជ្រើសរើសអ្នកដឹកនាំគណបក្ស។ លោកស្រីសន្យាថានឹងកាត់បន្ថយពន្ធ និងផ្គត់ផ្គង់ផ្នែកថាមពលដល់ប្រជាពលរដ្ឋ។
លោកស្រី លីស ត្រាស់ (Liz Truss) បាននិយាយថា៖ «សូមអរគុណចំពោះការជឿទុកចិត្តរបស់អ្នកមកលើខ្ញុំ ដើម្បីដឹកនាំប្រទេសដ៏អស្ចារ្យរបស់យើង»។
លោកស្រីបន្ថែមថា៖ «ខ្ញុំនឹងចាត់វិធានការយ៉ាងម៉ឺងម៉ាត់ ដើម្បីនាំយើងទាំងអស់គ្នាឆ្លងកាត់ពេលវេលាដ៏លំបាកនេះ ធ្វើឱ្យសេដ្ឋកិច្ចរបស់យើងរីកចម្រើន និងបង្ហាញសក្តានុពលរបស់អង់គ្លេស»។
លោកស្រីនឹងស្នងតំណែងលោក បូរីស ចនសុន (Boris Johnson) ដែលបានលាលែងពីតំណែងកាលពីខែកក្កដា បន្ទាប់ពីមន្រ្តីនានាបាននាំគ្នាលាលែងពីតំណែងជាបន្តបន្ទាប់ ដោយសារតែពួកគេអស់ជំនឿលើការដឹកនាំរបស់លោក។
គួរបញ្ជាក់ថា លោកស្រី លីស ត្រាស់ (Liz Truss) នឹងក្លាយជានាយករដ្ឋមន្ត្រីទី៤ ដែលមកពីគណបក្សអភិរក្សនិយម ក្នុងរយៈពេល៧ឆ្នាំ៕
