ប្រធានាធិបតីរុស្ស៊ី លោក វ្លាឌីមៀរ ពូទីន (Vladimir Putin) បានសាទរចំពោះទំនាក់ទំនងជាវិជ្ជមានជាមួយប្រទេសមីយ៉ាន់ម៉ា នៅថ្ងៃទី៧ ខែកញ្ញា ឆ្នាំ២០២២នេះ ខណៈលោកបានជួបជាមួយប្រមុខយោធារបស់ប្រទេសនេះ គឺលោក មីន អ៊ុងឡាំង (Min Aung Hlaing) នៅទីក្រុងវ្លាឌីវូស្តុក (Vladivostok) ភាគខាងកើតរុស្ស៊ី។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន CNA។
លោក ពូទីន បាននិយាយក្នុងអំឡុងពេលកិច្ចប្រជុំនៅខាងក្រៅវេទិកាសេដ្ឋកិច្ចបូព៌ាថា៖ «មីយ៉ាន់ម៉ា គឺជាដៃគូដ៏យូរអង្វែង និងគួរឱ្យទុកចិត្តរបស់យើងនៅក្នុងតំបន់អាស៊ីអាគ្នេយ៍ […] ទំនាក់ទំនងរបស់យើងកំពុងមានភាពវិជ្ជមាន»។
ដំណើរទស្សនកិច្ចរបស់លោក មីន អ៊ុងឡាំង (Min Aung Hlaing) ធ្វើឡើង ខណៈរដ្ឋាភិបាលប្រទេសទាំង២ប្រឈមមុខនឹងភាពឯកោខាងការទូត ក្នុងនោះ ទីក្រុងម៉ូស្គូប្រឈមនឹងភាពឯកា ដោយសារតែប្រើប្រាស់កម្លាំងយោធាឈ្លានពានទៅលើប្រទេសអ៊ុយក្រែន កាលពីខែកុម្ភៈ ហើយទីក្រុងណៃពិដោ (Naypyidaw) ប្រឈមនឹងភាពឯកោ ដោយសាររដ្ឋប្រហារយោធាកាលពីឆ្នាំមុន។
ខណៈទំនាក់ទំនងរវាងទីក្រុងម៉ូស្គូជាមួយប្រទេសលោកខាងលិច បានរង្គោះរង្គើដោយសារការប្រើកម្លាំងយោធារបស់ខ្លួនទៅឈ្លានពានប្រទេសអ៊ុយក្រែន ហើយវិមានក្រឹមឡាំងកំពុងតម្រង់ឆ្ពោះទៅមជ្ឈិមបូព៌ា អាស៊ី និងអាហ្វ្រិក។
លោក មីន អ៊ុងឡាំង (Min Aung Hlaing) បានប្រាប់លោក ពូទីន ថា៖ «ខ្ញុំមានមោទកភាពចំពោះអ្នក ពីព្រោះនៅពេលដែលអ្នកឡើងកាន់អំណាច រុស្សីបានឈរលំដាប់ថ្នាក់លេខ១លើពិភពលោក»។
លោកបន្តថា៖ «អ្នកមិនគ្រាន់តែជាមេដឹកនាំរុស្ស៊ីប៉ុណ្ណោះទេ ប៉ុន្តែជាមេដឹកនាំពិភពលោក ដោយសារតែអ្នកគ្រប់គ្រងនិងរៀបចំស្ថិរភាពនៅជុំវិញពិភពលោកទាំងមូល»។
របបយោធាមីយ៉ាន់ម៉ា បាននិយាយនៅក្នុងសេចក្តីថ្លែងការណ៍មួយថា មេដឹកនាំទាំង២ បានពិភាក្សា [ប្រកបដោយមិត្តភាព និងបើកចំហ] អំពីកិច្ចសហប្រតិបត្តិការ និង «ផ្លាស់ប្តូរទស្សនៈស្តីពីទំនាក់ទំនង និងស្ថានភាពអន្តរជាតិ»។
ចាប់តាំងពីធ្វើរដ្ឋប្រហារទម្លាក់រដ្ឋាភិបាលស៊ីវិលរបស់លោកស្រី អ៊ុងសាន ស៊ូជី (Aung San Suu Kyi) កាលពីខែកុម្ភៈ ឆ្នាំមុន មីយ៉ាន់ម៉ាបានប្រឈមមុខនឹងការដាក់ទណ្ឌកម្មរបស់ប្រទេសលោកខាងលិច។
ប្រទេសមីយ៉ាន់ម៉ាបានស្ថិតក្នុងភាពច្របូកច្របល់ ហើយសេដ្ឋកិច្ចរបស់ខ្លួនត្រូវបានរាំងស្ទះចាប់តាំងពីមានរដ្ឋប្រហារយោធា។
រុស្ស៊ី និងចិន ដែលជាសម្ពន្ធមិត្តរបស់ខ្លួនត្រូវបានចោទប្រកាន់ថាបានផ្តល់អាវុធដល់របបយោធាមីយ៉ាន់ម៉ា ដើម្បីវាយប្រហារជនស៊ីវិល។
យោងតាមអ្នកឃ្លាំមើលក្នុងតំបន់ បានឱ្យដឹងថា មនុស្សប្រមាណ២ ២០០នាក់ត្រូវបានសម្លាប់ក្នុងការបង្ក្រាប។
ក្នុងអំឡុងពេលធ្វើដំណើរទៅកាន់ទីក្រុងណៃពិដោ (Naypyidaw) នៅដើមខែសីហា រដ្ឋមន្ត្រីការបរទេសរុស្ស៊ី លោក ស៊ែហ្គេ ឡាវរ៉ូវ (Sergei Lavrov) បានគាំទ្រដល់កិច្ចខិតខំប្រឹងប្រែងរបស់របបយោធាមីយ៉ាន់ម៉ា ក្នុងការរក្សាស្ថិរភាពក្នុងប្រទេស និងរៀបចំការបោះឆ្នោតជាតិនៅឆ្នាំក្រោយ។
ទោះយ៉ាងណា រដ្ឋមន្ត្រីការបរទេសអាមេរិក លោក អែនតូនី ប្លីងខិន (Antony J. Blinken) បានប្រាប់ឱ្យសហគមន៍អន្តរជាតិបដិសេធចំពោះ «ការបោះឆ្នោតក្លែងក្លាយ» របស់របបយោធាមីយ៉ាន់ម៉ា៕
