ក្រុមយុវជនប្រមាណ១០០នាក់ គ្រោងជួបជុំគ្នានៅមុខក្រសួងមហាផ្ទៃ នៅដើមសប្ដាហ៍ក្រោយ ដើម្បីទាមទារឱ្យក្រសួងបញ្ឈប់ការផ្ដល់បណ្ណស្នាក់នៅអចិន្ត្រៃយ៍ ការផ្តល់សិទ្ធិពេញលេញដល់ជនបរទេសក្នុងការប្រកបអាជីវកម្មនៅកម្ពុជា និងទាមទារឱ្យក្រសួងអប់រំ យុវជន និងកីឡា លុបចោលការបង្កើតអាគារសិក្សាភាសាវៀតណាមនៅសាកលវិទ្យាល័យភូមិន្ទភ្នំពេញ។
យុវជនមកពីខេត្តសៀមរាប លោក ថេល ធីលែន បានលើកឡើងថា ពួកគាត់បានយកញត្តិដាក់នៅរដ្ឋបាលរាជធានីភ្នំពេញ និងអង្គការសង្គមស៊ីវិលជាតិ និងអង្គការសហប្រជាជាតិ នៅរសៀលថ្ងៃទី៦ ខែកញ្ញា។
លោកបន្តថា ក្រុមយុវជនដាក់ញត្តិទៅរដ្ឋបាលរាជធានីភ្នំពេញ ដើម្បីជូនដំណឹង និងសុំការអនុញ្ញាតឱ្យពួកគាត់ចំនួន១០០នាក់ប្រមូលផ្ដុំគ្នាធ្វើកូដកម្ម ឬបាតុកម្មដោយអហិង្សានៅមុខក្រសួងមហាផ្ទៃ នៅថ្ងៃទី១២ ខែកញ្ញា ឆ្នាំ២០២២នេះ ដើម្បីទាមទារក្រសួងបញ្ឈប់ការផ្តល់បណ្ណស្នាក់នៅអចិន្ត្រៃយ៍ ការផ្តល់សិទ្ធិពេញលេញដល់ជនបរទេស ជាពិសេសជនជាតិវៀតណាម ក្នុងការប្រកបអាជីវកម្មនៅកម្ពុជា និងទាមទារឱ្យក្រសួងអប់រំ យុវជន និងកីឡា លុបចោលការបង្កើតអាគារសិក្សាភាសាវៀតណាមនៅសាកលវិទ្យាល័យភូមិន្ទភ្នំពេញ ដោយពួកគេលើកហេតុផលថា កុំឱ្យប៉ះពាល់ដល់ឧត្ដមប្រយោជន៍កម្ពុជា។
លោកបន្តថា ចំណែកញត្តិពីរផ្សេងទៀតដាក់ទៅអង្គការការពារសិទ្ធិមនុស្សលីកាដូ និងការិយាល័យឧត្តមស្នងការនៃអង្គការសហប្រជាជាតិប្រចាំនៅកម្ពុជា ដើម្បីស្នើសុំឱ្យមន្ត្រីសិទ្ធិមនុស្សជួយតាមដាន និងឃ្លាំមើលការជួបជុំរបស់ក្រុមយុវជន នៅមុខក្រសួងមហាផ្ទៃ នៅដើមសប្តាហ៍ក្រោយនោះផងដែរ។
លោក ថេល ធីលែន ឱ្យដឹងទៀតថា មន្ត្រីនៅរដ្ឋបាលរាជធានីភ្នំពេញ បានទទួលយកលិខិតស្នើសុំធ្វើកូដកម្មរបស់ពួកគាត់រួចហើយ ដោយមន្ត្រីនោះអះអាងថានឹងយកដាក់ជូនថ្នាក់ដឹកនាំពិនិត្យនិងសម្រេចនៅពេលក្រោយ ខណៈមន្ត្រីសង្គមស៊ីវិលអះអាងថានឹងតាមឃ្លាំមើលការជួបជុំនោះ។
យ៉ាងណា លោកថា បើសាលារាជធានីភ្នំពេញមិនអនុញ្ញាតឱ្យពួកគាត់ជួបជុំគ្នាធ្វើកូដកម្មក៏ដោយ ក៏ពួកគាត់នៅតែបន្តធ្វើដោយមិនបារម្ភពីសុវត្ថិភាពនោះទេ ពីព្រោះដើម្បីការពារឧត្តមប្រយោជន៍ជាតិ សម្រាប់កូនចៅជំនាន់ក្រោយទៀត។
លោកមានប្រសាសន៍ថា៖ «គេឆ្លើយតបឬមិនឆ្លើយតបជារឿងរបស់គេ តែគេឆ្លើយតបវិជ្ជមានឬអវិជ្ជមាន យើងនឹងនៅតែប្រមូលផ្តុំ។ ហើយពាក់ព័ន្ធដែលគេនិយាយថាយើងបំផ្លាញសណ្តាប់ធ្នាប់អី ខ្ញុំសុំច្រានចោលបង្ការទុកជាមុន ព្រោះយើងធ្វើតាមផ្លូវច្បាប់ តាមនីតិវិធីហើយ ពាក់ព័ន្ធនឹងការផ្សព្វផ្សាយនានាតាមបណ្ដាញសង្គមផង និងយើងយកញត្តិដាក់ស្នើសុំដោយសន្តិវិធីផង តែបើការបដិសេធឬច្រានចោលនូវសិទ្ធិរបស់ប្រជាពលរដ្ឋកម្ពុជាដែលរស់នៅក្នុងរបបលទ្ធិប្រជាធិបតេយ្យ និងមិនទទួលយកនូវសិទ្ធិបញ្ចេញមតិរបស់ពួកយើង»។
បើតាមលោក ថេល ធីលែន ក្រោយពីគាត់ចេញតវ៉ាស្នើទៅរដ្ឋាភិបាល និងស្ថាប័នពាក់ព័ន្ធឱ្យលុបចោលការបង្កើតអាគារសិក្សាភាសាវៀតណាមនៅសាកលវិទ្យាល័យភូមិន្ទភ្នំពេញ ស្រាប់តែអធិការក្រុងសៀមរាបទៅសួររកសៀវភៅស្នាក់នៅនិងប្រវត្តិរូបគាត់ថែមទៀត ដែលធ្វើឱ្យគ្រួសារគាត់មានការភ័យខ្លាចពីសុវត្ថិភាពគាត់ជាដើម។
តំណាងយុវជនម្នាក់ទៀត លោក អន រតនា ដែលអះអាងថា ធ្វើដំណើរមកពីខេត្តសៀមរាបដែរនោះ បានថ្លែងប្រាប់អ្នកសារព័ត៌មានក្រោយដាក់ញត្តិថា បច្ចុប្បន្ននេះ ជនអន្តោប្រវេសន្តវៀតណាមមានច្រើននៅក្នុងទឹកដីកម្ពុជា។ ករណីនេះ លោកបារម្ភថា នៅថ្ងៃអនាគត បើកម្ពុជានៅតែផ្តល់បណ្ណស្នាក់នៅអចិន្ត្រៃយ៍ និងការផ្តល់សិទ្ធិពេញលេញដល់ជនជាតិវៀតណាមក្នុងការប្រកបអាជីវកម្មនៅកម្ពុជា រួមទាំងបង្កើតអាគារសិក្សាភាសាវៀតណាមនៅសាកលវិទ្យាល័យភូមិន្ទភ្នំពេញ នឹងធ្វើឱ្យប៉ះពាល់ដល់ឧត្តមប្រយោជន៍របស់កម្ពុជា ដោយសារតាមប្រវត្តិសាស្ត្រ វៀតណាមតែងតែមានមហិច្ឆតាឈ្លានពានកម្ពុជា។
លោកថា៖ «អ្វីដែលយើងកំពុងតែជួបបញ្ហាប្រឈមច្រើន គឺការជ្រៀតចូលនិគមជនវៀតណាម និងភាសាវៀតណាមនេះតែម្តង។ អ៊ីចឹងហើយខ្ញុំសូមសំណូមពរដល់ប្រជាពលរដ្ឋខ្មែរទាំងអស់ ត្រូវបង្កើតនូវភាពឈឺចាប់ខ្លួនឯង ហើយឱ្យយល់ដឹងខ្លួនឯងជាអ្នកណា ឱ្យដឹងថាខ្លួនឯងទឹកកំពុងដល់ជម្រៅណាហើយ ដែលយើងកំពុងជួបប្រទះរាល់ថ្ងៃនេះ។ បើទោះបីជាបងប្អូនខ្លះមិនទាន់ជួបប្រទះ ប៉ុន្តែខ្ញុំដើររាល់ថ្ងៃ ខ្ញុំដឹងថាមានការប៉ះទង្គិចច្រើនដល់ប្រជាពលរដ្ឋ អ៊ីចឹងហើយសូមឱ្យបងប្អូនយើងជាខ្មែរទាំងអស់គ្នា ជួយងើបឈរ ជួយចូលរួមនូវបាតុកម្មអហិង្សានេះ នៅថ្ងៃទី១២ ខែកញ្ញា ឆ្នាំ២០២២»។
អភិបាលរងរាជធានីភ្នំពេញ លោក កើត ឆែ មានប្រសាសន៍ថា ក្រុមការងារបស់លោកបានទទួលញត្តិរបស់ក្រុមយុវជនទាំងអស់នោះហើយ ប៉ុន្តែលោកថានឹងកោះហៅក្រុមយុវជនទាំងនោះមកជជែកគ្នាបន្ថែម ជុំវិញសំណើសុំធ្វើការជួបជុំគ្នានោះ។
លោកមានប្រសាសន៍ថា៖ «សំណើរបស់គាត់មិនច្បាស់លាស់ ដោយសារគាត់អត់ទាន់មានគ្នាផង អ៊ីចឹងយើងនឹងអញ្ជើញគាត់មក[ពិភាក្សា]អំពីបែបបទ និងនីតិវិធី។ អ៊ីចឹងយើងមើលទៅថ្ងៃនេះ ទើបតែថ្ងៃទី៦ទេ យើងនឹងអញ្ជើញគាត់មកពិភាក្សាអំពីនីតិវិធីនៃការធ្វើ»។
នាយកទទួលបន្ទុកកិច្ចការទូទៅ នៃអង្គការសិទ្ធិមនុស្សលីកាដូ លោក អំ សំអាត មានប្រសាសន៍ថា ក្រុមយុវជនដែលដាក់ញត្តិទៅសាលារាជធានីភ្នំពេញ ស្នើសុំជួបជុំដោយសន្តិវិធី គឺពួកគេធ្វើឡើងស្របតាមច្បាប់ដែលបានចែង។ ករណីនេះ លោកថា សាលារាជធានីភ្នំពេញគួរតែយកសំណើរបស់ក្រុមយុវជនទាំងនោះទៅពិនិត្យ និងសម្រេចអនុញ្ញាតឱ្យពួកគាត់បានជួបជុំដោយសន្តិវិធី ដើម្បីបញ្ចៀសការប៉ះទង្គិចណាមួយជាយថាហេតុ។
លោកមានប្រសាសន៍ថា៖ «ស្ថាប័នពាក់ព័ន្ធគួរតែមានការអនុញ្ញាត ហើយការសម្របសម្រួលណាមួយ ដើម្បីបញ្ចៀសនូវបាតុភាពប៉ះទង្គិច ឬមួយអំពើហិង្សា។ ទី២ កុំឱ្យមានការរិះគន់ថាមានការរឹតត្បិតសេរីភាព និងការជួបជុំ ការប្រមូលផ្តុំដោយសន្តិវិធី។ វាត្រូវតែមានដំណោះស្រាយ និងការចរចាមួយដែលអាចប្រព្រឹត្តទៅដោយសន្តិវិធី»។
កាលពីចុងខែសីហា ឆ្នាំ២០២២នេះ ក្រុមយុវជនទាំងនេះក៏ធ្លាប់បានដាក់ញត្តិទៅក្រសួងអប់រំ និងសាកលវិទ្យាល័យភូមិន្ទភ្នំពេញដែរ ដែលក្នុងញត្តិនោះមានខ្លឹមសារថា វៀតណាមជាប្រជាជាតិមួយដែលកម្ពុជាគួរតែមានការប្រុងប្រយ័ត្ន ចំពោះចំណងមិត្តភាព និងទំនាក់ទំនងផ្សេងៗ ដោយសារតាមប្រវត្តិសាស្ត្រតាំងពីបុរាណកាលមកដល់បច្ចុប្បន្ននេះ វៀតណាមមិនដែលបោះបង់មហិច្ឆតាឈ្លានពានកម្ពុជានោះឡើយ ជាក់ស្តែងការបាត់បង់ធនធាន និងទឹកដីទ្រព្យសម្បតិ្តជាតិជាច្រើន ដូចជា ទឹកដីកម្ពុជាក្រោម និងកោះត្រល់ ជាដើម។
ខ្លឹមសារក្នុងញត្តិដដែលនោះឱ្យដឹងទៀតថា ភាសាវៀតណាមមិនមែនជាតម្រូវការចាំបាច់ និងផ្ដល់អត្ថប្រយោជន៍ខ្លាំងនោះទេ បើធៀបនឹងអាគារសិក្សាភាសានានា។ ផ្ទុយទៅវិញ វាអាចផ្តល់ជាហានិភ័យខ្ពស់ចំពោះការជ្រៀតចូលរបស់ភាសាវៀតណាមនៅគ្រឹះស្ថានស្ថាប័ន ហើយការបង្កើតនេះគ្រាន់តែដើម្បីបំពេញតម្រូវការរបស់ភាគីវៀតណាមប៉ុណ្ណោះ។ ញត្តិដដែលបន្ថែមថា ការបង្កើតថ្នាក់ភាសាវៀតណាមនៅកម្ពុជានេះក៏គ្មានតុល្យភាពនិងសមរម្យចំពោះកិច្ចការងារការទូត ព្រោះភាគីវៀតណាមមិនបានផ្តល់សិទ្ធិពេញលេញដល់ការសិក្សាភាសាខ្មែរនៅប្រទេសវៀតណាមឡើយ ជាពិសេសប្រជាពលរដ្ឋខ្មែរដែលរស់នៅលើទឹកដីកម្ពុជាក្រោម គ្មានសិទ្ធិទទួលបានការសិក្សាអក្សរនិងភាសាខ្មែរស្របច្បាប់។
ញត្តិនោះបន្តទៀតថា ការបង្កើតអាគារសិក្សាភាសាវៀតណាមនេះអាចជាហានិភ័យនៃការឈានទៅរកការគ្រប់គ្រងដោយមនោគមវិជ្ជា និងចិត្តសាស្ត្រដោយប្រយោលមកលើកម្ពុជា បន្ទាប់ពីក្រុមយុវជនទាំងនោះសង្កេតឃើញទំនាក់ទំនងមិនប្រក្រតីមួយចំនួន ដូចជា ការផ្តល់ដី៤០ហិកតាដល់ជនជាតិវៀតណាមសង់លំនៅឋាន ស្របពេលដែលពលរដ្ឋកម្ពុជាជាម្ចាស់ស្រុកកំពុងរងវិបត្តិជម្លោះដីធ្លីច្រើនជាង៤០ ០០០ករណី និងការផ្តល់ដីតាមបណ្តោយព្រំដែនកម្ពុជា-វៀតណាម ក្រោមរូបភាពសម្បទាន និងបង្កើតជាតំបន់ត្រីកោណអភិវឌ្ឍន៍ (ឡាវ-កម្ពុជា-វៀតណាម) ដោយភាគីវៀតណាមជាអ្នកគ្រប់គ្រង និងទទួលបានផលប្រយោជន៍៕
