មន្រ្តីបក្សភ្លើងទៀនប្រចាំនៅរាជធានីភ្នំពេញមួយរូប ដែលត្រូវក្រុមជនមិនស្គាល់មុខបិទផ្លូវដេញតាមវាយក្បាលយ៉ាងដំណំកាលពីជិត២ខែមុន ទាមទារជាថ្មីឱ្យរដ្ឋាភិបាលបំពេញតួនាទីរបស់ខ្លួន ដោយវែកមុខជនដៃដល់មកផ្ដន្ទាទោសតាមច្បាប់ ខណៈតម្រុយយុត្តិធម៌សម្រាប់មន្ត្រីបក្សប្រឆាំងរូបនេះនៅមិនទាន់លាតត្រដាងនៅឡើយ។
ការទាមទារនេះធ្វើឡើងស្របពេលមន្ត្រីបក្សប្រឆាំងរូបនេះ អះអាងថា សំណុំរឿងហិង្សារបស់លោកនៅតែគ្មានការវិវត្តជាវិជ្ជមាន បើទោះអាជ្ញាធរអះអាងពីការស៊ើបអង្កេត បន្ទាប់ពីក្រុមជនដៃដល់ចំនួន៦នាក់និងគូកនចាំបិទផ្លូវជាច្រើននាក់ទៀត បាននាំគ្នាជិះម៉ូតូតាមវាយលោកបណ្ដាលឱ្យរងរបួសធ្ងន់ធ្ងរផ្នែកក្បាល កញ្ចឹងក និងខ្លួន ស្ថិតនៅភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ កាលពីព្រឹកថ្ងៃទី១៧ ខែកក្កដា ឆ្នាំ២០២២។
អនុប្រធានគណបក្សភ្លើងទៀនប្រចាំខណ្ឌពោធិ៍សែនជ័យ រាជធានីភ្នំពេញ លោក លន់ ពង្សធិរិទ្ធ ថ្លែងថា តាំងពីរងអំពើហិង្សាយ៉ាងដំណំមក លោកមិនដែលហ៊ានចេញទៅខាងក្រៅផ្ទះទេ ដោយមានក្ដីបារម្ភពីសុវត្ថិភាពផ្ទាល់ខ្លួន ខណៈសមត្ថកិច្ចនៅមិនទាន់ចាប់បានជនដៃដល់យកមកផ្តន្ទាទោសនៅឡើយ។
លោកថា ៥១ថ្ងៃហើយដែលលោកត្រូវបានគេប្រើហិង្សា ខណៈអាជ្ញាធរមិនដែលបានជូនដំណឹងពីការវិវត្តសំណុំរឿងនេះដល់លោកជាជនរងគ្រោះទាល់តែសោះ។
លោក លន់ ពង្សធិរិទ្ធ ថា៖ «សម្រាប់ខ្ញុំដែលជាជនរងគ្រោះផ្នែកនយោបាយ ជាមនុស្សរបស់គណបក្សភ្លើងទៀន ខ្ញុំមានការខកចិត្តយ៉ាងខ្លាំងដែលអាជ្ញាធរ មកដល់ថ្ងៃនេះ ដល់ទៅ៥០ថ្ងៃទៅហើយ មិនទាន់វែកមុខជនដៃដល់មកឱ្យខ្ញុំដឹងថាជនដៃដល់នោះនៅទីណា ហើយគាត់ជាស្អីៗយ៉ាងណានោះ! ខ្ញុំមានការខកចិត្តជាខ្លាំង»។
លោកបន្ថែមថា រយៈកាលថ្មីៗនេះ លោកមានអាការឈឺក្បាលចម្លែកជាញឹកញាប់ ដែលលោកជឿថា នេះបណ្តាលមកពីរងការវាយក្បាលកាលពីជិត២ខែកន្លងទៅ ខណៈមិនមានថវិកាគ្រប់គ្រាន់ទៅរកពេទ្យ។ លោកថា លោកអាចប្រេះលលាដ៍ក្បាល និងដាច់សរសៃឈាមច្រើនដែលមិនអាចបញ្ជូនឈាមទៅចិញ្ចឹមខួរក្បាលគ្រប់គ្រាន់។
លោក លន់ ពង្សធិរិទ្ធ បន្តថា៖ «ខ្ញុំចង់ឱ្យលោកសមត្ថកិច្ចវែកមុខជនដៃដល់ដែលប្រព្រឹត្តល្មើសមកលើរូបខ្ញុំបាទហ្នឹង ឱ្យឃើញឆាប់ជាទីបំផុត។ ទីមួយ គឺខ្ញុំបានអស់ចិត្ត ខ្ញុំបានបំពេញការងារនយោបាយរបស់ខ្ញុំសម្រាប់គណបក្សភ្លើងទៀនឱ្យពេញដៃពេញជើង។ ហើយទីពីរ គឺជាទំនុកចិត្តរបស់ក្រុមគ្រួសាររបស់ខ្ញុំ ជាពិសេសភរិយា និងកូនរបស់ខ្ញុំ មានការកក់ក្តៅនៅពេលដែលខ្ញុំទៅបំពេញបេសកកម្ម ឬក៏ធ្វើកិច្ចការនយោបាយនៅខាងក្រៅផ្ទះ ហើយខ្ញុំមានសុវត្ថិភាព»។
អនុប្រធានគណបក្សភ្លើងទៀនប្រចាំខណ្ឌពោធិ៍សែនជ័យរូបនេះថា លោកមិនបានចេញប្រកបរបរអ្វីឡើយតាំងពីរងហិង្សាមក ខណៈភរិយាលោកជាអ្នកទទួលបន្ទុកគ្រួសារស្ទើរទាំងស្រុង ដែលនេះធ្វើឱ្យជីវភាពកាន់តែលំបាក ស្របពេលទន្ទឹងរង់ចាំយុត្តិធម៌។
ប្រធានគណបក្សភ្លើងទៀនខណ្ឌពោធិ៍សែនជ័យ រាជធានីភ្នំពេញ លោក ខឹម ចាន់វណ្ណៈ លើកឡើងថា លោកទទួលព័ត៌មានថា សំណុំរឿងរបស់សហការីលោកត្រូវបានសមត្ថកិច្ចបបញ្ជូនទៅថ្នាក់លើហើយ ប៉ុន្តែដំណោះស្រាយយ៉ាងណានោះនៅតែគ្មានតម្រុយ។
លោកកត់សម្គាល់ឃើញថា រាល់បញ្ហាដែលកើតឡើងលើមន្ត្រីបក្សប្រឆាំង ចំណាត់ការរកដំណោះស្រាយឱ្យបានម៉ឺងម៉ាត់របស់សមត្ថកិច្ច គឺមិនមានទេ ពោលគឺផ្ទុយគ្នាស្រឡះបើធៀបនឹងរឿងរ៉ាវដែលកើតលើមន្ត្រីបក្សប្រជាជន។ លោកថា រឿងនេះធ្វើឱ្យពលរដ្ឋជាជនរងគ្រោះមានការភ័យខ្លាំង បារម្ភពីសុវត្ថិភាពរបស់ខ្លួននៅក្នុងសង្គមនេះ។
លោក ខឹម ចាន់វណ្ណៈ ថា៖ «ខ្ញុំចង់ឃើញថា អាជ្ញាធររបស់រដ្ឋាភិបាលហ្នឹងមានចំណាត់ការទៅលើជនល្មើស ឬក៏ជនដៃដល់ដែលបានប្រព្រឹត្តនិងប្រើអំពើហិង្សាមកលើសកម្មជន ក៏ដូចជាសមាជិករបស់គណបក្សប្រឆាំងហ្នឹង។ សូមឱ្យមានការចាប់ខ្លួនយកមកផ្តន្ទាទោសតាមផ្លូវច្បាប់ បើពុំនោះទេ វាមានការចោទប្រកាន់ទៅថ្នាក់ដឹកនាំរដ្ឋាភិបាល។ សំណូមពរឱ្យមានជាដំណោះស្រាយ កុំពេលមានរឿង ស្ងាត់ៗអ៊ីចឹងនោះ»។
មេប៉ុស្តិ៍នគរបាលរដ្ឋបាលសង្កាត់ចោមចៅ៣ ខណ្ឌពោធិ៍សែនជ័យ លោក ថេង កុសល អះអាងថាបានបញ្ជូនសំណុំរឿងនេះទៅដល់ព្រហ្មទណ្ឌខណ្ឌពោធិ៍សែនជ័យ ជិតមួយខែមកហើយ ពោលគឺតាំងពីខែសីហា។
លោកថា៖ «យើងកសាងសំណុំរឿងដោយពឹងផ្អែកទៅលើកាមេរ៉ា អ៊ីចឹងថ្នាក់លើក៏គេមើលវាយតម្លៃទៅតាមហ្នឹង ហើយឥលូវគេកំពុងស្រាវជ្រាវហើយប្អូន! ប្រធានផ្នែកព្រហ្មទណ្ឌ [ខណ្ឌពោធិ៍សែនជ័យ] ជាអ្នកទទួល [សំណុំរឿងនេះបន្ត]»។
អធិការខណ្ឌពោធិ៍សែនជ័យ លោក ម៉ន វុធី បញ្ជាក់ថា អាជ្ញាធរខណ្ឌបានបញ្ជូនសំណុំរឿងមន្ត្រីបក្សប្រឆាំងនេះទៅស្នងការដ្ឋាននគរបាលរាជធានីភ្នំពេញហើយ។
លោកថា៖ «ខ្ញុំបានបញ្ជូនទៅអស់ហើយ អ៊ីចឹងការងារហ្នឹងមានអីចង់សួរព័ត៌មាន មានអ្នកនាំពាក្យនៅខាងស្នងការ សួរគាត់ទៅ ព័ត៌មានច្បាស់»។
វីអូឌី មិនអាចសុំការអត្ថាធិប្បាយជុំវិញសំណុំរឿងនេះពីអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា បានទេ នៅថ្ងៃទី៨ ខែកញ្ញានេះ។
នាយកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត យល់ថា ការដោះស្រាយករណីនេះកើតឡើងទៅបានដោយតម្លាភាព វាទាល់តែអាជ្ញាធរមានឆន្ទៈ និងការតាំងចិត្ត ដើម្បីស្វែងរកជនល្មើសមកផ្តន្ទាទោសតាមច្បាប់ ដើម្បីធានាសុខសុវត្ថិភាពដល់ជនរងគ្រោះ។ បើមិនដូច្នេះទេ ជនរងហិង្សានឹងនៅតែមានក្តីបារម្ភថាអាចនឹងត្រូវរងការវាយជាថ្មីទៀត។
លោកថា នៅមានមន្ត្រីបក្សប្រឆាំងជាច្រើនទៀតដែលត្រូវគេវាយក្រោមរូបភាពផ្សេងៗ ហើយរកជនប្រព្រឹត្តមិនឃើញ។
លោកថា រឿងនេះបានបង្កអសន្តិសុខនិងអសុវត្ថិភាពដល់ពលរដ្ឋ ប៉ះពាល់ដល់អាយុជីវិត និងសេដ្ឋកិច្ចគ្រួសារផងដែរ។
លោកថា៖ «ត្រូវតែធានាថា ការស៊ើបអង្កេតនិងការស្រាវជ្រាវហ្នឹង គឺដោយតម្លាភាព ដោយមិនមានការរើសអើងនិន្នាការគណបក្សនយោបាយ។ ហើយបើសិនជាករណីហ្នឹងមិនអាចរកឃើញជនដៃដល់ទេ នឹងត្រូវរងការរិះគន់ច្រើនទាក់ទងនឹងបញ្ហា គេអាចនឹងចោទប្រកាន់ថាជាការរើសអើងនិន្នាការនយោបាយអីជាដើម ហើយវាបង្កឱ្យមាននិទណ្ឌភាពជាដើមនោះ»។
អនុប្រធានគណបក្សភ្លើងទៀនប្រចាំខណ្ឌពោធិ៍សែនជ័យ រាជធានីភ្នំពេញ លោក លន់ ពង្សធិរិទ្ធ កាលពីព្រឹកថ្ងៃទី១៧ ខែកក្កដា ឆ្នាំ២០២២ ត្រូវបានក្រុមជនដៃដល់ចំនួន៦នាក់ និងគូកន បិទផ្លូវ ជិះម៉ូតូតាមវាយ បណ្តាលឱ្យរងរបួសធ្ងន់ធ្ងរផ្នែកក្បាលដេរអស់១២ថ្នេរ ត្រូវកញ្ចឹងក និងខ្លួន នៅភូមិព្រៃជីសាក់ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ក្រោយរងអំពើហិង្សានៅថ្ងៃដដែលនោះ គាត់បានដាក់ពាក្យប្ដឹងទៅប៉ុស្តិ៍រដ្ឋបាលសង្កាត់ចោមចៅទី៣ ដោយភ្ជាប់ជាមួយភស្តុតាងជាវីដេអូជនល្មើសប្រើហិង្សានិងស្លាកលេខម៉ូតូ ដើម្បីជំរុញទៅសមត្ថកិច្ចជួយស្វែងរកចាប់ក្រុមជនដៃដល់មកផ្តន្ទាទោសតាមច្បាប់ ខណៈរឿងនេះ លោកថាកើតចេញពីរឿងនយោបាយ មិនមែនជារឿងឯកជននោះទេ។
កាលពីថ្ងៃទី៧ ខែមេសា ឆ្នាំ២០១៩ លោក លន់ ពង្សធិរិទ្ធ ក៏ធ្លាប់ត្រូវបានក្រុមជនមិនស្គាល់មុខវាយឱ្យរង្គើធ្មេញមុខស្ទើរតែបាក់ចំនួន៥ និងត្រូវចំក្បាលម្តងមកហើយ ស្ថិតនៅម្តុំខណ្ឌពោធិ៍សែនជ័យ រាជធានីភ្នំពេញ ប៉ុន្តែអំពើហិង្សាកាលណោះ លោកមិនបានដាក់ពាក្យប្តឹងទៅសមត្ថកិច្ចនោះឡើយដោយត្រូវភៀសខ្លួនទៅប្រទេសថៃមួយរយៈសិន។
គេសង្កេតឃើញថា រូបភាពហិង្សាខាងនយោបាយនេះបានកើតឡើងក្រោយពីគណបក្សសង្រ្គោះជាតិត្រូវបានរំលាយកាលពីចុងឆ្នាំ២០១៧មក៕