មន្ត្រីជាន់ខ្ពស់គណបក្សខ្មែរស្រឡាញ់ជាតិ បានឱ្យដឹងថា គណបក្សនេះកំពុងប្រឈមនឹងការបាត់ឈ្មោះពីការបោះឆ្នោតជាតិ នាពេលខាងមុខ ដោយសារខ្វះធនធាន និងរចនាសម្ពន្ធមិនស្របតាមលក្ខខណ្ឌច្បាប់ដែលតម្កល់នៅក្រសួងមហាផ្ទៃ ខណៈថ្នាក់ដឹកនាំចំនួន៧នាក់បានប្រកាសលាលែងពីបក្ស ទៅចុះចូលជាមួយគណបក្សកាន់អំណាច។
លោក សៀវ វិសុទ្ធ ហៅកាត់ថា សៀវ សុត សមាជិកគណៈអចិន្ត្រៃយ៍ និងជាអគ្គហេរញ្ញិក ប្រាប់វីអូឌីនៅថ្ងៃព្រហស្បតិ៍នេះថា កន្លងមក លោកបានតស៊ូមតិទៅកាន់ក្រសួងមហាផ្ទៃ ដើម្បីស្នើសុំធ្វើជាប្រធានស្ដីទី ដឹកនាំសមាជគណបក្សដែរ ប៉ុន្តែត្រូវបានក្រសួងបដិសេធ ដោយថា លោកមិនមានកូរ៉ុមគ្រប់គ្រាន់ស្របតាមលក្ខន្តិកៈដែលតម្កល់នៅក្រសួងមហាផ្ទៃនោះទេ។
ករណីនេះ លោកថា គណបក្សខ្មែរស្រឡាញ់ជាតិ នឹងត្រូវលុបឈ្មោះឬយ៉ាងណានោះ អាស្រ័យលើក្រសួងមហាផ្ទៃជាអ្នកសម្រេច ហើយលោកមិនជំទាស់នោះទេ។
លោកមានប្រសាសន៍ថា៖ «គណបក្សខ្មែរស្រឡាញ់ជាតិ សិទ្ធិអំណាចមកនៅត្រឹមគណៈកម្មាធិការអចិន្ត្រៃយ៍ ហើយពួកគាត់បានលាឈប់ចំនួនដែលមិនអាចគ្រប់កូរ៉ុម ដើម្បីដឹកនាំឬជ្រើសរើសបំពេញបន្ថែមបាន នេះជាបញ្ហា។ យើងបានធ្វើកិច្ចការងារនេះរហូតដល់ថ្នាក់ដឹកនាំកំពូល យើងឃើញថាមិនអាចទៅរួច»។
លោកបន្ថែមថា៖ «ក្រសួងមហាផ្ទៃជាអាណាព្យាបាល ជាម៉ែជាឪ ការដែលយើងបានសិទ្ធិធ្វើនយោបាយ ក៏សុំពីក្រសួងទៅ! ការមិនអនុញ្ញាត មិនឱ្យធ្វើសកម្មភាពបន្ត ក៏ចេញពីក្រសួងទៅអ៊ីចឹងដែរ»។
លោក វិសុទ្ធ បញ្ជាក់ថា ការបោះឆ្នោតជ្រើសរើសសមាជិកក្រុមប្រឹក្សាឃុំ-សង្កាត់ អាណត្តិទី៥ កាលពីថ្ងៃទី៥ ខែមិថុនា ឆ្នាំ២០២២ គណបក្សខ្មែរស្រឡាញ់ជាតិ ទទួលបានសំឡេងឆ្នោតគាំទ្រចំនួន ៣៣ ២៥៩សំឡេង។ បើគិតជាអាសនៈ គណបក្សនេះទទួលបានចំនួន៥អាសនៈនៅទូទាំងប្រទេស។
លោក ពៅ ច័ន្ទវាសនា ជំទប់ទី២ ឃុំតាំងក្រាំង ខេត្តកំពង់ចាម មកពីគណបក្សខ្មែរស្រឡាញ់ជាតិ មានប្រសាសន៍ថា ក្រោយពីទទួលបានព័ត៌មាននេះ ធ្វើឱ្យគាត់មានអារម្មណ៍សោកស្ដាយ ប៉ុន្តែលោកនឹងបន្តដំណើរទៅមុខជាមួយសមាជិកដែលនៅសល់។
លោកនិយាយថា៖ «ខ្ញុំក៏មានអារម្មណ៍ខកចិត្តដែរ ព្រោះគាត់ក្នុងនាមគាត់ជាអ្នកតំណាងបានដុតផ្ទះគាត់ផ្ទាល់ ខ្ញុំមានអារម្មណ៍សោកស្តាយ។ យើងបានសង់ផ្ទះផ្ទាល់ខ្លួន ប៉ុន្តែបន្ទាប់មកបានឆេះផ្ទះរបស់យើងផ្ទាល់។ តើ [យើង] នឹងទៅរស់នៅឯណា?»
ទោះជាយ៉ាងណា លោកបញ្ជាក់ថា បើសិនជាគណបក្សខ្មែរស្រឡាញ់ជាតិនឹងត្រូវលុបចេញពីបញ្ជី ឬមានការរំលាយណាមួយនាពេលខាងមុខ ហើយក្រសួងមហាផ្ទៃសម្រេចដកលោកចេញពីតួនាទីជំទប់ទី២នោះ ក៏លោកមិនជំទាស់នោះដែរ។
ក្នុងលិខិតរបស់ក្រសួងមហាផ្ទៃ កាលពីថ្ងៃទី២ ខែកញ្ញា ឆ្នាំ២០២២ បានជម្រាបជូនលោក សៀវ សុត ថាក្រសួងមិនទទួលស្គាល់ការជ្រើសតាំងលោកធ្វើជាប្រធានស្តីទីគណបក្ស និងមិនអនុញ្ញាតឱ្យគណបក្សខ្មែរស្រឡាញ់ជាតិ រៀបចំសមាជវិសាមញ្ញ នៅថ្ងៃទី៤ ខែកញ្ញា ឆ្នាំ២០២២នោះទេ ដោយសារបំពាននឹងលក្ខខណ្ឌកំណត់ក្នុងប្រការ២១, ២៥, ២៦, ២៧, ២៨ និងប្រការ៣១ នៃលក្ខន្តិកៈគណបក្សដែលបានតម្កល់ទុកនៅក្រសួងមហាផ្ទៃ ខណៈសមាជិកគណៈកម្មាធិការអចិន្ត្រៃយ៍ជាស្ថាប័នប្រតិបត្តិ ចាត់ចែង គ្រប់គ្រង និងអនុវត្តរាល់កិច្ចការរបស់គណបក្សចំនួន៧រូប ក្នុងចំណោមសមាសភាព៨រូប បានលាឈប់ពីគណបក្សជាលាយលក្ខណ៍អក្សររួចហើយ។
ប្រធាននាយកដ្ឋានសមាគម និងគណបក្សនយោបាយ នៃក្រសួងមហាផ្ទៃ លោក ឈឹម កាន មានប្រសាសន៍បន្ថែមលើលិខិតនោះថា គណបក្សខ្មែរស្រលាញ់ជាតិ មិនមានសមាជិកគ្រប់គ្រាន់ស្របតាមលក្ខន្តិកៈដែលដាក់តម្កល់នៅក្រសួងមហាផ្ទៃនោះទេ ដោយសារសមាជិកមួយចំនួនបានលាឈប់ពីតួនាទី។
ករណីនេះ លោកថា បើគណបក្សខ្មែរស្រឡាញ់ជាតិចង់រំលាយ ត្រូវបំពេញបែបបទតាមច្បាប់បញ្ជូនមកក្រសួងមហាផ្ទៃ ដើម្បីពិនិត្យ និងសម្រេច។
លោកមានប្រសាសន៍ថា៖ «លក្ខន្តិកៈរបស់គាត់ គាត់រំលាយ គាត់ត្រូវធ្វើអ្វីខ្លះ ហើយច្បាប់ថាម៉េច! ច្បាប់តម្រូវឱ្យគាត់ដាក់លិខិតជាលាយលក្ខណ៍អក្សរជូនមកក្រសួងមហាផ្ទៃ»។
លោក ឈឹម កាន បញ្ជាក់ថា តាមច្បាប់ បើគណបក្សណាមួយត្រូវបានរំលាយ នោះមន្ត្រីជាប់ឆ្នោតរបស់គណបក្សនោះក៏ត្រូវដកចេញពីតួនាទីដែរ ។
អ្នកវិភាគនយោបាយ លោក ឯម សុវណ្ណរ៉ា យល់ឃើញថា បើគណបក្សនេះត្រូវបានលុបឈ្មោះពីបញ្ជី ឬមានការរំលាយ នោះកៅអីឃុំសង្កាត់នឹងត្រូវបាត់បង់ផងដែរ។ ករណីនេះ លោកថា មន្ត្រីគណបក្សខ្មែរស្រឡាញ់ជាតិដែលនៅសេសសល់ គួរតែជួបជាមួយអ្នកគាំទ្ររបស់ខ្លួន ឬធ្វើប្រជាមតិ ថាតើគួរធ្វើបែបណាបន្តទៀត ដើម្បីកុំឱ្យបាត់ទំនុកចិត្តពីអ្នកគាំទ្រ។
លោកមានប្រសាសន៍ថា៖ «ខ្ញុំគិតថាគួរតែជជែកជាមួយអ្នកគាំទ្រ ឬសុំធ្វើការជួបប្រជុំ ឬធ្វើប្រជាមតិមួយទៅ ទោះបីជាមិនបានការគាំទ្រ ឬអាសនៈក្រុមប្រឹក្សាឃុំសង្កាត់មកវិញ ក៏ត្រូវឱ្យប្រជាពលរដ្ឋដឹងឮ ដើម្បីកុំឱ្យបាត់ជំនឿទុកចិត្តពីអ្នកគាំទ្ររបស់ពួកគាត់»។
កាលពីថ្ងៃទី២៩ ខែកក្កដា ឆ្នាំ២០២២ លោក ជីវ កក្តា ដែលជាប្រធានគណបក្សខ្មែរស្រឡាញ់ជាតិ បានប្រកាសរំលាយគណបក្សនេះតែម្តង និងបានអំពាវនាវឱ្យសមាជិករបស់ខ្លួនគ្រប់ជាន់ថ្នាក់ចូលរួមរស់ជាមួយគណបក្សប្រជាជនកម្ពុជា ប៉ុន្តែត្រូវបានលោក សៀវ សុត ជាគណៈកម្មាធិការអចិន្ត្រៃយ៍នៃគណបក្សនេះបានប្រកាសបដិសេធ។
គណបក្សខ្មែរស្រឡាញ់ជាតិ គឺជាគណបក្សនយោបាយដំបូងគេដែលត្រូវបានបង្កើតឡើង ដោយមានក្បាលម៉ាស៊ីនដឹកនាំមានប្រភពចេញមកពីគណបក្សសង្រ្គោះជាតិដែលត្រូវបានតុលាការរំលាយ ដើម្បីចូលរួមប្រកួតប្រជែងនយោបាយជាមួយគណបក្សប្រជាជនកម្ពុជា៕