អ្នកបោះពុម្ពសៀវភៅចំនួន៥នាក់ត្រូវបានតុលាការទីក្រុងហុងកុងរកឃើញថា មានពិរុទ្ធភាពពីបទបំបះបំបោរ ទាក់ទងនឹងការផលិតសៀវភៅសម្រាប់កុមារ ដែលបង្ហាញរៀបរាប់អ្នកគាំទ្រលទ្ធិប្រជាធិបតេយ្យក្នុងទីក្រុងថាជាចៀមការពារភូមិរបស់ពួកគេពីហ្វូងសត្វចចក។
សៀវភៅចំនួន៣ក្បាល (The Guardians of Sheep Village, The 12 Heroes of Sheep Village, and The Garbage Collectors of Sheep Village) ដែលផលិតដោយអ្នកបោះពុម្ពទាំង៥នាក់ត្រូវបានរដ្ឋអាជ្ញាធ្វើការចោទប្រកាន់ថាបានព្យាយាមពន្យល់ពីចលនាគាំទ្រលទ្ធិប្រជាធិបតេយ្យរបស់ទីក្រុងហុងកុងដល់ក្មេងៗ ដែលក្នុងនោះរួមមានទាំងការផ្សព្វផ្សាយញុះញង់ឱ្យមានការបំបែករដ្ឋ ជំរុញឱ្យមានការស្អប់ខ្ពើម និងការប្រឆាំងរដ្ឋាភិបាលផងដែរ។
ទាក់ទិននឹងករណីនេះ អ្នកផលិតសៀវភៅដែលរួមមាន Lorie Lai, Melody Yeung, Sidney Ng, Samuel Chan និង Marco Fong ធ្លាប់បានអះអាងថាខ្លួនគ្មានកំហុសឡើយ ខណៈពួកគេក៏បានជ្រើសរើសមិនផ្តល់សក្ខីកម្មក្នុងអំឡុងពេលសវនាការ ឬកោះហៅសាក្សីណាមួយនៅពេលដំណើរការនីតិវិធីបានចាប់ផ្តើមនៅក្នុងខែកក្កដាផងដែរ។
ជាមួយគ្នានេះ មេធាវីរបស់ពួកគេក៏មិនអាចទទួលយកនូវបទចោទដែលទាក់ទងនឹងការបំបះបំបោរនេះផងដែរ ដោយពួកគេក៏បានព្រមានថា ករណីនេះនឹងធ្វើឱ្យមានការរិះគន់ផ្នែកនយោបាយបន្ថែមទៀត និងមានឥទ្ធិពលមិនល្អដល់សង្គម។
នៅក្នុងសេចក្តីសង្ខេបដែលបានចេញផ្សាយនៅថ្ងៃពុធម្សិលមិញនេះ លោកចៅក្រម Kwok Wai Kin បានឱ្យដឹងថា សៀវភៅដែលភ្ជាប់ជាមួយនឹងរូបភាពទាំង៣ក្បាលនេះ គឺត្រូវបានផលិតឡើងដោយភ្ជាប់ជាមួយនឹងខ្លឹមសារញុះញង់ឱ្យមានការបំបះបំបោរក្នុងចំណោមកុមារ ដែលអាចជះឥទ្ធិពលដល់ចិត្តគំនិតរបស់ពួកគេក្នុងការគិតអវិជ្ជមានចំពោះសង្គមនិងរដ្ឋាភិបាល។
លោកបន្តថា៖ «ពួកគេ [ក្រុមកុមារដែលអានសៀវភៅទាំងនេះ] នឹងត្រូវបានគេរៀបរាប់ថាគឺជាចៀម ខណៈសត្វចចកដែលកំពុងព្យាយាមធ្វើបាបពួកគេគឺជារដ្ឋាភិបាលនៃសាធារណរដ្ឋប្រជាមានិតចិន [PRC] និងរដ្ឋាភិបាលហុងកុង»។
គួរបញ្ជាក់ថា នេះគឺជាលើកទី១ហើយដែលករណីនៃការបោះពុម្ពផ្សាយសៀវភៅដែលត្រូវបានចាត់ទុកថាមានខ្លឹមសារបំបះបំបោរ ត្រូវបានយកមកកាត់ទោស គិតចាប់តាំងពីច្បាប់សន្តិសុខថ្មីរបស់ហុងកុងត្រូវបានដាក់ឱ្យអនុវត្ត។
អ្នកទាំង៥នេះនឹងត្រូវកាត់ទោសនៅថ្ងៃសៅរ៍ខាងមុខនេះ ហើយយោងតាមច្បាប់នៃការបំបះបំបោរ ពួកគេអាចប្រឈមនឹងការជាប់ពន្ធនាគាររហូតដល់រយៈពេល២ឆ្នាំ៕