រដ្ឋមន្ត្រីក្រសួងមហាផ្ទៃ លោក ស ខេង បានអះអាងនៅថ្ងៃព្រហស្បតិ៍ម្សិលមិញថា មេខ្លោងនិងឈ្មួញកណ្ដាលបច្ចុប្បន្ន គឺកំពុងតែធ្វើប្រតិបត្តិការឆបោកតាមប្រព័ន្ធអនឡាញចេញពីប្រទេសកម្ពុជា។ ទោះជាយ៉ាងណា លោកថា ប្រជាជនកម្ពុជាភាគច្រើន គឺមិនមានជាប់ពាក់ព័ន្ធក្នុងសកម្មភាពឧក្រិដ្ឋកម្មទាំងនោះឡើយ។
ប្រទេសកម្ពុជាត្រូវបានចាត់ទុកថាជាទីកន្លែងដែលមានការកើតឡើងនៃប្រតិបត្តិការឆបោក បន្ទាប់ពីករណីចាប់បង្ខាំង ពលកម្មដោយបង្ខំ និងការធ្វើទារុណកម្មនៅតាមទីតាំងប្រតិបត្តិការឆបោកតាមប្រព័ន្ធអនឡាញនានាចាប់ផ្ដើមលេចឡើងកាលពីឆ្នាំមុន ខណៈក្រុមទាំងនេះភាគច្រើនធ្វើសកម្មភាពចេញពីបរិវេណអាគារនិងកាស៊ីណូនៅទូទាំងប្រទេស ដែលភាគច្រើនជាកម្មសិទ្ធិ ឬមានទំនាក់ទំនងជាមួយឥស្សរជនកម្ពុជា និងអាជីវកម្មបរទេស។
ថ្លែងក្នុងពិធីសម្ពោធដាក់ឱ្យប្រើប្រាស់ជាផ្លូវការនូវសមិទ្ធផលរបស់ស្នងការដ្ឋាននគរបាលរាជធានីភ្នំពេញ កាលពីថ្ងៃព្រហស្បតិ៍ លោក ស ខេង បានលើកឡើងថា ឧក្រិដ្ឋកម្មថ្មីមួយគឺត្រូវបានរាយការណ៍ថាកំពុងតែកើតមានឡើងនៅក្នុងប្រទេសកម្ពុជា ដែលពាក់ព័ន្ធនឹងប្រតិបត្តិការឆបោកតាមប្រព័ន្ធអនឡាញ។
លោកថា៖ «បច្ចុប្បន្ននេះមានឧក្រិដ្ឋកម្មថ្មីមួយដែលបានកើតឡើងយ៉ាងសាហាវក្នុងប្រទេសរបស់យើង»។
ទោះជាយ៉ាងណា លោក ស ខេង ថា ៩៩,៩ភាគរយនៃអ្នកដែលជាប់ពាក់ព័ន្ធក្នុងប្រតិបត្តិការឆបោកទាំងនេះមិនមែនជាជនជាតិខ្មែរឡើយ ខណៈទីតាំងអស់ទាំងនេះគឺសុទ្ធសឹងតែជារបស់ឈ្មួញកណ្តាល និងប្រតិបត្តិករឆបោកបរទេស។
ទាក់ទិននឹងករណីនេះ លោកថា មេខ្យល់មកពីប្រទេសវៀតណាម ចិន តៃវ៉ាន់ ឥណ្ឌូនេស៊ី ម៉ាឡេស៊ី និងថៃ កំពុងអូសទាញនិងបញ្ជូនមនុស្សមកកាន់ទីនេះ ដើម្បីធ្វើការនៅបរិវេណអាគាររបស់ខ្លួន។
លោក ស ខេង ថា៖ «ដូច្នេះហើយប្រទេសយើងគឺជាទីកន្លែងរងគ្រោះមួយ ព្រោះថា អ្នកដែលប្រព្រឹត្តបទឧក្រិដ្ឋនិងមេខ្លោងទាំងអស់នេះ គឺ៩៩,៩ ភាគរយមិនមែនជាជនជាតិខ្មែរដែលរស់នៅក្នុងប្រទេសកម្ពុជាឡើយ ខណៈមេខ្យល់ដែលរៀបចំនាំមនុស្សពីប្រទេសរបស់ពួកគេក៏មិនមែនជាជនជាតិខ្មែរផងដែរ»។
គួរបញ្ជាក់ថា រដ្ឋាភិបាលដែលរួមមានក្រសួងមហាផ្ទៃ និងអគ្គស្នងការដ្ឋាននគរបាលជាតិ ក្នុងរយៈពេលចុងក្រោយនេះ ត្រូវបានសង្កេតឃើញថា មានការយកចិត្តទុកដាក់ខ្លាំងលើបញ្ហាកើនឡើងនៃប្រតិបត្តិការឆបោកតាមប្រព័ន្ធអនឡាញ ខណៈសកម្មភាពនេះហាក់ត្រូវបានធ្វើឡើងបន្ទាប់ពីសហរដ្ឋអាមេរិកបានដាក់កម្ពុជាក្នុងបញ្ជីខ្មៅរបស់ខ្លួន ជុំវិញប្រតិបត្តិការឆបោក និងជួញដូរមនុស្ស កាលពីខែកក្កដាកន្លងទៅ។
ជាមួយគ្នានេះ លោក ស ខេង ក៏បានចាប់ផ្តើមអនុវត្តវិធានការថ្មីទាំងឡាយ ដែលរួមមានទាំងការបង្កើតលេខទូរសព្ទទាន់ហេតុការណ៍មួយ ដើម្បីដោះស្រាយបណ្តឹងទាក់ទងនឹងពលកម្មដោយបង្ខំផងដែរ ដោយត្រឹមថ្ងៃទី៥ ខែកញ្ញា ឆ្នាំ២០២២នេះ ពាក្យបណ្ដឹងដែលទទួលបាន គឺមានចំនួន១១៧ ហើយដែលពាក់ព័ន្ធនឹងការស្នើអន្តរាគមន៍ជួយសង្គ្រោះជនបរទេសដែលត្រូវបានអះអាងថាជាប់បង្ខាំង និងជួញដូរកម្លាំងពលកម្មនៅក្នុងប្រទេសកម្ពុជា។
ទាក់ទិននឹងករណីនេះ លោក ស ខេង ថាតុលាការគួរតែដាក់ទោសលើករណីដែលមនុស្សត្រូវបានបង្ខាំង និងមិនអនុញ្ញាតឱ្យចាកចេញពីបរិវេណអាគារ។
លោកថា៖ «ប្រសិនបើវាមើលទៅជាការចាប់បង្ខាំង ហើយមិនថាវាជាបទល្មើសស្រាលឬធ្ងន់នោះទេ គឺវាជាបទល្មើសទាំងអស់»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ ‘There Is a New Crime That Has Emerged Brutally’: Sar Kheng on Scams