ប្រទេសអ៊ុយក្រែនបានអះអាងកាលពីថ្ងៃទី៨ ខែកញ្ញា ម្សិលមិញថា ខ្លួនដណ្ដើមបានមកវិញនូវទឹកដីភាគខាងកើត និងភាគខាងត្បូងពីរុស្ស៊ី ខណៈរដ្ឋមន្ត្រីការបរទេសសហរដ្ឋអាមេរិក លោក អែនតូនី ប្លីងខិន (Antony J. Blinken) បានទៅទស្សនកិច្ចនៅប្រទេសនេះ ដោយសន្យាផ្តល់កញ្ចប់ជំនួយបន្ថែម។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន CNA នៅថ្ងៃសុក្រនេះ។
ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី (Volodymyr Zelenskiy) បាននិយាយនៅក្នុងសុន្ទរកថាតាមវីដេអូថា កងទ័ពអ៊ុយក្រែនបានរំដោះតំបន់ជាច្រើន និងបានដណ្ដើមយកមកវិញនូវទឹកដីចំនួន១ ០០០គីឡូម៉ែត្រការ៉េ នៅភាគខាងកើត និងខាងត្បូង ចាប់តាំងពីថ្ងៃទី១ ខែកញ្ញា។
លោក Zelenskyy ក៏បានបង្ហោះវីដេអូដែលទាហានអ៊ុយក្រែនអះអាងថាបានដណ្តើមយកមកវិញនូវភាគខាងកើតទីក្រុងបាឡាកៃ (Balakliia) ក្បែរទីក្រុងខាកៀវ (Kharkiv) ដែលជាទីក្រុងធំទី២ ក្នុងប្រទេសអ៊ុយក្រែន។
លោកឧត្តមសេនីយ៍ទោ អាឡិចសី ហ្គ្រោម៉ូវ (Oleksiy Gromov) មន្ត្រីយោធាអ៊ុយក្រែន បាននិយាយថា កងទ័ពអ៊ុយក្រែនបានរុលទៅមុខរហូតដល់៥០គីឡូម៉ែត្រ និងដណ្តើមបានមកវិញនូវភូមិជាង២០នៅក្នុងតំបន់ខាកៀវ (Kharkiv)។
លោក អែនតូនី ប្លីងខិន (Antony J. Blinken) បានប្រាប់អ្នករាយការណ៍ព័ត៌មានមុនពេលចាកចេញពីទីក្រុងកៀវ (Kyiv) ថា៖ «យើងបានទទួលព័ត៌មានថ្មីៗអំពីការវាយបកវិញ។ យើងមើលឃើញមានដំណើរការល្អ ជាពិសេសនៅជុំវិញតំបន់ខឺសុន [Kherson] ប៉ុន្តែក៏មានការវិវត្តគួរឱ្យចាប់អារម្មណ៍មួយចំនួននៅក្នុងតំបន់ [Donbas] ភាគខាងកើតផងដែរ»។
លោក អែនតូនី ប្លីងខិន (Antony J. Blinken) បានប្រកាសផ្តល់ជំនួយយោធាចំនួន២,២ពាន់លានដុល្លារដល់អ៊ុយក្រែន និងប្រទេសចំនួន១៨ផ្សេងទៀត ដែលមានហានិភ័យនៃការឈ្លានពានរបស់រុស្ស៊ីនាពេលអនាគត ក្នុងនោះអ៊ុយក្រែននឹងទទួលបានប្រហែល១ ០០០លានដុល្លារ។ សហរដ្ឋអាមេរិកក៏បានប្រកាសផ្តល់ជំនួយសព្វាវុធដាច់ដោយឡែកមួយទៀតដល់អ៊ុយក្រែនផងដែរ ដែលគិតជាទឹកប្រាក់ស្មើនឹង៦៧៥លានដុល្លារ៕