អនុប្រធានភូមិមួយរូបបានផ្ដល់ទីតាំងស្នាក់នៅបណ្ដោះអាសន្នដល់គ្រួសារដែលរងគ្រោះដោយជំនន់ទឹកភ្លៀង នៅស្រុកម៉ាឡៃ ខេត្តបន្ទាយមានជ័យ ដែលបានជន់លិចដំណាំ និងផ្ទះសម្បែង។
អភិបាលរងស្រុកម៉ាឡៃ លោក អេង សាម៉ុន បានឱ្យដឹងនៅថ្ងៃព្រហស្បតិ៍ម្សិលមិញថា ភ្លៀងធ្លាក់ខ្លាំងបានបង្កឱ្យមានជាទឹកជំនន់នៅក្នុងឃុំអូរសំព័រ និងឃុំអូរស្រឡៅ ស្រុកម៉ាឡៃ ដែលករណីនេះក៏បានបង្កឱ្យមានជាផលប៉ះពាល់ដល់ប្រជាពលរដ្ឋនៅក្នុងតំបន់ ដែលឈានដល់ការជម្លៀសចេញមួយចំនួនផងដែរ។
ទោះជាយ៉ាងណា អភិបាលរងស្រុកខាងលើនេះពុំអាចបញ្ជាក់បានថាតើមានមនុស្សប៉ុន្មាននាក់ដែលរងផលប៉ះពាល់ក្នុងករណីទឹកជំនន់ខាងលើនេះនោះទេ ដោយគ្រាន់តែដឹងថា តំបន់ទំនាបទាំងនេះគឺមានសភាពជន់លិចស្រដៀងទៅនឹងតំបន់ដែលជាប់នឹងព្រំដែនប្រទេសថៃផងដែរ។
ជាមួយគ្នានេះ អនុប្រធានភូមិថ្មី ឃុំអូរស្រឡៅ លោក តែ ឡុង ក៏បានឱ្យដឹងផងដែរថា ភ្លៀងធ្លាក់ខ្លាំងបានវាយប្រហារទីតាំងទាំងឡាយក្នុងឃុំកាលពីថ្ងៃពុធ និងបានជន់លិចភូមិទាំងមូល ដែលក្នុងចំណោមគ្រួសារចំនួន១៦០ក្នុងភូមិ មាន៥គ្រួសារត្រូវបានផ្លាស់ទៅកាន់ទីទួលមានសុវត្ថិភាពស្ថិតនៅក្នុងផ្ទះរបស់លោកដោយផ្ទាល់តែម្ដង។
លោកបន្ថែមថា៖ «ភ្លៀងចាប់ផ្ដើមធ្លាក់ខ្លាំងតាំងពីម្សិលមិញ [ថ្ងៃពុធ] ដែលបានធ្វើឱ្យតំបន់ខ្លះក្នុងភូមិជន់លិចក្នុងកម្ពស់ទឹក៣ម៉ែត្រ»។
ក្រៅពីការផ្លាស់ទីលំនៅគ្រួសារដែលរងគ្រោះខាងលើ អនុភូមិរូបនេះបន្តថា ចម្ការដំឡូងមីប្រមាណជា៦០ហិកតាក៏បានរងផលប៉ះពាល់ដោយករណីភ្លៀងធ្លាក់ខ្លាំងនេះផងដែរ។
ទោះជាយ៉ាងណា លោក តែ ឡុង ថាភ្លៀងធ្លាក់បានថមថយទៅវិញហើយកាលពីថ្ងៃព្រហស្បតិ៍ ដោយលោកបន្ថែមថា ករណីនេះកាលពីពេលកន្លងទៅ គឺតែងតែកើតឡើងនៅក្នុងឃុំ។
អ្នកស្រី ជា លីប អាយុ៣៥ឆ្នាំ ជាអ្នកភូមិម្នាក់ក្នុងចំណោមគ្រួសារដែលត្រូវបានផ្លាស់ទីលំនៅជាបណ្ដោះអាសន្នមកកាន់ផ្ទះលោក តែ ឡុង បានលើកឡើងថា នៅម៉ោងប្រមាណជា៨យប់ថ្ងៃពុធ ទឹកបានចូលទៅដល់ផ្ទះរបស់អ្នកស្រី ដែលតម្រូវឱ្យគ្រួសាររបស់អ្នកស្រីត្រូវតែចាកចេញជាបន្ទាន់ ដើម្បីទៅកាន់ទីទួលសុវត្ថិភាព។
លោកស្រីបានបន្តថា៖ «យើងមិនអាចយកទ្រព្យសម្បត្តិនានាពីផ្ទះមកជាប់ខ្លួនបានឡើយ ដោយរឿងសំខាន់តែមួយគត់ដែលយើងគិត គឺយកកូនទាំងពីរអាយុក្រោម១០ឆ្នាំទៅកន្លែងមានសុវត្ថិភាពឱ្យបានលឿនបំផុតតាមដែលយើងអាចធ្វើបាន»។
អ្នកស្រី ជា លីប បន្ថែមថា ទីតាំងដែលគ្រួសារអ្នកស្រីមករស់នៅបណ្ដោះអាសន្នដែលជាផ្ទះរបស់លោកអនុភូមិនេះ មិនមានការលិចលង់ធ្ងន់ធ្ងរឡើយ និងដោយសារតែគ្មានអគាររដ្ឋាភិបាលនៅក្បែរនោះ ដូចជាសាលារៀន លោក តែ ឡុង ក៏បានអនុញ្ញាតឱ្យពួកគាត់ស្នាក់នៅផ្ទះរបស់គាត់តែម្ដង។
ទោះជាយ៉ាងណា លោកស្រីថា ពួកគេមានការពិបាកក្នុងការរៀបចំម្ហូបអាហារទទួលទាន ដោយសារតែខ្វះឧបករណ៍ ដែលករណីនេះតម្រូវឱ្យពួកគេត្រូវទិញម្ហូបអាហារពីអ្នកជិតខាង ដែលត្រូវចំណាយច្រើនផងដែរ។
អ្នកស្រីបន្ថែមថា៖ «ភ្លៀងនៅតែបន្តធ្លាក់ ហើយតាមអ្វីដែលខ្ញុំបានរៀបរាប់ វាអាចនឹងមានការលំបាកកាន់តែខ្លាំង ប្រសិនបើយើងត្រូវស្នាក់នៅទីនេះយូរទៀត»។
យោងតាមសេចក្ដីជូនដំណឹងមួយដោយក្រសួងធនធានទឹក និងឧតុនិយម កាលពីថ្ងៃទី៦ ខែកញ្ញា ឆ្នាំ២០២២ ស្តីពីការព្យាករធាតុអាកាស បានឱ្យដឹងថា ចាប់ពីថ្ងៃទី៧ ដល់ថ្ងៃទី១៣ ខែកញ្ញា កម្ពុជាទទួលរងឥទ្ធិពលពីប្រព័ន្ធសម្ពាធទាប (ITCZ), សម្ពាធទាប និងខ្យល់មូសុងនិរតី បក់ក្នុងល្បឿនពីមធ្យមទៅបង្គួរ ដែលបង្កឱ្យមានភ្លៀងធ្លាក់ក្នុងកម្រិតពីមធ្យមទៅបង្គួរ ក្នុងនោះក៏មានភ្លៀងធ្លាក់ច្រើនដោយអន្លើ លាយឡំដោយផ្គរ រន្ទះ និងខ្យល់កន្ត្រាក់ផងដែរ៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Village Official on High Ground Takes In Flood-Affected Residents