សមាគមខ្មែរមួយនៅប្រទេសកូរ៉េខាងត្បូងបានឱ្យដឹងថា ពលករខ្មែរដែលចាកចេញពីការងារនៅក្នុងប្រទេសនេះមកកម្ពុជា ដោយសារតែជឿលើការឃោសនារបស់លោក ខឹម វាសនា បានចាប់ផ្តើមវិលត្រលប់មកធ្វើការងារវិញហើយ ដោយសង្ឃឹមថានឹងអាចទទួលបានការងារចាស់របស់ពួកគេឡើងវិញ។
គួរបញ្ជាក់ថា មនុស្សរាប់ម៉ឺននាក់មកពីទូទាំងប្រទេសកម្ពុជា និងមានមួយចំនួនមកពីក្រៅប្រទេសផងដែរនោះ កាលពីសប្ដាហ៍មុន បាននាំគ្នាទៅប្រមូលផ្តុំនៅទីតាំងចម្ការរបស់ប្រធានគណបក្សសម្ព័ន្ធដើម្បីប្រជាធិបតេយ្យ (LDP) លោក ខឹម វាសនា បន្ទាប់ពីជឿលើការឃោសនារបស់លោក ដែលថា ពិភពលោកទាំងមូលនឹងលិចលង់ដោយទឹកជំនន់។
ទោះជាយ៉ាងណា ការជួបជុំនេះត្រូវបានរំសាយវិញជាបណ្ដើរៗ ខណៈពលរដ្ឋដែលនៅក្នុងទីតាំងដីចម្ការនោះបច្ចុប្បន្ននៅសល់ប្រមាណតែ១ ០០០នាក់ ប៉ុណ្ណោះ។
ទាក់ទិននឹងករណីនេះ លោក ម៉េង ជា ប្រធានសមាគមកម្ពុជាសាមគ្គី (Khmer Solidarity Association) ក្នុងប្រទេសកូរ៉េ បានថ្លែងថា កម្មករប្រមាណជា៤០០ទៅ៥០០នាក់បាននាំគ្នាចាកចេញយ៉ាងប្រញាប់ប្រញាល់កាលពីចុងខែសីហាកន្លងទៅ ប៉ុន្តែពួកគេមួយចំនួនបានវិលត្រលប់មកវិញហើយ និងបច្ចុប្បន្នកំពុងតែព្យាយាមមកកាន់ការងារចាស់របស់ពួកគេនៅប្រទេសកូរ៉េខាងត្បូងវិញ។
លោកថា៖ «បច្ចុប្បន្ននេះ ពួកគេមួយចំនួនបានវិលត្រលប់មកវិញហើយ ដែលក្នុងនោះមួយចំនួនបានលាលែងពីការងារ និងអ្នកខ្លះទៀតបានសុំច្បាប់ឈប់សម្រាករយៈពេលមួយខែ»។
ប្រធានសមាគមខាងលើបន្ថែមថា៖ «កម្មករភាគច្រើនពុំបានសុំច្បាប់ត្រឹមត្រូវឡើយ ដោយពួកគេបានកុហកថាម្ដាយឬឪពុករបស់ពួកគេ [នៅកម្ពុជា] ឈឺ ដែលពួកគេត្រូវលាឈប់ពីការងារ។ ពួកគេនៅពេលនោះក៏បានចាកចេញដោយប្រញាប់ [ពីប្រទេសកូរ៉េមកកម្ពុជា]»។
លោកបន្តថា ការនាំគ្នាសម្រុកចាកចេញដែលមានករណីខ្លះធ្វើឡើងជាក្រុមក្នុងចំនួន៤៥នាក់ចេញពីរោងចក្រទាំងឡាយនេះ ក៏បានដាក់បន្ទុកបន្ថែមលើកម្មករកម្ពុជាផ្សេងទៀតដែលមិនចាកចេញផងដែរ។ ពួកគេគឺបានបង្កបញ្ហាដល់ជនចំណាកស្រុកកម្ពុជាផ្សេងទៀត ខណៈផលប៉ះពាល់នេះក៏អាចនឹងបន្តទៅថ្ងៃខាងមុខទៀតផងដែរ។
លោក ម៉េង ជា ថា៖ «នៅពេលដែលមានករណីកម្មករខ្មែរបានបង្កជាបញ្ហាជាមួយនិយោជកយ៉ាងដូច្នេះ គឺខាងពួកគេ [និយោជក] មិនចង់ជួលកម្មករខ្មែរតទៅទៀតទេ»។
ទោះជាយ៉ាងណា លោកបន្ថែមថា អ្នកដែលត្រលប់មកវិញនៅពេលនេះ និងបានចាកចេញពីការងារក្នុងរយៈពេលតែមួយសប្ដាហ៍ គឺភាគច្រើនអាចចូលធ្វើការវិញបាន ប៉ុន្តែសម្រាប់អ្នកដែលមិនទាន់វិលត្រលប់មកវិញ អាចនឹងមានបញ្ហា។
ជាមួយគ្នានេះ លោក ជា សុភ័ក្រ្ត ជាកម្មករខ្មែរបម្រើការនៅរោងចក្រអេឡិចត្រូនិចមួយកន្លែងនៅទីក្រុងប៊ូសាន ប្រទេសកូរ៉េខាងត្បូង បានលើកឡើងថា មិត្តរួមការងាររបស់គាត់ចំនួនប្រាំពីរនាក់បានចាកចេញពីការងាររបស់ពួកគេ ដើម្បីទៅកាន់ចម្ការរបស់លោក ខឹម វាសនា។
លោកបន្តថា៖ «ពួកគេបានប្រាប់ខ្ញុំថា ពូ[លោក ខឹម វាសនា]របស់ពួកគេបានដឹងជាមុនថា ពិភពលោកទាំងមូលនឹងលិចលង់ដោយទឹកជំនន់ ដូច្នេះហើយពួកគេត្រូវតែប្រញាប់ចាកចេញជាបន្ទាន់ ដោយថ្លៃសំបុត្រយន្តហោះ គឺមានខាងសកម្មជនជាអ្នកចេញឱ្យមុនសិន ហើយកម្មករអាចបង់សងនៅពេលក្រោយ»។
ទោះជាយ៉ាងណា លោកបន្ថែមថា រោងចក្រមិនសប្បាយចិត្តឡើយ។
លោកថា៖ «និយោជកនៅកន្លែងធ្វើការរបស់ខ្ញុំ និងមួយចំនួនទៀតបាននាំគ្នាប្ដឹងទៅកាន់ក្រសួងការងារកូរ៉េ ឱ្យបញ្ឈប់ការអនុញ្ញាតឱ្យកម្មករខ្មែរមកធ្វើការនៅទីនេះ ខណៈរោងចក្រខ្លះអាចនឹងក្ស័យធននៅពេលដែលមានករណីកម្មករក្នុងចំនួនច្រើនពីកន្លែងធ្វើការតែមួយចាកចេញទៅព្រមៗគ្នាយ៉ាងដូច្នេះ។»
បើតាមលោក ជា សុភ័ក្រ្ត ក្នុងចំណោមមិត្តរួមការងាររបស់លោកទាំងប្រាំពីរនាក់នេះ ក្នុងនោះមានម្នាក់បច្ចុប្បន្នមានគោលបំណងចង់ត្រលប់មកកាន់ប្រទេសកូរ៉េវិញ ដោយសារតែជំពាក់បំណុលគេ ខណៈអ្នកផ្សេងទៀតកំពុងតែជាប់នៅក្នុងចម្ការភ្នំគូលេន ដោយសារតែមិនមានទីតាំងទៅ។
គួរបញ្ជាក់ថា តំណាងបក្ស LDP កាលពីដើមសប្ដាហ៍នេះ ក៏បានស្នើអាជ្ញាធរខេត្តសៀមរាបមានចំណាត់ការលើពលរដ្ឋដែលមិនមែនជាសមាជិកគណបក្យហើយបន្តស្នាក់នៅលើដីចម្ការរបស់ខ្លួនផងដែរ។
យោងតាមលិខិតមួយចេញថ្ងៃទី៦ ខែកញ្ញា ដែលចុះហត្ថលេខាដោយតំណាងរបស់គណបក្សសម្ព័ន្ធដើម្បីប្រជាធិបតេយ្យមួយរូប បានឱ្យដឹងថា គណបក្ស LDP បានធ្វើកិច្ចសន្យាផ្សព្វផ្សាយឱ្យប្រជាពលរដ្ឋដែលបានស្នាក់នៅក្នុងដីចម្ការរបស់ខ្លួន ចំនួន២ទីតាំង ឱ្យចាកចេញត្រលប់ទៅផ្ទះវិញរៀងៗខ្លួន រយៈពេល៥ថ្ងៃ ចាប់ពីថ្ងៃទី១ ដល់ថ្ងៃទី៥ ខែកញ្ញា ឆ្នាំ២០២២ ត្រឹមម៉ោង៥និង៣០នាទីល្ងាច ប៉ុន្តែរហូតមកដល់ពេលនេះ មានប្រជាពលរដ្ឋមួយចំនួនក្រៅពីក្រុមការងារគណបក្ស ពុំព្រមចាកចេញពីចម្ការរបស់ខ្លួនឡើយ។
ករណីនេះ តំណាងគណបក្សខាងលើ ស្នើទៅអភិបាលនៃគណៈអភិបាលខេត្តសៀមរាបជួយអន្តរាគមន៍ឬចាត់វិធានការផ្លូវច្បាប់ឱ្យពួកគាត់ចាកចេញពីដីចម្ការទាំង២ទីតាំងនោះ។
ជាការឆ្លើយតប អភិបាលរងខេត្តសៀមរាប លោក លី សំរិទ្ធ បានឱ្យដឹងកាលពីថ្ងៃពុធកន្លងទៅថា ក្រុមការងារជំនាញរបស់ខេត្តបានបន្តសហការជាមួយក្រុមការងារគណបក្សនោះ ក្នុងការចុះស្រង់ស្ថិតិ និងនាំពលរដ្ឋចេញពីទីតាំងនោះតាមការស្ម័គ្រចិត្តររបស់គាត់ ដោយមិនមានការកំណត់ពេលវេលាទេ។
លោកបន្តថា៖ «យើងធ្វើទាល់តែអស់ ប៉ុន្តែយើងសង្ឃឹមថាមិនយូរទេ ដោយសារខាងក្នុងហ្នឹងមិនមានអ្វីសម្រាប់ការផ្គត់ផ្គង់អ្វីបន្តទៀតទេ បានពួកគាត់ព្រមទទួលថាកិច្ចសន្យារបស់គាត់ចប់ហើយ ហើយគាត់ប្រគល់ប្រជាពលរដ្ឋដែលមិនព្រមចាកចេញឱ្យអាជ្ញាធរចាត់ចែង»៕
រាយការណ៍បន្ថែមដោយលោក ណាត សុភាព
បកប្រែនិងសម្រួលចេញពីអត្ថបទដើមភាសាអង់គ្លេស៖ Workers Who Left Korea to Escape End of World Begin to Return
