រដ្ឋាភិបាលប្រកាសផ្អាកការប្រារព្ធព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ អកអំបុកនៅរាជធានីភ្នំពេញនាឆ្នាំ២០២២នេះ ដោយមិនបានបញ្ជាក់ពីមូលហេតុនៃការផ្អាកនោះឡើយ។
ការផ្អាកនេះ ធ្វើឡើងក្នុងសេចក្ដីប្រកាសព័ត៌មានមួយ បន្ទាប់ពីបិទបញ្ចប់កិច្ចប្រជុំពេញអង្គនៅគណៈរដ្ឋមន្ត្រីនាថ្ងៃទី៩ ខែកញ្ញា ឆ្នាំ២០២២ ដែលកិច្ចប្រជុំនេះ ដឹកនាំដោយលោកនាយករដ្ឋមន្ត្រី ហ៊ុន សែន។
សេចក្ដីប្រកាសព័ត៌មាន ឱ្យដឹងថា ការប្រារព្ធព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក សម្រាប់ថ្នាក់ជាតិឆ្នាំ២០២២ រដ្ឋាភិបាលសម្រេចផ្អាក ប៉ុន្តែអាជ្ញាធរនៅតាមបណ្ដារាជធានីខេត្តនានា អាចរៀបចំពិធីបុណ្យអុំទូកនេះ នៅក្នុងខេត្តរបស់ខ្លួនបាន ដើម្បីបង្ក ភាពសប្បាយរីករាយ ជូនប្រជាពលរដ្ឋ បង្កើនបរិយាកាសទេសចរណ៍ ក៏ដូចជាផ្ដល់ឱកាសនៃ ការរកប្រាក់ចំណូលដល់បងប្អូនប្រជាពលរដ្ឋ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មើលឃើញថា ការផ្អាកពិធីបុណ្យអុំទូក អាចបណ្ដាលមកពីរដ្ឋាភិបាលខ្វះខាតថវិកា បន្ទាប់ពីវិបត្តិកូវីដ-១៩។ ម្យ៉ាងទៀត លោកយល់ថា ការមិនរៀបចំពិធីបុណ្យអុំទូកនៅថ្នាក់ជាតិ អាចមកពីរដ្ឋាភិបាលបារម្ភការជួបជុំ និងប្រមូលផ្ដុំរបស់ប្រជាពលរដ្ឋជាដើម។
លោកថា៖«ប៉ុន្តែរឿងសំខាន់បំផុតពិធីបុណ្យបែបហ្នឹង វាមិនមានបញ្ហាអីធ្វើឱ្យប៉ះពាល់ដល់សណ្ដាប់ធ្នាប់សាធារណៈទេ បើសិនយើងថា ពិធីបុណ្យ ពិធីអីប៉ះពាល់សណ្ដាប់ធ្នាប់អាហ្នឹងធ្វើឱ្យសេរីភាព ធ្វើឱ្យភាពរីករាយកាន់តែបាត់បង់។ អ៊ីចឹងសុភមង្គលរបស់ប្រជាពលរដ្ឋ គឺផ្សារភ្ជាប់ជាមួយនឹងពិធីបុណ្យជាតិផ្សេងៗ។ អាហ្នឹងជាសុភមង្គលជារួមរបស់ប្រជាជាតិ។ អ៊ីចឹងកាលណាយើងមិនបានធ្វើទេ ធ្វើឱ្យបាត់បង់សុភមង្គលជាតិរួមរបស់ប្រជាជាតិ ហើយពិធីបុណ្យជាតិនេះ ធ្វើឱ្យម្នាក់ៗមានមោទនភាពក្នុងការទៅលេង ទៅដើរកម្សាន្ត។ កាលណាអត់មាន ហាក់ដូចជាគាត់អត់បានស្គាល់អត្តសញ្ញាជាតិ យល់ដឹងពីពិធីហ្នឹងច្រើន ហើយក៏អត់សូវចាប់អារម្មណ៍ដែរ»។
លោកបន្តថា បើរដ្ឋាភិបាលគួរតែបញ្ជាក់ពីមូលហេតុផលឱ្យបានច្បាស់លាស់ដល់ប្រជាពលរដ្ឋ ខណៈការខនខានបា្ររព្ធពិធីបុណ្យជាតិជាបន្តបន្ទាប់បែបនេះ នឹងធ្វើឱ្យប្រជាពលរដ្ឋបាត់បង់ជំនឿ និងលែងមានអ្នកចាប់អារម្មណ៍ពិធីបុណ្យជាតិថែមទៀតផងដែរ។
លោកថា៖«អ៊ីចឹងរដ្ឋាភិបាលគួរតែបង្ហាញនូវហេតុផល ហើយនឹងជំហរជាក់លាក់ណាមួយ ថាយ៉ាងម៉េច ហើយពេលណារដ្ឋាភិបាល ធ្វើឱ្យបានប្រាកដប្រជា។ ការរៀបចំពិធីបុណ្យជាតិនីមួយៗគេកម្របោះបង់ចោលណាស់ ក្នុងស្ថានភាពធម្មតាអ៊ីចឹង នៅក្នុងស្ថានភាពកូវីដគ្រប់គ្រងបានហើយ យើងឃើញនៅបណ្ដាប្រទេសផ្សេងៗក៏គេមានការរៀបចំពិធីរបស់គេដែរ គេមិនទុកពិធីហ្នឹងចោលទេ។ រឿងពិធីជាតិ គឺជាពិធីកិត្តិយសជាតិ មុខមាត់របស់ជាតិ ជាកិត្តិយស ជាមុខមាត់របស់រដ្ឋាភិបាល»។
កាលពីឆ្នាំ២០២១កន្លងទៅ រដ្ឋាភិបាលកម្ពុជាក៏បានប្រកាសផ្អាកពិធីបុណ្យអុំទូកអុំទូក បណ្តែតប្រទីប និងសំពះព្រះខែ អកអំបុក ក្រោមហេតុផលថា ទប់ស្កាត់ការឆ្លងរីករាលដានជំងឺកូវីដ-១៩ ។
តែយ៉ាងណាក៏ដោយ ការសម្រេចផ្អាកបា្ររព្ធពិធីបុណ្យអុំទូកពេលនោះ រដ្ឋាភិបាលមិនបានបញ្ជាក់ពីមូលហេតុឡើយ ទោះបីជាបច្ចុប្បន្នជំងឺកូវីដ-១៩ បានធូរស្រាលក្ដី។
កម្ពុជាក៏ធ្លាប់ខកខានប្រារព្ធព្រះរាជពិធីបុណ្យមួយនេះរយៈពេល ៣ឆ្នាំជាប់ៗគ្នាកាលពីឆ្នាំ២០១១ ឆ្នាំ២០១២ និងឆ្នាំ២០១៣ ក្រោយពីមានហេតុការណ៍រត់ជាន់គ្នានៅកោះពេជ្រ ដែលបណ្ដាលឱ្យមនុស្សជាង៣៥០នាក់ស្លាប់ និងដោយសារហេតុផលគ្រោះទឹកជំនន់ និងក្រោយការសោយទិវង្គតរបស់ព្រះបរមរតនកោដ្ឋព្រះបាទ នរោត្ដម សីហនុ។
ក្នុងឆ្នាំ២០១៤ ពិធីបុណ្យអុំទូកត្រូវបានរៀបចំធ្វើឡើងវិញ តែក៏បានខកខានម្ដងទៀតនៅឆ្នាំ២០១៥ ដោយសារកម្ពស់ទឹកទន្លេរាក់ពេក មិនអាចអុំទូកបាន៕
