លោកនាយករដ្ឋមន្ត្រី ហ៊ុន សែន បានបញ្ជាទៅអាជ្ញាធរគ្រប់លំដាប់ថ្នាក់ ត្រូវបង្កើនកិច្ចការពារសុវត្ថិភាពជូនប្រជាពលរដ្ឋ និងភ្ញៀវទេសចរ អំឡុងពេលបុណ្យកាន់បិណ្ឌ និងភ្ជុំបិណ្ឌ ខណៈពិធិបុណ្យនេះ បានចាប់ផ្តើមពីថ្ងៃទី១១ ខែកញ្ញា រហូតដល់ចុងខែដដែលនេះ។
លោកនាយករដ្ឋមន្ត្រី ហ៊ុន សែន បានសរសេរសារបែបនេះ ក្នុងទំព័រហ្វេសប៊ុករបស់លោកនៅថ្ងៃអាទិត្យនេះថា នៅថ្ងៃទី១១ ខែកញ្ញា ឆ្នាំ២០២២ ត្រូវនឹងថ្ងៃ១រោច ខែភទ្របទ គឺជាថ្ងៃកាន់បិណ្ឌ១ នៃពិធីបុណ្យភ្ជុំបិណ្ឌ ជាពិធីបុណ្យប្រពៃណីជាតិរបស់ខ្មែរ ដែលមានតាំងពីបុរាណកាលមក។
លោកបញ្ជាក់ថា នេះជាពេលវេលាមួយ ដែលប្រជាពលរដ្ឋពុទ្ធបរិស័ទ មានឱកាសក្នុងការធ្វើបុណ្យទាន សន្សំកុសល និងជួបជុំសាច់ញាតិ នៅតាមទីកន្លែងជិតឆ្ងាយ ជាពិសេសតាមទីវត្តអារាមនានា។
ករណីនេះ លោកបានណែនាំទៅអាជ្ញាធរគ្រប់លំដាប់ថ្នាក់ បង្កើនកិច្ចការពារសុវត្ថិភាព សន្តិសុខ សណ្តាប់ធ្នាប់សាធារណៈ របៀបរៀបរយ និងសម្រួលចរាចរណ៍ឱ្យបានល្អប្រសើរ ដើម្បីបង្កលក្ខណៈងាយស្រួលជូនដល់បងប្អូនប្រជាពលរដ្ឋ និងទេសចរ នៅក្នុងអំឡុងពេលបុណ្យភ្ជុំបិណ្ឌនេះ។
តាមប្រតិទិន ពិធីបុណ្យកាន់បិណ្ឌឆ្នាំ២០២២នេះ ប្រព្រឹត្តទៅចាប់ពីថ្ងៃ ១រោច ដល់ថ្ងៃ ១៤រោច ខែភទ្របទ ឆ្នាំខាក ព.ស ២៥៦៦ ដែលត្រូវនឹងថ្ងៃទី១១ ខែកញ្ញា ដល់ថ្ងៃទី២៤ ខែកញ្ញា ហើយបុណ្យភ្ជុំបិណ្ឌនឹងប្រព្រឹត្តទៅនៅថ្ងៃទី ១៥រោច ដែលត្រូវនឹងថ្ងៃកាន់បិណ្ឌទី១៥ ហើយក៏ត្រូវថ្ងៃទី២៥ ខែកញ្ញា ឆ្នាំ២០២២៕
