ប្រជាសហគមន៍នៅឃុំឈើទាល និងឃុំស្វាយធំ ស្រុកស្វាយជ្រុំ ខេត្តស្វាយរៀង អះអាងថា អាជ្ញាធរបានដាក់គ្រឿងចក្រជាច្រើនគ្រឿងឈូសឆាយដីស្រែរបស់ពលរដ្ឋចំនួន៤គ្រួសារ ក្នុងចំណោម១១៧គ្រួសារ ក្រោយពីពួកគាត់បដិសេធទទួលយកសំណងដែលអាជ្ញាធរផ្ដល់ឱ្យ «៩០០រៀលក្នុងមួយម៉ែត្រការ៉េ»។
វិវាទដីធ្លីនៅស្រុកស្វាយជ្រុំនេះកើតឡើងតាំងពីឆ្នាំ២០០៨ លើទំហំដីប៉ះពាល់ជិត១០០ហិកតា។ ជម្លោះនេះកើតមានក្រោយពីក្រសួងធនធានទឹក និងឧតុនិយម បានសហការជាមួយអាជ្ញាធរមូលដ្ឋាន សម្រេចយកតំបន់នេះជាគម្រោងបង្កើត «អាងទឹកទន្លេវៃគោ»។ បើតាមក្រុមប្រជាពលរដ្ឋ កន្លងមក រដ្ឋាភិបាលបានផ្តល់គោលនយោបាយជាសំណងជូនពួកគាត់ក្នុងមួយម៉ែត្រការ៉េតម្លៃ៩០០រៀល។
ប្រជាសហគមន៍ចេកមាស ឃុំឈើទាល អ្នកស្រី ប៉ុល ស៊ី បានឱ្យដឹងថា នាព្រឹកថ្ងៃចន្ទនេះ កម្លាំងនគរបាលប្រមាណ៧០នាក់ និងមានគ្រឿងចក្រចំនួន៥គ្រឿងផង បានធ្វើការឈូសឆាយដីស្រែរបស់ពលរដ្ឋដែលមិនទាន់ទទួលយកសំណងចំនួន៤គ្រួសារ ស្មើនឹង៧ហិកតា ក្នុងនោះក៏មានដីស្រែរបស់អ្នកស្រីផងដែរ។ អ្នកស្រីចាត់ទុកសកម្មភាពរបស់អាជ្ញាធរ ថាធ្វើឡើងក្នុងចេតនាខឹងស្អប់នឹងពលរដ្ឋដែលមិនព្រមចាកចេញពីលំនៅដ្ឋាន។
អ្នកស្រីថា៖ «ដីខ្ញុំកំពុងធ្វើស្រូវល្អហ្នឹង ឥលូវគេឈូសឆាយអស់រលីង គេអត់ឱ្យយើងទៅជិតទេ! គ្រាន់តែគោស៊ីស្រូវ ក៏វាមិនឱ្យខ្ញុំទៅដេញដែរ! ធ្វើបាបខ្ញុំ គ្រាន់តែទៅជិត ប្រតាយប្រតប់បោកដេញគ្នា បោកទូរសព្ទចៅខ្ញុំមួយ កូនខ្ញុំមួយ សុទ្ធតែព្រនង់ កាំភ្លើង! ហើយខ្ញុំថា ម៉េចមិនបាញ់ខ្ញុំចោលតែម្ដងទៅ?»
អ្នកស្រី ប៉ុល ស៊ី បន្តថា មូលហេតុដែលអ្នកស្រីមិនព្រមផ្ដិតមេដៃទទួលយកសំណងដែលអាជ្ញាធរផ្ដល់ឱ្យត្រឹមតែ៩០០រៀលក្នុងមួយម៉ែត្រការ៉ែនោះ ដោយសារតែតម្លៃនេះទាបពេក ដែលធ្វើឱ្យពលរដ្ឋមិនអាចទៅរកទិញដីនៅតំបន់ផ្សេងសម្រាប់បង្កបង្កើនផលបាន។
ប្រធានសហគមន៍ចេកមាស អ្នកស្រី យស សោភ័ណ្ឌ បានលើកឡើងថា ពលរដ្ឋមិនប្រឆាំងនឹងការអភិវឌ្ឍនេះទេ ប៉ុន្តែគួរផ្ដល់សំណងសមរម្យឱ្យទៅពួកគាត់ ដើម្បីឱ្យពួកគាត់អាចមានលទ្ធភាពទៅរកដីនៅកន្លែងផ្សេងសម្រាប់បង្កបង្កើនផលចញ្ចឹមជីវិតបាន។
អ្នកស្រីថា៖ «បើអភិវឌ្ឍន៍ អភិវឌ្ឍន៍ឱ្យប្រជាពលរដ្ឋមានជីវភាពរស់នៅសមរម្យហើយថ្លៃថ្នូរ ប្រសិនបើអភិវឌ្ឍន៍ហើយប្រជាពលរដ្ឋទឹកភ្នែក តើយើងអភិវឌ្ឍដើម្បីនរណា?»
មេឃុំស្វាយធំ លោកស្រី កេត ថារី បានអះអាងថា ពិតជាមានគ្រឿងចក្រទៅឈូសឆាយដំណាំស្រូវរបស់ពលរដ្ឋដែលកំពុងមានជម្លោះដីធ្លីពិតប្រាកដមែន ដោយសារតែតំបន់នោះជាតំបន់ត្រូវអភិវឌ្ឍ។ តែយ៉ាងណា លោកស្រីបដិសេធឆ្លើយលម្អិតជុំវិញករណីនេះ។
លោកស្រីថា៖ «រឿងហ្នឹងគេកំពុងធ្វើនៅហ្នឹងមែន! ក្មួយចង់សួរអី ទៅសួរចៅហ្វាយស្រុកដែលកំពុងរុះរើអ៊ីចឹងណា ព្រោះកន្លែងហ្នឹងជាកន្លែងគេអភិវឌ្ឍ»។
ចំណែកអភិបាលស្រុកស្វាយជ្រុំ លោក ហែម សារិទ្ធិ បដិសេធឆ្លើយតប ដោយប្រាប់ថាកំពុងជាប់រវល់។
អ្នកសម្របសម្រួលសហគមន៍នៅសមាគមសម្ព័ន្ធសហគមន៍កសិករកម្ពុជា លោក ញ៉ិល ភាព មានប្រសាសន៍ថា ការដែលអាជ្ញាធរប្រើគ្រឿងចក្រ ឈូសឆាយដីស្រែរបស់ពលរដ្ឋនេះ គឺធ្វើឡើងមិនសមស្របជាមួយមូលដ្ឋានច្បាប់នោះឡើយ។ មួយវិញទៀត លោកយល់ថា ការផ្តល់សំណងដល់ពលរដ្ឋក្នុងតម្លៃដី៩០០រៀលក្នុងមួយម៉ែត្រការ៉េនេះ ក៏ជាសំណងដែលមិនសមស្របនឹងតម្លៃទីផ្សារ ដែលអាចឱ្យប្រជាពលរដ្ឋមានលទ្ធភាពទិញដីផ្សេងសម្រាប់ធ្វើកសិកម្មនោះដែរ។
លោកថា៖ «យើងឃើញថា ដំណោះស្រាយកន្លងទៅ ជាដំណោះស្រាយចាប់បង្ខំ ជាដំណោះស្រាយមួយដែលមិនស្របតាមនីតិវិធី បទដ្ឋានគតិយុត្តនៃច្បាប់ ជាពិសេសរដ្ឋធម្មនុញ្ញនៃព្រះរាជាណាចក្រកម្ពុជា ដែលចែងថា រាល់ការដកហូតទ្រព្យសម្បត្តិឯកជនដើម្បីផលប្រយោជន៍សាធារណៈ ទាល់តែមានសំណងសមរម្យ»។
បើតាមក្រុមប្រជាពលរដ្ឋ ពួកគាត់បានរស់នៅនិងបង្កបង្កើនផលលើដីនេះតាំងពីឆ្នាំ១៩៧៩មក។ កន្លងមក ពួកគាត់ធ្លាប់បានស្នើសុំអាជ្ញាធរខេត្តស្វាយរៀង និងក្រសួងធនធានទឹក ប្ដូរគោលនយោបាយ ដោយផ្ដល់សំណងឱ្យពលរដ្ឋក្នុងមួយម៉ែត្រការ៉េ តម្លៃ១ ២០០រៀល ឬស្មើ៣ដុល្លារ ប៉ុន្តែអាជ្ញាធរបានបដិសេធសំណើនេះ៕
