ប្រធានាធិបតីចិន លោក ស៊ី ជីនពីង នឹងចាកចេញពីប្រទេសចិន សម្រាប់ដំណើរទស្សនកិច្ចរយៈពេលមួយសប្ដាហ៍ទៅកាន់តំបន់អាស៊ីកណ្ដាល ដើម្បីជួបជាមួយប្រធានាធិបតីរុស្ស៊ី លោក វ្លាឌីមៀរ ពូទីន ខណៈនេះជាដំណើរទៅក្រៅប្រទេសរបស់លោកជាលើកដំបូង ក្រោយខកខានអស់រយៈពេលជាង២ឆ្នាំ ដោយសារតែករណីឆ្លងរីករាលដាលនៃវីរុសកូវីដ-១៩។
ទីភ្នាក់ងារសារព័ត៌មាន Reuters បានស្រង់ព័ត៌មានពីវិមានក្រឹមឡាំង មកចុះផ្សាយបន្តថា លោក ស៊ី ជីនពីង គ្រោងនឹងធ្វើទស្សនកិច្ចផ្លូវរដ្ឋទៅកាន់ប្រទេសកាហ្សាក់ស្ថាន (Kazakhstan) នៅថ្ងៃពុធ ដោយបន្ទាប់មក ប្រធានាធិបតីចិនរូបនេះក៏គ្រោងនឹងជួបជាមួយលោក ពូទីន នៅកិច្ចប្រជុំកំពូលនៃអង្គការសហប្រតិបត្តិការសៀងហៃ (SCO) ក្នុងទីក្រុងសាម៉ាកាន់ (Samarkand) ប្រទេសអ៊ូសបេគីស្ថាន (Uzbekistan) ផងដែរ។
ទាក់ទិននឹងករណីនេះ លោក Yuri Ushakov ជាទីប្រឹក្សាគោលនយោបាយការបរទេសរបស់លោក ពូទីន ក៏បានបញ្ជាក់ប្រាប់អ្នកសារព័ត៌មានកាលពីសប្តាហ៍មុនផងដែរថា ប្រធានាធិបតីរុស្ស៊ី គឺត្រូវបានរំពឹងថានឹងជួបជាមួយលោក ស៊ី ជីនពីង នៅក្នុងកិច្ចប្រជុំកំពូលនោះ។
ទោះជាយ៉ាងណា វិមានក្រឹមឡាំង ពុំបានផ្តល់ព័ត៌មានលម្អិតថាតើមេដឹកនាំចិន និងរុស្សី នឹងធ្វើកិច្ចពិភាក្សាលើប្រធានបទអ្វីនោះទេ។
គួរបញ្ជាក់ថា រុស្ស៊ីបានបើកការឈ្លានពានទ្រង់ទ្រាយធំរបស់ខ្លួនទៅលើអ៊ុយក្រែន តាមផ្លូវគោក ផ្លូវអាកាស និងសមុទ្រ កាលពីថ្ងៃទី២៤ ខែកុម្ភៈ ដែលបានបង្កឱ្យជនស៊ីវិលរាប់ពាន់នាក់បានស្លាប់បាត់បង់ជីវិត តំបន់ទីក្រុងជាច្រើនប្រែក្លាយទៅជាគំនរបាក់បែក និងបង្កឱ្យមានជាវិបត្តិមនុស្សធម៌ធ្ងន់ធ្ងរកើតឡើង ខណៈមនុស្សរាប់លាននាក់ក៏បានភៀសខ្លួនចេញពីប្រទេសផងដែរ។
ទាក់ទិននឹងករណីនេះ ថ្នាក់ដឹកនាំនៃក្រុមប្រទេសមានសេដ្ឋកិច្ចជឿនលឿនទាំង៧ (G7) កាលពីពេលកន្លងទៅ ក៏ធ្លាប់បានជំរុញដល់ប្រទេសចិនឱ្យប្រើប្រាស់ឥទ្ធិពលរបស់ខ្លួនជាមួយរុស្ស៊ី ដើម្បីឱ្យប្រទេសមួយនេះបញ្ឈប់ការឈ្លានពានរបស់ខ្លួនលើអ៊ុយក្រែនផងដែរ។
ទោះជាយ៉ាងណា ប្រទេសចិនបានធ្វើការឆ្លើយតបថា ការដាក់ទណ្ឌកម្មនានាលើរុស្ស៊ី គឺមិនអាចដោះស្រាយវិបត្តិនៅអ៊ុយក្រែនបានឡើយ ខណៈខ្លួនក៏បានរិះគន់សហរដ្ឋអាមេរិក និងសម្ពន្ធមិត្តរបស់ខ្លួនចំពោះការផ្គត់ផ្គង់អាវុធដល់អ៊ុយក្រែនផងដែរ៕
