គណបក្សភ្លើងទៀន បានទាមទារទៅភាគីពាក់ព័ន្ធឱ្យដំឡើងប្រាក់ឈ្នួលគោលចំនួន២១៥ដុល្លារ ជូនកម្មករផ្នែកវាយនភណ្ឌកាត់ដេរ ផលិតស្បែកជើង កាបូប និងផលិតផលធ្វើដំណើរនៅកម្ពុជា សម្រាប់ឆ្នាំ២០២៣ ខណៈរដ្ឋាភិបាលកំពុងពិភាក្សាជាមួយភាគីពាក់ព័ន្ធពីការដំឡើងប្រាក់ឈ្នួលនេះ។
ក្នុងសេចក្ដីថ្លែងការណ៍មួយចុះថ្ងៃទី១៣ ខែកញ្ញា ឆ្នាំ២០២២ គណបក្សភ្លើងទៀនបានលើកឡើងថា កម្មករ-កម្មការិនីមួយចំនួនបាននាំគ្នាធ្វើយុទ្ធនាការទាមទារប្រាក់ឈ្នួលអប្បបរមាចំនួន «២១៥ដុល្លារ ក្នុង១ខែ» សម្រាប់ឆ្នាំ២០២៣។
គណបក្សនេះយល់ឃើញថា ការដំឡើងប្រាក់ឈ្នួលគោលដល់២១៥ដុល្លារជូនកម្មករនោះ គឺអាចជួយសម្រួលដល់ជីវភាពពួកគេបានមួយចំណែក បើទោះជាការដំឡើងកម្រិតនេះនៅមិនទាន់សមល្មមចំពោះការប្រឈមនឹងជីវភាពរស់នៅរបស់កម្មករ ដោយសារស្ថានភាពទំនិញនៅលើទីផ្សារមានម្ហូបអាហារ តម្លៃប្រេងសាំង ថ្លៃការស្នាក់នៅ ថ្លៃធ្វើដំណើរ បានហក់ឡើងខ្ពស់ជាងប្រទេសជិតខាងនោះ។
គណបក្សមួយនេះបានស្នើដល់រដ្ឋាភិបាលខិតខំរកមធ្យោបាយសម្របសម្រួលជាមួយម្ចាស់រោងចក្រសហគ្រាស ជួយកាត់បន្ថយការចំណាយក្រៅផ្លូវការ និងសម្រួលដល់ការនាំចូលវត្ថុធាតុដើម ឬជំរុញដល់ការផលិតវត្ថុធាតុដើមនៅក្នុងស្រុក ដើម្បីអាចផ្តល់លទ្ធភាពដល់ការដំឡើងប្រាក់ឈ្នួលគោលជូនកម្មករលើសពី៣០០ដុល្លារ ចាប់ពីឆ្នាំ២០២៤តទៅ។
បច្ចុប្បន្ននេះ កម្មករ-កម្មការិនីបម្រើការងារតាមបណ្ដារោងចក្រមួយចំនួនបាននាំគ្នាធ្វើយុទ្ធនាការទាមទារប្រាក់ឈ្នួលចំនួន «២១៥ដុល្លារ» សម្រាប់ឆ្នាំ២០២៣។
កម្មករទាំងនោះបាននាំគ្នាប្រមូលផ្ដុំឈរលើកបដាជាក្រុមតូចៗនៅក្នុងរោងចក្រឬសហគ្រាសរបស់ពួកគេ ហើយថតរូបផ្សព្វផ្សាយតាមបណ្ដាញសង្គមហ្វេសប៊ុក ដោយទាមទារប្រាក់ឈ្នួលគោល២១៥ដុល្លារ ក្រោយហេតុផលថា ពួកគេកំពុងជួបបញ្ហាលើការចំណាយប្រចាំថ្ងៃ ដោយសារទំនិញនៅលើទីផ្សារកំពុងហក់ឡើងខ្ពស់។
បើតាមសេចក្ដីប្រកាសព័ត៌មានរបស់ក្រសួងការងារ នៅថ្ងៃទី៣១ ខែសីហា ឆ្នាំ២០២២ គឺក្រោយការប្រជុំផ្ទៃក្នុងភាគីពាក់ព័ន្ធចំនួន៣លើក ខាងភាគីតំណាងកម្មករបានបន្ថយតួលេខពីចំនួន២១៥ដុល្លារ មកតួលេខ២១៣ដុល្លារវិញ។ ចំណែកតំណាងនិយោជកបានដំឡើងតួលេខពីចំនួន១៩៤ដុល្លារ ទៅតួលេខ១៩៦ដុល្លារវិញ។
ក្រសួងការងារបញ្ជាក់ថា តាមលក្ខខណ្ឌបច្ចេកទេស និងបម្រែបម្រួលទិន្នន័យនៃលក្ខណៈវិនិច្ឆយទាំង៧ដែលជាមូលដ្ឋានកំណត់ប្រាក់ឈ្នួលអប្បបរមាសម្រាប់ឆ្នាំ២០២៣ គឺ «១៩៧,៨៦ដុល្លារ»។
យ៉ាងណា ក្រុមប្រឹក្សាជាតិប្រាក់ឈ្នួលអប្បបរមា បានបើកកិច្ចប្រជុំត្រីភាគីបន្តទៀត នៅថ្ងៃទី១៣ ខែកញ្ញា និងប្រជុំបញ្ចប់នៅម៉ោង២កន្លះរសៀល ថ្ងៃទី២១ ខែកញ្ញា ឆ្នាំ២០២២។
អង្គការសង្គមស៊ីវិលផ្នែកសិទ្ធិការងារ និងសហជីព បានលើកឡើងថា កម្មករនឹងបន្តប្រឈមបញ្ហាជីវភាពនិងសុខភាព ប្រសិនបើការដំឡើងប្រាក់ឈ្នួលមិនឆ្លើយតបទៅនឹងការឡើងថ្លៃទំនិញទីផ្សារ ខណៈផលប្រយោជន៍មួយចំនួនរបស់កម្មករត្រូវបានបាត់បង់ ក្រោយកាត់បន្ថយថ្ងៃឈប់សម្រាក និងមិនលើកពេលថ្ងៃបុណ្យជាតិ៕
