លោកនាយករដ្ឋមន្ត្រី ហ៊ុន សែន បានអំពាវនាវដល់គ្រឹះស្ថានមីក្រូហិរញ្ញវត្ថុផ្ដល់ប្រាក់កម្ចីក្នុងអត្រាការប្រាក់ទាបទៅដល់ប្រជាពលរដ្ឋដែលស្ម័គ្រចិត្តរុះរើលំនៅឋានពីតំបន់រមណីយដ្ឋានអង្គរ ទៅរស់នៅតំបន់រុនតាឯក ស្រុកបន្ទាយស្រី ខេត្តសៀមរាប ដើម្បីជួយសម្រួលឱ្យពួកគាត់។
ក្នុងពិធីជួបជាមួយពលរដ្ឋនៅតំបន់រុនតាឯក នាព្រឹកថ្ងៃអង្គារនេះ លោកនាយករដ្ឋមន្រ្តី ហ៊ុន សែន បានអំពាវនាវឱ្យគ្រឹះស្ថានមីក្រូហិរញ្ញវត្ថុផ្ដល់ការប្រាក់ទាបដល់ពលរដ្ឋដែលរស់នៅតំបន់រុនតាឯក ដោយសារតែពលរដ្ឋមួយចំនួនអាចនឹងត្រូវការដើមទុនដើម្បីបង្កើតមុខរបរ ក្រោយពីផ្លាស់ប្ដូរទីលំនៅទៅកន្លែងថ្មី។
លោកថ្លែងថា៖ «ខ្ញុំអំពាវនាវចំពោះម្ចាស់ហិរញ្ញវត្ថុជួយផ្ដល់ប្រាក់កម្ចីដល់ប្រជាពលរដ្ឋដែលបានរស់នៅតំបន់រុនតាឯកនេះ ដោយអត្រាការប្រាក់ទាប និងដោយភាពអនុគ្រោះ ព្រោះបងប្អូនប៉ុន្មានពាន់គ្រួសារនេះអាចនឹងមានមួយចំនួនត្រូវការដើមទុន ដើម្បីបង្កើតនូវមុខរបរ»។
ប្រធានទំនាក់ទំនង និងជាអ្នកនាំពាក្យសមាគមមីក្រូហិរញ្ញវត្ថុ លោក កាំង តុងងី មានប្រសាសន៍ថា គ្រឹះស្ថានមីក្រូហិរញ្ញវត្ថុបានយល់ព្រមក្នុងការបន្ធូរបន្ថយការប្រាក់ និងអនុគ្រោះដល់ពលរដ្ឋដែលរស់នៅតំបន់រុនតាឯក តាមការអំពាវនាវរបស់លោកនាយករដ្ឋមន្ត្រី។ ចំណែកនីតិវិធីបន្តបន្ទាប់ទៀតយ៉ាងណានោះ លោកថា ខាងសមាគមនឹងកំណត់ឱ្យបានជាក់លាក់ក្នុងពេលឆាប់ៗខាងមុខនេះ។
លោកថា៖ «បន្ទាប់ពីជជែកគ្នាជាមួយថ្នាក់ដឹកនាំគ្រឹះស្ថានមីក្រូហិរញ្ញវត្ថុមក យើងយល់ព្រមជាគោលការណ៍ថា យើងនឹងជួយគាំទ្រដល់ប្រជាពលរដ្ឋដែលនឹងផ្លាស់ប្ដូរទីលំនៅនៅតំបន់រុនតាឯកនេះ ដោយយើងនឹងបន្ធូរបន្ថយអត្រាការប្រាក់ ក៏ដូចជាសម្រួលក្នុងការផ្ដល់ឥណទានដល់ប្រជាពលរដ្ឋផងដែរ»។
នាយកទទួលបន្ទុកកិច្ចការទូទៅ នៃអង្គការការពារសិទ្ធិមនុស្សលីកាដូ លោក អំ សំអាត មានប្រសាសន៍គាំទ្រចំពោះការផ្ដល់ការប្រាក់ទាប និងការអនុគ្រោះដល់ប្រជាពលរដ្ឋដែលរស់នៅតំបន់រុនតាឯកនេះ ដោយសារពួកគាត់អាចប្រឈមនឹងកង្វះថវិកា ក្រោយទៅរស់នៅទីតាំងថ្មី។
តែយ៉ាងណា លោកចង់ឃើញស្ថាប័នគ្រឹះស្ថានមីក្រូហិរញ្ញវត្ថុទាំងអស់យោគយល់ដល់ពលរដ្ឋទូទៅផងដែរ ដោយសារបច្ចុប្បន្នប្រជាពលរដ្ឋទូទៅក៏មានស្ថានភាពជីវភាពមិនទាន់ប្រសើរឡើងវិញនោះដែរ ក្រោយពីមានវិបត្តិកូវីដ-១៩។
លោកថា៖ «ប៉ុន្តែប្រសិនបើមានការបញ្ចុះការប្រាក់ទាបរាល់អតិថិជនរបស់ខ្លួន ឬក៏កូនបំណុលរបស់ខ្លួន ក៏កាន់តែប្រសើរដែរ នេះក៏ជាសំណើរបស់បងប្អូនប្រជាពលរដ្ឋទូទៅ ដែលបានខ្ចីបំណុលនៅធនាគារហិរញ្ញវត្ថុផងដែរ […] ប្រសិនបើយើងមើលស្ថានភាពជាក់ស្ដែង ជាការពិតហើយ បន្ទាប់ពីឆ្នាំ២០២០មក សេដ្ឋកិច្ចគ្រួសាររបស់ពួកគាត់មិនទាន់មានភាពប្រសើរឡើងវិញទេ ជាផលប៉ះពាល់សម្រាប់គាត់ផងដែរ»។
បើតាមរបាយការណ៍របស់ក្រសួងរៀបចំដែនដី គិតត្រឹមថ្ងៃទី៧ ខែកញ្ញា ឆ្នាំ២០២២ ក្រុមការងារចម្រុះ និងអាជ្ញាធរពាក់ព័ន្ធ បានរៀបចំដីឡូត៍នៅតំបន់អភិវឌ្ឍន៍រុនតាឯក សម្រាប់ពលរដ្ឋដែលស្ម័គ្រចិត្តរុះរើសំណង់ខុសច្បាប់ បានតាំងទីលំនៅថ្មី បានទំហំជាង៣០០ហិកតា (២៩៩,៧០ហិកតា) និងបានចុះបោះបង្គោលព្រំដីឡូត៍នៅភូមិធម្មជាតិរុនតាឯក បានចំនួន១ ៤២៧ឡូត៍ ព្រមទាំងបានសាងសង់ផ្លូវសម្រេចបាន៤០ខ្សែ ដែលមានប្រវែង៩ ៩០០ម៉ែត្រ ឬស្មើជាង៨៨,៦២ភាគរយ។
ប្រភពដដែលបន្តថា ប្រជាពលរដ្ឋដែលស្ម័គ្រចិត្តរុះរើផ្ទះចេញពីតំបន់រមណីយដ្ឋានអង្គរ ទៅកាន់តំបន់រុនតាឯកនោះ ក្នុងមួយគ្រួសារទទួលបានដីទំហំ ២០ម៉ែត្រគុណ៣០ម៉ែត្រ។ ក្រៅពីនោះ ក្រុមការងារបាននិងកំពុងសិក្សាគម្រោងប្លង់អភិវឌ្ឍន៍ភូមិធម្មជាតិរុនតាឯក ដោយបន្ថែមនូវផ្សារ សាលារៀន មន្ទីរពេទ្យ ប្រព័ន្ធទឹក អគ្គិសនី សេវាទូរសព្ទ និងសេវាអ៊ីនធឺណិត ដើម្បីសម្រួលដល់ជីវភាពរស់នៅប្រចាំថ្ងៃរបស់ប្រជាពលរដ្ឋ៕