អាជ្ញាធររាជធានីភ្នំពេញបានឱ្យដឹងថា ខ្លួនបានត្រៀមរថយន្តក្រុងចំនួន ១៧៥គ្រឿង សម្រាប់បម្រើសេវាដឹកជញ្ជូនសាធារណៈដោយមិនគិតថ្លៃ សម្រាប់ឱកាសបុណ្យភ្ជុំបិណ្ឌរយៈពេល ៥ថ្ងៃ ដោយរថយន្ត ១២០គ្រឿងសម្រាប់ដឹកពលរដ្ឋពីភ្នំពេញទៅស្រុកកំណើត និងត្រឡប់មកភ្នំពេញវិញ ខណៈជាង ៥០គ្រឿងទៀតសម្រាប់ដឹកជញ្ជូនពលរដ្ឋក្នុងក្រុងភ្នំពេញ។
សេចក្តីជូនដំណឹងរបស់រដ្ឋបាលរាជធានីភ្នំពេញ កាលពីម្សិលមិញ បានឱ្យដឹងថា ក្នុងឱកាសពិធីបុណ្យភ្ជុំបិណ្ឌរយៈពេល ៥ថ្ងៃ ចាប់ពីថ្ងៃទី២៣ ដល់ថ្ងៃទី២៧ ខែកញ្ញា ឆ្នាំ២០២២ អាជ្ញាធរត្រៀមរថយន្តក្រុងជិត ២០០គ្រឿងសម្រាប់ដឹកជញ្ជូនពលរដ្ឋក្នុងរាជធានីភ្នំពេញ និងពីភ្នំពេញទៅតាមបណ្តាខេត្តដោយមិនយកប្រាក់។ ប្រភពដដែលថា ការសម្រេចនេះដើម្បីជួយសម្រួលការចំណាយរបស់ប្រជាពលរដ្ឋ។
បន្ថែមពីនេះ រដ្ឋបាលរាជធានីភ្នំពេញ បានអំពាវនាវដល់ម្ចាស់ក្រុមហ៊ុន និងម្ចាស់រថយន្តដឹកអ្នកដំណើរទាំងអស់ ឱ្យរក្សាតម្លៃដឹកជញ្ជូននៅដដែល ដោយមិនត្រូវដំឡើងថ្លៃ ក្នុងឱកាសពិធីបុណ្យភ្ជុំបិណ្ឌខាងមុខនេះ ដើម្បីរួមចំណែកជួយសម្រួលដល់ជីវភាពរស់នៅរបស់ពលរដ្ឋ៕
