ប្រជាពលរដ្ឋប្រហែល៤០នាក់ រស់នៅជាប់បឹងតាមោក ក្នុងសង្កាត់សំរោង ខណ្ឌព្រែកព្នៅ រាជធានីភ្នំពេញ នៅថ្ងៃអង្គារនេះ បាននាំគ្នាតវ៉ាប្រឆាំងអាជ្ញាធរខណ្ឌដែលចុះរុះរើកន្លែងចិញ្ចឹមត្រីរបស់ពួកគាត់នៅលើផ្ទៃបឹងតាមោក ខណៈជម្លោះដីធ្លីមិនទាន់បានដោះស្រាយចប់នៅឡើយ។
អ្នកស្រី ផន សុខុម អាយុ៥០ឆ្នាំ ដែលកំពុងរស់នៅជាប់បឹងតាមោក ក្នុងសង្កាត់សំរោង ប្រាប់វីអូឌីថា នៅថ្ងៃអង្គារនេះ អាជ្ញាធរខណ្ឌព្រែកព្នៅបានដាក់កម្លាំងប្រជាការពារភូមិ កម្លាំងកងរាជអាវុធហត្ថ និងអាជ្ញាធរពាក់ព័ន្ធផ្សេងទៀតប្រហែល១០០នាក់ ចុះរុះរើស៊ងចិញ្ចឹមត្រីរបស់ប្រជាពលរដ្ឋនៅលើផ្ទៃបឹងតាមោក អស់ប្រហែល៣០ទៅ៤០កន្លែង។
ពលរដ្ឋរូបនេះបន្តថា ការរុះរើកន្លែងចិញ្ចឹមត្រីរបស់ប្រជាពលរដ្ឋនេះបានធ្វើឱ្យពលរដ្ឋខាតបង់ផលប្រយោជន៍ជាច្រើន ដូចជា សម្ភារចិញ្ចឹមត្រី ថវិកា និងផលត្រី ជាដើម។ អ្នកស្រីអះអាងថា នេះមិនមែនជាលើកទី១ទេដែលអាជ្ញាធរធ្វើបែបនេះ ខណៈមិនទាន់បានដោះស្រាយសំណងផលប៉ះពាល់ជូនពលរដ្ឋនៅឡើយ។
អ្នកស្រី ផន សុខុម ឱ្យដឹងថា ក្រោយប្រជាពលរដ្ឋផ្ទុះការតវ៉ា អាជ្ញាធរខណ្ឌបានផ្អាកសកម្មភាពរុះរើ និងហៅប្រជាពលរដ្ឋទៅជួបប្រជុំរកដំណោះស្រាយនៅសាលាខណ្ឌជាថ្មីទៀតនៅថ្ងៃនេះ។
អ្នកស្រីបន្ថែមថា៖ «អាជ្ញាធរគាត់មិនបានគិតពីផលប្រយោជន៍ប្រជាពលរដ្ឋ និងទុក្ខលំបាករបស់ប្រជាពលរដ្ឋនោះទេ។ គាត់គិតតែផលប្រយោជន៍របស់ក្រុម និងបក្សពួករបស់គាត់។ នៅសង្កាត់ខ្ញុំនេះ ប្រជាពលរដ្ឋកំពុងរងទុក្ខលំបាកខ្លាំងណាស់ ទី១ បញ្ហាលំនៅឋាន និងទី២ ការបាត់បង់កន្លែងអាស្រ័យផលដោយសាររឹបអូសយក»។
ពលរដ្ឋកំពុងរស់នៅជាប់បឹងតាមោកម្នាក់ទៀត កញ្ញា សៀ ដាវី និយាយថា ក្រោមគម្រោងអភិវឌ្ឍន៍នៅលើផ្ទៃបឹងតាមោករបស់រដ្ឋាភិបាល បានធ្វើឱ្យប្រជាពលរដ្ឋ២៥០គ្រួសាររងទុក្ខលំបាក ដោយសារបាត់បង់កន្លែងអាស្រ័យផល ហើយផ្ទះសម្បែងរបស់ពួកគាត់១០៩ខ្នងប្រឈមការបាត់បង់ និងរងការបណ្តេញចេញដោយបង្ខំ ជាដើម។
ពលរដ្ឋរូបនេះបន្តថា ការចុះរុះរើកន្លែងចិញ្ចឹមត្រីរបស់ប្រជាពលរដ្ឋនៅព្រឹកមិញនេះ ដឹកនាំដោយអភិបាលខណ្ឌព្រែកព្នៅដែលទើបឡើងកាន់តំណែងថ្មី គឺលោក ធឹម សំអាន ដើម្បីយកកន្លែងនោះចាក់ដីលុប សម្រាប់ឱ្យអ្នកមានលុយមានអំណាចធ្វើការអភិវឌ្ឍផ្សេងៗ។
អ្នកស្រីបន្ថែមថា៖ «អាជ្ញាធរបំពានរហូត គាត់ថានឹងដោះស្រាយឱ្យប្រជាពលរដ្ឋ ប៉ុន្តែពួកគាត់បានដាក់កម្លាំងមកឱ្យប្រជាពលរដ្ឋរុះរើផ្ទះ។ ឥលូវនេះ ពួកគាត់ចាប់ផ្តើមដាក់កម្លាំងមកហើយ មានទាំងកម្លាំងកងរាជអាវុធហត្ថ កម្លាំងប្រជាការពារភូមិ គ្រប់សព្វបែបយ៉ាង ចុះមកកាប់ស៊ងត្រី និងបំផ្លាញរោងចិញ្ចឹមត្រីរបស់ប្រជាពលរដ្ឋ ដែលមានបន្តិចបន្តួចសម្រាប់ចិញ្ចឹមជីវិតហ្នឹង គឺពួកអាជ្ញាធរទាំងអស់ហ្នឹងធ្វើគ្រប់បែបយ៉ាង គឺមិនមែនដើម្បីផលប្រយោជន៍របស់ប្រជាពលរដ្ឋ គឺដើម្បីបក្ខពួកគាត់ និងមន្ត្រីមានអំណាចមួយចំនួនប៉ុណ្ណោះ»។
វីអូឌី មិនអាចសុំការឆ្លើយតបពីអភិបាលខណ្ឌព្រែកព្នៅ លោក ធឹម សំអាន បានទេ នៅថ្ងៃអង្គារនេះ ដោយទូរសព្ទចូលគ្មានអ្នកទទួល។
កាលពីថ្ងៃទី១២ ខែកញ្ញា ឆ្នាំ២០២២ ក្រុមពលរដ្ឋបានជួបប្រជុំជាមួយតំណាងរដ្ឋបាលរាជធានីភ្នំពេញ និងតំណាងរដ្ឋបាលខណ្ឌព្រែកព្នៅ ដើម្បីស្វែងរកដំណោះស្រាយដីធ្លី។ ក្នុងជំនួបនោះ ពលរដ្ឋអះអាងថា អាជ្ញាធរបានបង្ខំឱ្យពួកគេដោះដូរដីទៅរស់នៅទីតាំងថ្មី ស្ថិតនៅសង្កាត់សំរោងដូចគ្នា ប៉ុន្តែក្រុមពលរដ្ឋមិនព្រមទទួលយកឡើយ ដោយទាមទារអភិវឌ្ឍន៍នៅនឹងកន្លែង។
យ៉ាងណា អភិបាលរងរាជធានីភ្នំពេញ លោក កើត ឆែ ធ្លាប់ប្រាប់វីអូឌីថា អាជ្ញាធរមិនអាចអភិវឌ្ឍនៅនឹងកន្លែងបានឡើយ ដោយសារពលរដ្ឋទាំងនោះរស់នៅលើចំណីផ្លូវលេខ១៥១ ដោយខុសច្បាប់ ដែលផ្លូវនេះ រដ្ឋាភិបាលគ្រោងពង្រីកឱ្យបាន៥០ម៉ែត្រ។
មន្ត្រីសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត ចាត់ទុកអាជ្ញាធរខណ្ឌព្រែកព្នៅចុះរុះរើកន្លែងចិញ្ចឹមត្រី និងបង្ខំឱ្យពលរដ្ឋដោះដូរទៅថ្មីកន្លែងនោះ ថាជាទង្វើខុសច្បាប់។ លោកបង្ហាញក្តីបារម្ភចំពោះអំពើហិង្សាផ្សេងៗដែលអាចកើតមានឡើងជាយថាហេតុណាមួយរវាងពលរដ្ឋនិងអាជ្ញាធរ ជុំវិញជម្លោះដីធ្លីនេះ ហើយប្រជាពលរដ្ឋនឹងប្រឈមការរងគ្រោះធ្ងន់ធ្ងរ និងរងការចោទប្រកាន់ពីបទព្រហ្មទណ្ឌផ្សេងៗជាដើម។
លោក វណ្ណ សុផាត បានទទូចដល់អាជ្ញាធរដោះស្រាយជូនពលរដ្ឋ ដោយឈរលើគោលការណ៍យុត្តិធម៌និងតម្លាភាព ដើម្បីកុំឱ្យប៉ះពាល់ដល់សិទ្ធិជាមូលដ្ឋានរបស់ប្រជាពលរដ្ឋ ក្នុងការទទួលបានលំនៅឋាន និងសិទ្ធិដីធ្លី ដែលធានាដោយច្បាប់ជាតិ និងអន្តរជាតិ ខណៈរដ្ឋាភិបាលបានកាត់ដីផ្ទៃបឹងតាមោករាប់ពាន់ហិកតាផ្តល់ទៅឱ្យស្ថាប័នរដ្ឋ ក្រុមហ៊ុនឯកជន និងអ្នកមានលុយមានអំណាចធ្វើកម្មសិទ្ធិ។
លោកបន្ថែមថា៖ «គាត់អត់ធ្វើតាមច្បាប់ទេ គាត់ធ្វើតាមបញ្ជាថ្នាក់លើ ហើយការធ្វើតាមបញ្ជាថ្នាក់លើ ដោយមិនគោរពច្បាប់នេះ គឺវាគ្រោះថ្នាក់ណាស់សម្រាប់ប្រជាពលរដ្ឋដែលរស់នៅក្នុងរបបប្រជាធិបតេយ្យ ជាពិសេសប្រជាពលរដ្ឋនឹងក្លាយទៅជាអ្នកគ្មានផ្ទះសម្បែង និងចំណាកស្រុកទៅប្រទេសផ្សេងៗ ហើយនឹងទទួលរងការគំរាមកំហែងនិងរងទារុណកម្មខាងការងារទៀត ហើយប្រជាពលរដ្ឋកាន់តែរងគ្រោះថែមទៀត»។
គួរបញ្ជាក់ថា បឹងតាមោក ឬបឹងកប់ស្រូវ មានផ្ទៃដីសរុប៣២៣៩ហិកតា ជាអាងស្ដុកទឹកកខ្វក់ និងរំដោះទឹកចេញពីរាជធានីភ្នំពេញ ហើយបឹងមួយនេះ ត្រូវបានរដ្ឋាភិបាលចេញអនុក្រឹត្យកាលពីដើមខែកុម្ភៈ ឆ្នាំ២០១៦ ដោយកំណត់យកបឹងធម្មជាតិមួយនេះជាសម្បតិ្តសាធារណៈរបស់រដ្ឋ។
បើយោងតាមអនុក្រឹត្យរបស់រដ្ឋាភិបាលដែលបានចេញជាបន្តបន្ទាប់ចាប់តាំងពីឆ្នាំ២០១៨ ដល់ចុងខែធ្នូ ឆ្នាំ២០២១ ផ្ទៃបឹងតាមោក សរុបជាង២ ០០០ហិកតាហើយ ត្រូវបានរដ្ឋាភិបាលកាត់ឬដោះដូរទៅឱ្យស្ថាប័នរដ្ឋ ក្រុមហ៊ុនឯកជន និងបុគ្គលឯកជនមួយចំនួនដែលគេដឹងថាជាអ្នកមានលុយមានអំណាច សម្រាប់សាងសង់អគារ និងហេដ្ឋារចនាសម្ពន្ធផ្សេងៗ ព្រមទាំងធ្វើជាកម្មសិទ្ធិផ្ទាល់ខ្លួន ជាដើម៕