គម្រោងបង្ការទឹកជំនន់សម្រេចបាន ៧០% ជុំវិញទីតាំងសំខាន់ៗដែលបានជន់លិចក្នុងរាជធានីភ្នំពេញរយៈពេល២ឆ្នាំចុងក្រោយនេះ ខណៈប្រជាពលរដ្ឋនៅជុំវិញស្ទឹងព្រែកត្នោតនៅតែប្រុងប្រយ័ត្នចំពោះភ្លៀងធ្លាក់ខ្លាំងក្នុងរដូវនេះ ស្របពេលកម្ពស់ទឹកកើនឡើង។
ក្រសួងធនធានទឹក និងឧតុនិយម សង្ឃឹមថា ការងារដែលបានធ្វើរហូតមកដល់ពេលនេះ គឺស្ដារស្ទឹង និងដៃស្ទឹងព្រែកត្នោត និងរៀបចំទ្វារទឹកដើម្បីរំដោះសម្ពាធទឹក ដែលអាចបង្ការមិនឱ្យមានការជន់លិចដូចកាលពីឆ្នាំ២០២០ និងឆ្នាំ២០២១ ដែលនៅពេលនោះ ប្រជាពលរដ្ឋរាប់រយគ្រួសាររស់នៅជុំវិញស្ទឹងព្រែកត្នោត ស្ថិតក្នុងខណ្ឌដង្កោ រាជធានីភ្នំពេញ ត្រូវបានជម្លៀសចេញ។
លោក អ៊ាង ចាន់ថន អាយុ៦៤ឆ្នាំ រស់នៅសង្កាត់គងណយ ចម្ងាយប្រហែល១០០ម៉ែត្រពីស្ទឹងព្រែកត្នោត បាននិយាយថា ជារឿងចៀសមិនផុតពីទឹកជំនន់។ លោកបន្តថា ទឹកជំនន់តែងតែកើតឡើងនៅចន្លោះចុងខែកញ្ញា ដល់ខែតុលា ស្ទើរតែរៀងរាល់ឆ្នាំ ហើយប៉ុន្មានឆ្នាំចុងក្រោយនេះ ទឹកជំនន់បានវាយលុកតំបន់នេះកាន់តែខ្លាំងឡើង។
លោកបន្ថែមថា៖ «កាលពីឆ្នាំទៅ ផ្ទះរបស់ខ្ញុំលិចជិតមួយម៉ែត្រកន្លះ អស់រយៈពេលមួយសប្ដាហ៍ ដោយសារភ្លៀងធ្លាក់ខ្លាំងប៉ុន្មានថ្ងៃជាប់គ្នា។ ប៉ុន្តែសំណាងល្អ យើងមានអាហារគ្រប់គ្រាន់ ក៏ដូចជាតម្រូវការជាមូលដ្ឋាន ដើម្បីរស់នៅបានសមរម្យ។ យើងដឹងថាទឹកមកដល់ហើយ ដូច្នេះយើងបានត្រៀមទុកជាមុន»។
លោកបន្តថា កាលពីមុន គាត់ចិញ្ចឹមសត្វ និងត្រូវយកសត្វចេញពីផ្ទះទៅរកទីទួលមានសុវត្ថិភាពនៅពេលមានទឹកជំនន់។ លោកថា ការរស់នៅជាមួយទឹកជំនន់មិនមែនជាការងាយស្រួលនោះទេ។
លោកបន្ថែមថា៖ «នៅពេលមានទឹកជំនន់ បន្ទប់ទឹករបស់យើងលិចទាំងស្រុង ដូច្នេះយើងត្រូវដើរលុយទឹកទៅសុំចូលបន្ទប់ទឹកអ្នកជិតខាង»។
គិតត្រឹមសប្ដាហ៍នេះ លោក អ៊ាង ចាន់ថន បានសង្កេតឃើញថា កម្ពស់ទឹកព្រែកត្នោតកើនឡើងប្រហែលកន្លះម៉ែត្រពីកម្រិតធម្មតា ដែលមិនទាន់មានការព្រួយបារម្ភនៅឡើយ។ ទោះយ៉ាងណា លោកនៅតែមានការប្រុងប្រយ័ត្ន បើទោះបីជាអាជ្ញាធរបានសាងសង់ហេដ្ឋារចនាសម្ពន្ធមួយចំនួនដើម្បីបង្ការក៏ដោយ។
លោកបន្ថែមថា៖ «ខ្ញុំគិតថា តំបន់របស់យើងនៅតែអាចរងគ្រោះដោយទឹកជំនន់ ប្រសិនបើភ្លៀងធ្លាក់ខ្លាំងដូចឆ្នាំមុន បើទោះជាផ្នែកខ្លះនៃស្ទឹងត្រូវបានស្ដារនៅពេលនេះក៏ដោយ។ យើងកំពុងស្ដាប់ព័ត៌មានដោយយកចិត្តទុកដាក់។ បើមានភ្លៀងធ្លាក់ខ្លាំងនៅខេត្តកំពង់ស្ពឺ ប្រាកដណាស់ ស្ទឹងព្រែកត្នោតនឹងបង្កឱ្យមានទឹកជំនន់។ យើងត្រៀមខ្លួនជានិច្ច»។
ស្ទឹងព្រែកត្នោត មានប្រភពចេញពីភ្នំនៅខេត្តកំពង់ស្ពឺ ជាប់ព្រំប្រទល់ខេត្តកោះកុង។ របាយការណ៍ឆ្នាំ២០១៩ របស់កម្មវិធីអភិវឌ្ឍន៍អង្គការសហប្រជាជាតិ (UNDP) បានរកឃើញហានិភ័យកាន់តែខ្លាំងនៃទឹកជំនន់ ដោយសារការកាប់បំផ្លាញព្រៃឈើ និងការអភិវឌ្ឍលំនៅឋាន។
ថ្លែងក្នុងសន្និសីទសារព័ត៌មានកាលពីខែមុន លោក ម៉ៅ ហាក់ អនុប្រធានអាជ្ញាធរទន្លេសាប នៃក្រសួងធនធានទឹក និងឧតុនិយម មានប្រសាសន៍ថា គម្រោងបង្ការទឹកជំនន់ និងសាងសង់ប្រព័ន្ធធារាសាស្រ្តស្ទឹងព្រែកត្នោត ដែលផ្តល់មូលនិធិដោយប្រទេសចិន នៅរាជធានីភ្នំពេញ ខេត្តកណ្តាល តាកែវ និងខេត្តកំពង់ស្ពឺ សម្រេចបានជិត ៧០% ហើយ។
លោកបន្ថែមថា៖ «អាទិភាពរបស់យើងនៅពេលនេះ គឺបង្ការរាជធានីភ្នំពេញ និងផ្នែកខ្លះនៃខេត្តកណ្តាល កុំឱ្យជន់លិចធ្ងន់ធ្ងរដោយស្ទឹងព្រែកត្នោត នៅខែក្រោយនេះ។ យើងសង្ឃឹមថានឹងមិនមានទឹកជំនន់កើតឡើងឡើយ»។
លោក ម៉ៅ ហាក់ ប្រាប់វីអូឌីនៅសប្តាហ៍នេះថា គម្រោងនេះ រួមមាន ការស្ដារឡើងវិញនូវស្ទឹងព្រែកត្នោតប្រវែង២៦គីឡូម៉ែត្រ ព្រមទាំងដៃស្ទឹងផងដែរ។
លោកបន្ថែមថា៖ «គម្រោងនេះនឹងត្រូវបញ្ចប់នៅឆ្នាំក្រោយ និងអាចរំដោះទឹកបាន១ ៣៥០ម៉ែត្រគូបក្នុងមួយវិនាទីតាមទ្វារទឹក ដែលស្មើនឹងបរិមាណទឹកលិចកាលពីឆ្នាំមុន»។
លោកបន្តថា ក្រសួងកំពុងយកចិត្តទុកដាក់លើកត្តាអាកាសធាតុ និងតាមដានស្ថានការណ៍នៅស្ទឹងព្រែកត្នោត។
លោកបន្ថែមថា៖ «អ្វីដែលយើងបានសាងសង់ឥលូវនេះ ខ្ញុំគិតថាយើងអាចបង្ការទឹកជំនន់បានកាន់តែប្រសើរ»។
ចៅសង្កាត់គងណយ លោក អ៊ុន សុខរុំ មានប្រសាសន៍ថា ប្រជាពលរដ្ឋចំនួន៤៧៣គ្រួសារ ស្មើនឹង២ ១៦០នាក់ មកពីភូមិទាំង៤ នៃសង្កាត់គងណយ បានរងផលប៉ះពាល់ដោយទឹកជំនន់កាលពីឆ្នាំមុន ក្នុងនោះមាន១១គ្រួសារត្រូវបានជម្លៀសចេញពីផ្ទះសម្បែងរបស់ពួកគេ។
លោកថា យើងមិនទាន់អាចនិយាយថានឹងមិនមានបញ្ហាអ្វីកើតឡើងនោះទេ។
លោកបន្ថែមថា៖ «យើងមិនអាចធានា១០០% ឡើយ ដោយសារទឹកស្ទឹងព្រែកត្នោតបានហក់ឡើងប៉ុន្មានថ្ងៃចុងក្រោយនេះ នៅភូមិគងណយ។ យើងនឹងបន្តតាមដាន»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ https://vodenglish.news/flood-prone-prek-tnaut-under-close-watch-from-residents-authorities/