គណបក្សក្រៅរដ្ឋាភិបាលចំនួន៤ គ្រោងលើកយកបញ្ហាលំហសេរីភាពខាងនយោបាយដែលរងការរឹតត្បិត ទៅជជែកជាមួយក្រសួងមហាផ្ទៃ នៅថ្ងៃស្អែកនេះ ខណៈបក្សទាំងនោះមើលឃើញថា អ្នកនយោបាយមួយចំនួនបានរងបណ្ដឹងនៅតុលាការ ក្នុងពេលពួកគេលើកឡើងពីភាពប្រឈមក្នុងការអនុវត្តសិទ្ធិនយោបាយដែលស្របទៅតាមច្បាប់ដូចមានចែងនៅក្នុងរដ្ឋធម្មនុញ្ញ។
ប្រាប់វីអូឌីនៅថ្ងៃពុធនេះ លោក យ៉េង វីរៈ ប្រធានគណបក្សប្រជាធិតេយ្យមូលដ្ឋាន ឱ្យដឹងថា នៅពេលក្រុមអ្នកនយោបាយទាំង៤គណបក្សជួបជាមួយក្រសួងមហាផ្ទៃ គឺពួកគេនឹងជម្រាបស្ថាប័នអនុវត្តច្បាប់មួយនេ អំពីទុក្ខលំបាកក្នុងការអនុវត្តកម្មវិធីនយោបាយ ជាពិសេសលំហសេរីភាពខាងនយោបាយ របស់បក្សនៅក្រៅរដ្ឋាភិបាល។
លោកបន្តថា៖ «និយាយទៅ នៅពេលដែលយើងជួបជាមួយ គ.ជ.ប យើងនិយាយពីប្រព័ន្ធបោះឆ្នោត។ ដោយឡែក ពេលដែលយើងទៅជួបក្រសួងមហាផ្ទៃ យើងនឹងលើកអំពីសំណើការលើកស្ទួយសេរីភាពនយោបាយនៅកម្ពុជាយើង»។
គណបក្សនយោបាយទាំង៤ ដែលនឹងត្រូវជួបជាមួយក្រសួងមហាផ្ទៃ នៅថ្ងៃព្រហស្បតិ៍ស្អែកនេះ រួមមាន គណបក្សឆន្ទៈខ្មែរ គណបក្សកែទម្រង់កម្ពុជា គណបក្សភ្លើងទៀន និងគណបក្សប្រជាធិបតេយ្យមូលដ្ឋាន។ នៅក្នុងខ្លឹមសារនៃលិខិតរួមគ្នាដែលតំណាងគណបក្សនយោបាយដាក់ទៅក្រសួងមហាផ្ទៃ កាលពីថ្ងៃទី១៧ ខែសីហា ឆ្នាំ២០២២ គឺសុំជួបរដ្ឋមន្រ្តីក្រសួងមហាផ្ទៃ លោក ស ខេង ដើម្បីបង្ហាញអំពីសំណើលើកស្ទួយសេរីភាពខាងនយោបាយនៅកម្ពុជា។
ចំណែកលោក ចេប គីមអ៊ាង អនុប្រធានគណបក្សភ្លើងទៀន បញ្ជាក់ថា ក្រៅពីការជំរុញឱ្យមានការលើកកម្ពស់លំហសេរីភាពខាងនយោបាយ គណបក្សទាំង៤ក៏នឹងលើកយករបៀបវារៈមួយចំនួនផ្សេងទៀត រួមទាំងដំណើរការបោះឆ្នោត និងកិច្ចសហប្រតិបត្តិល្អរវាងក្រសួងមហាផ្ទៃនិងបក្សក្រៅរដ្ឋាភិបាល មកជជែកជាមួយក្រសួងមហាផ្ទៃផងដែរ។
លោកបន្តថា៖ «គណបក្សទាំង៤ បានធ្វើលិខិតទៅក្រសួងមហាផ្ទៃ ស្ដីពី ជំនួបរវាងក្រសួងមហាផ្ទៃ ស្តីពីសេរីភាពនៅក្នុងកិច្ចការនយោបាយ។ អ៊ីចឹងហើយក្រសួងអនុញ្ញាតឱ្យយើងទៅជួប ប៉ុន្តែយើងលើកប្រធានបទច្រើនជាងនេះទៀត ចង់បង្កើតឱ្យមានយន្តការទំនាក់ទំនងរវាងក្រសួងមហាផ្ទៃជាមួយបក្សនៅក្រៅរដ្ឋាភិបាល ដោះស្រាយរាល់បញ្ហាផ្សេងៗដែលប្រឈមនៅនឹងមូលដ្ឋានរាល់ពេលបោះឆ្នោតម្តងៗ។ នេះជាគោលដៅដែលយើងត្រូវជួបក្រសួង ហើយក្រសួងក៏អនុញ្ញាតហើយដែរ»។
គណបក្សនយោបាយដែលនៅក្រៅរដ្ឋាភិបាលទាំង៤ ដែលរួមគ្នាចងសម្ពន្ធភាពនៅមុនការបោះឆ្នោតថ្នាក់ជាតិមកដល់នេះ ធ្លាប់ស្វែងរកកិច្ចពិគ្រោះយោបល់លើប្រធានបទផ្សេងៗគ្នារួចមកហើយពីស្ថាប័នជាតិរៀបចំការបោះឆ្នោត និងរដ្ឋសភា។ ក៏ប៉ុន្តែការសុំជួបពីតំណាងបក្សនយោបាយជាមួយរដ្ឋសភា ត្រូវបរាជ័យ ដោយតំណាងរដ្ឋសភាចាត់ទុកការស្នើសុំជួបពីបក្សក្រៅរដ្ឋាភិបាលនេះថា មិនមានចែងនៅក្នុងច្បាប់ និងលក្ខន្តិកៈ នៃបទបញ្ជាផ្ទៃក្នុងរបស់រដ្ឋសភាឡើយ។
ស្ថាបនិកនៃអង្គការអភិវឌ្ឍន៍ផ្នត់គំនិត លោក សេក សុជាតិ យល់ឃើញថា ជំនួបនេះទំនងជាបានផលតិចតួច។ លោកបន្តថា មែនទែនទៅ ក្រសួងមហាផ្ទៃមិនមែនជាស្ថាប័នដែលធ្វើសេចក្តីសម្រេចចិត្តចុងក្រោយទេ ហើយចង់ឬមិនចង់ សំណើទាំងនេះអាចនឹងត្រូវបានរដ្ឋាភិបាលផ្អឹបទុកក៏ថាបាន។
បើតាមលោក សេក សុជាតិ គោលការណ៍ដែលបក្សនៅក្រៅរដ្ឋាភិបាលមើលឃើញថាគួរមានការកែលម្អនេះ មិនមែនរដ្ឋាភិបាលឬអង្គភាពចំណុះឱ្យរដ្ឋាភិបាលមើលមិនឃើញទេ ប៉ុន្តែវាអាស្រ័យលើឆន្ទៈខាងនយោបាយច្រើនជាង ហើយបើធ្វើទៅ ថាតើគេទទួលបានផលចំណេញដែរទេ។
លោកបន្តថា៖ «ខ្ញុំយល់ថា ជំនួបនេះនឹងមិនមានលទ្ធផលច្រើនទេ។ មូលហេតុអ្វីដែលបក្សទាំង៤ យកញត្តិ ឬនាំសារ ឬក៏បានពិភាក្សាគ្នាដើម្បីដាក់ចេញនូវផែនការរួមមួយ ដើម្បីស្នើឱ្យក្រសួងមហាផ្ទៃពិនិត្យ ឬក៏សម្រេចចំណុចអវិជ្ជមានហ្នឹង គឺឥតមានឥទ្ធិពលអ្វីធំ ឬក៏អាចធ្វើឱ្យបក្សកាន់អំណាចធ្វើតាមនោះទេ។ ចំណុចមួយទៀត យើងដឹងហើយថា ក្រសួងមហាផ្ទៃមិនមែនជាអ្នកសម្រេចចិត្តចុងក្រោយទេ។ នៅក្នុងករណីបែបនេះ គឺមានតែប្រមុខរាជរដ្ឋាភិបាលដែលជានាយករដ្ឋមន្រ្តី ឬក៏មេដឹកនាំអង្គនីតិប្រតិបត្តិ »។
គេសង្កេតឃើញថា ការផ្តួចផ្តើមគំនិតដែលនាំឱ្យអ្នកនយោបាយនៅក្រៅរដ្ឋាភិបាលទាំង៤ លើកឡើងពីភាពប្រឈមមួយចំនួននេះ ដោយសារតែក្រោយពីការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ កន្លងទៅនេះ ពួកគេបានរកឃើញចំណុចមិនប្រក្រតីដែលកើតចេញពីលំហសេរីភាពខាងនយោបាយ និងដំណើរការបោះឆ្នោត ដែលមិនអាចជឿទុកចិត្តបាន នៅតែបន្តកើតឡើង។
ការបោះឆ្នោតជ្រើសរើសក្រុមប្រឹក្សាឃុំសង្កាត់ កាលពីថ្ងៃទី៥ ខែមិថុនា ឆ្នាំ២០២២ បង្ហាញថា គណបក្សភ្លើងទៀន ឈរលំដាប់លេខរៀងទី២ ដែលមានសំឡេងជាង ១លាន ៦សែន ខណៈបក្សកាន់អំណាចទទួលបាន ៥លាន ៣សែនសំឡេង ឈរលំដាប់លេខរៀងទី១។ ក្រៅពីនេះ នៅសល់ប្រមាណជាង២ម៉ឺនសំឡេងទៀត ត្រូវធ្លាក់ទៅលើគណបក្សនយោបាយផ្សេងទៀតដែលចូលរួមការប្រកួតប្រជែងនៅពេលនោះ៕
