សហរដ្ឋអាមេរិក បច្ចុប្បន្នកំពុងតែពិចារណាជម្រើសទាំងឡាយក្នុងការដាក់ជាកញ្ចប់ទណ្ឌកម្មប្រឆាំងនឹងចិន ដើម្បីរារាំងប្រទេសមួយនេះពីការឈ្លានពានតៃវ៉ាន់បន្ថែមទៀត ស្របពេលដែលកោះតៃវ៉ាន់ក៏កំពុងតែស្នើឱ្យសហភាពអឺរ៉ុបចាត់វិធានការដូចគ្នានេះលើចិនផងដែរ។ នេះបើតាមការបង្ហើបឱ្យដឹងពីប្រភពមួយចំនួនដែលត្រូវបានយកមកចុះផ្សាយបន្តដោយទីភ្នាក់ងារសារព័ត៌មាន Reuters។
ប្រភពដដែលបន្តថា ករណីទាំងនេះត្រូវបានធ្វើឡើងដើម្បីឆ្លើយតបទៅនឹងការព្រួយបារម្ភនៃការឈ្លានពានរបស់ចិនដែលហាក់កំពុងតែមានការកើនឡើងនៅក្នុងច្រកសមុទ្រតៃវ៉ាន់។
ទោះជាយ៉ាងណា ប្រភពរូបនោះពុំបានផ្តល់ព័ត៌មានលម្អិតណាមួយថាតើវិធានការអ្វីដែលកំពុងតែត្រូវបានពិចារណានោះទេ ខណៈទីភ្នាក់ងារសារព័ត៌មាន Reuters ក៏មិនអាចទាក់ទង ដើម្បីសុំការអត្ថាធិប្បាយពីសេតវិមាន ក្រសួងការបរទេសចិន ឬស្ថានទូតចិនប្រចាំនៅទីក្រុងវ៉ាស៊ីនតោនបានផងដែរ។
ទាក់ទិននឹងករណីនេះ អតីតមន្ត្រីជាន់ខ្ពស់មួយរូបរបស់ក្រសួងពាណិជ្ជកម្មអាមេរិក លោកស្រី Nazak Nikakhtar បានលើកឡើងថា៖ «ការដាក់ទណ្ឌកម្មលើប្រទេសចិន គឺអាចនឹងមានភាពស្មុគស្មាញជាងការដាក់ទណ្ឌកម្មលើប្រទេសរុស្ស៊ី ដោយសារតែសហរដ្ឋអាមេរិក និងសម្ពន្ធមិត្តមានការជាប់ពាក់ព័ន្ធយ៉ាងទូលំទូលាយជាមួយសេដ្ឋកិច្ចចិន»។
គួរបញ្ជាក់ថា ភាពតានតឹងរវាងតៃវ៉ាន់ និងចិន បានកើនឡើងខ្លាំងក្នុងរយៈពេលចុងក្រោយនេះ ខណៈដែលចិននៅតែបន្តអះអាងថា តៃវ៉ាន់គឺជាទឹកដីរបស់ខ្លួន។
ជាការឆ្លើយតប តៃវ៉ាន់ធ្លាប់បានលើកឡើងថា ខ្លួននឹងបន្តពង្រឹងការការពាររបស់ខ្លួន ដើម្បីធានាឱ្យបានថា គ្មាននរណាម្នាក់អាចបង្ខំឱ្យកោះនេះ ទទួលយកផ្លូវដែលចិនបានរៀបចំដោយមិនផ្តល់សេរីភាពនិងប្រជាធិបតេយ្យនោះទេ ខណៈសហរដ្ឋអាមេរិកក៏ធ្លាប់បានអះអាងនាពេលកន្លងទៅថា ខ្លួននឹងគិតគូរអំពីការការពារដែនកោះដែលចិនអះអាងថាជាទឹកដីរបស់ខ្លួនមួយនេះ៕
