មន្ត្រីផ្នែកសិទ្ធិមនុស្សនៅខេត្តឧត្ដរមានជ័យ ឱ្យដឹងថា មានពលរដ្ឋចំនួន៧នាក់ត្រូវបានចាប់ខ្លួនជាបន្តបន្ទាប់ ពាក់ព័ន្ធជម្លោះដីធ្លីជាមួយក្រុមហ៊ុនចម្ការកៅស៊ូមួយ នៅឃុំត្រពាំងប្រាសាទ ស្រុកត្រពាំងប្រាសាទ។
កាលពីថ្ងៃទី១២ ខែកញ្ញា ឆ្នាំ២០២២ មានការផ្សព្វផ្សាយតាមបណ្ដាញសង្គមអំពីសកម្មភាពប៉ះទង្គិចគ្នាមួយរវាងកម្លាំងសន្តិសុខនិងកម្លាំងសមត្ថកិច្ចការពារដីក្រុមហ៊ុនចម្ការកៅស៊ូ «សុខ សំណាង» ជាមួយប្រជាពលរដ្ឋដែលកំពុងចូលកាន់កាប់ និងអាជ្ញាធរ នៅលើដីមានជម្លោះ ស្ថិតនៅភូមិអូរក្រូច ឃុំត្រពាំងប្រាសាទ ស្រុកត្រពាំងប្រាសាទ។
ក្នុងវីដេអូឃ្លីបចំនួន៣ ដែលវីអូឌីទទួលបាន គឺក្រុមប្រជាពលរដ្ឋប្រដាប់ដោយដំបង និងកាំបិត បានរុញច្រានជាមួយសមត្ថកិច្ចជាច្រើននាក់ ប្រដាប់ដោយកាំភ្លើង នៅលើដីកំពុងមានជម្លោះនោះ។
មន្រ្តីការពារសិទ្ធិមនុស្សនៅសមាគមអាដហុកប្រចាំខេត្តឧត្ដរមានជ័យ លោក ស្រី ណារ៉េន ដែលកំពុងស្រាវជ្រាវករណីជម្លោះដីធ្លីនេះ បានបង្ហាញការព្រួយបារម្ភចំពោះការកើតឡើងនូវអំពើហិង្សាធ្ងន់ធ្ងរណាមួយជាងនេះ ប្រសិនបើអាជ្ញាធរមិនពន្លឿនការដោះស្រាយបញ្ចប់ទេនោះ។ លោកអះអាងថា ពលរដ្ឋចំនួន៧នាក់ត្រូវបានសមត្ថកិច្ចចាប់ខ្លួនបញ្ជូនទៅតុលាការ និងបានឃុំខ្លួនជាបន្តបន្ទាប់ ក្នុងរឿងជម្លោះដីធ្លីនេះ។
មន្ត្រីសិទ្ធិមនុស្សរូបនេះបានអំពាវនាវដល់អាជ្ញាធរពាក់ព័ន្ធ ជាពិសេសអាជ្ញាធរខេត្តឧត្តរមានជ័យ ត្រូវសម្របសម្រួលដោះស្រាយករណីនេះដោយសន្តិវិធី ចៀសវាងការប្រើអំពើហិង្សា ការចាប់ខ្លួន និងចោទប្រកាន់ពលរដ្ឋ បើទោះបីពលរដ្ឋទាំងនោះបានចាញ់បោកមេខ្យល់ទៅអាស្រ័យផលលើដីរបស់ក្រុមហ៊ុនក៏ដោយ។
លោកបន្ថែមថា៖ «សុំឱ្យខាងអាជ្ញាធរហ្នឹងកុំឱ្យប្រើអំពើហិង្សាទៅលើប្រជាពលរដ្ឋ ដោយដោះស្រាយតាមសន្តិវិធីជូនពួកគាត់។ កាលណាដោះទៅដោយប្រើហិង្សា អាហ្នឹងវាអាចប៉ះទង្គិចគ្នាដោយប្រការណាមួយម្តងទៀតជាមិនខានទេ។ បើសិនជាការដោះស្រាយបានលទ្ធផលដោយប្រើអំពើហិង្សា វាមិនល្អទេ ហើយភាគីណាមួយក៏មិនពេញចិត្តដែរ ដែលវាបង្កឱ្យមានភាពអយុត្តិធម៌»។
អ្នកស្រី សំ សុភ័ក្រ្ត មានស្រុកកំណើតនៅខេត្តសៀមរាប អះអាងថា ស្វាមីរបស់អ្នកស្រីឈ្មោះ ណែត ហ៊ន ត្រូវបានសមត្ថកិច្ចចាប់ខ្លួន និងបញ្ជូនទៅឃុំខ្លួននៅពន្ធនាគារ កាលពីថ្ងៃទី១០ ខែកញ្ញានេះ ក្រោយពីគ្រួសារគាត់បានទៅរស់នៅ និងអាស្រ័យផលដាំដំឡូងមីនៅលើដីជម្លោះ ក្នុងខេត្តឧត្ដរមានជ័យ រយៈពេល៨ឆ្នាំមកហើយ។ អ្នកស្រីថា ករណីសមត្ថកិច្ចចាប់ខ្លួនស្វាមីគាត់នោះ គឺពុំមានដីកា ឬការជូនដំណឹងណាមួយពីអាជ្ញាធរនោះឡើយ។
ពលរដ្ឋរូបនេះបន្តថា គ្រួសារគាត់ទៅអាស្រ័យផលលើដីមានជម្លោះនោះតាមរយៈមេខ្យល់នាំទៅ ដោយមានការបង់ប្រាក់បន្តិចបន្តួច ហើយមិនដឹងថាកន្លែងដីអាស្រ័យផលនោះជាដីរបស់ក្រុមហ៊ុនឡើយ។ អ្នកស្រីថា ការអាស្រ័យផលរយៈពេល៨ឆ្នាំមកនេះ គឺពុំមានអាជ្ញាធរណាមកហាមឃាត់ឡើយ ទើបតែនៅដើមឆ្នាំ២០២២នេះ អាជ្ញាធរប្រាប់ថា ពួកគាត់កាន់កាប់លើដីរបស់ក្រុមហ៊ុនដោយខុសច្បាប់។
អ្នកស្រីបន្ថែមថា៖ «ប្រសិនជាអាជ្ញាធរចុះមកចាប់ មានការកោះហៅអី ក៏ពួកខ្ញុំអស់ចិត្តដែរ ថាប្តីខ្ញុំខុសអីៗ! តែការចុះមកចាប់នេះអត់មានដីកាសោះ អ៊ីចឹងខ្ញុំមិនអស់ចិត្តទេ ហើយខ្ញុំអំពាវនាវដល់អភិបាលខេត្ត និងសម្តេច ហ៊ុន សែន ជួយដោះស្រាយរឿងនេះឱ្យពួកខ្ញុំផង ព្រោះពួកខ្ញុំជាពលរដ្ឋស្លូតត្រង់ និងក្រីក្រណាស់»។
ពលរដ្ឋក្នុងរឿងជម្លោះដីធ្លីនេះម្នាក់ទៀត អ្នកស្រី ផ្លេន ធី និយាយថា គ្រួសារអ្នកស្រីបានចូលទៅរស់នៅ និងអាស្រ័យផលលើដីមានជម្លោះតាំងពីឆ្នាំ២០១៣ ដោយដាំដំឡូមី ចេក ខ្នុរ និងដំណាំហូបផ្លែផ្សេងទៀត ដោយមិនធ្លាប់មានអាជ្ញាធរណាចុះមកហាមឃាត់ឡើយ ទើបតែនៅដើមឆ្នាំ២០២២នេះ អាជ្ញាធរ និងតំណាងក្រុមហ៊ុនចម្ការកៅស៊ូ សុខ សំណាង បានមកអះអាងថាជាដីក្រុមហ៊ុនទៅវិញ។
អ្នកស្រីអះអាងថា បច្ចុប្បន្ន មានពលរដ្ឋប្រហែល៣៧០គ្រួសារកំពុងអាស្រ័យផលលើដីមានជម្លោះនោះ ក្នុងនោះមានពលរដ្ឋមួយចំនួនបានរងនូវអំពើហិង្សា និងការចាប់ខ្លួន ក្នុងពេលដែលសន្តិសុខក្រុមហ៊ុន និងសមត្ថកិច្ចចុះទៅបណ្តេញពលរដ្ឋចេញពីដីជម្លោះនោះ។ អ្នកស្រីថា ពលរដ្ឋមានដីចន្លោះ២ហិកតាទៅ៥ហិកតាប៉ុណ្ណោះក្នុង១គ្រួសារ សម្រាប់អាស្រ័យផល។
អ្នកស្រីបន្ថែមថា៖ «មេការខាងក្រុមហ៊ុន គាត់មកអះអាងថា ដីហ្នឹងជាដីរបស់គាត់។ គាត់មករករឿងប្រជាជន គាត់មានកាំភ្លើង គាត់មានតាំងពីដាវ ខ្នោះដៃ មានពូថៅ! ហើយម្សិលមិញនេះ គាត់មានដំបង និងកាំភ្លើងមកទៀត។ គាត់គំរាមកំហែងប្រជាជន ឱ្យប្រជាជនរើផ្ទះចេញ ដកដំឡូងចេញ កុំឱ្យមកនៅលើដីគេ។ ហេតុអីគាត់ទើបមករករឿងយើងនៅពេលនេះ? ម៉េចមិនមករករឿងតាំងពីដំបូង? យើងធ្វើដីបានវាលហើយទើបមករករឿងអ៊ីចឹង»។
អធិការនគរបាលស្រុកត្រពាំងប្រាសាទ លោក អ៊ូច ម៉ៅ មានប្រសាសន៍ថា សមត្ថកិច្ចបានចាប់ខ្លួនមនុស្ស៧នាក់ទៅតាមដីការបស់តុលាការ និងបណ្តឹងរបស់ក្រុមហ៊ុនដែលប្តឹងពលរដ្ឋថាទន្ទ្រានយកដីរបស់ខ្លួន។
ចំពោះការប៉ះទង្គិចគ្នាវិញ លោក អ៊ូច ម៉ៅ បានច្រានចោល ដោយថា អាជ្ញាធរ ឬសមត្ថកិច្ច មិនបានប្រើប្រាស់ហិង្សាណាមួយ ឬទៅគំរាមកំហែងប្រជាពលរដ្ឋឡើយ។ លោកបន្តថា កាលពីថ្ងៃទី១២ ខែកញ្ញានេះ សមត្ថកិច្ចបានចុះទៅបង្ក្រាបករណីប្លន់ម៉ូតូតាមបណ្តឹងរបស់ភាគីក្រុមហ៊ុន នៅតំបន់នោះ ប៉ុន្តែពេលសមត្ថកិច្ចដល់កន្លែងកើតហេតុ ស្រាប់តែមានក្រុមពលរដ្ឋប្រដាប់ដោយកាំបិត និងពូថៅ ស្ទុះមករកសមត្ថកិច្ច ហើយសមត្ថកិច្ចបានដកថយទៅវិញ និងមិនមានបង្ករបួសស្នាមអ្វីនោះទេ។
លោកបន្ថែមថា៖ «ការចាប់ប្រជាពលរដ្ឋជាបន្តបន្ទាប់នោះ គឺយើងធ្វើឡើងតាមសាលក្រមរបស់តុលាការ ហើយតុលាការបានចេញដីកាចាប់ខ្លួនប្រជាពលរដ្ឋជាបន្តបន្ទាប់ហ្នឹង ដោយសារពួកគាត់ចូលទន្ទ្រានដីក្រុមហ៊ុន សុខ សំណាង តាមការញុះញង់របស់មេខ្លោង។ ហើយក្រុមហ៊ុនរបស់ សុខ សំណាង នេះ ជាកម្មសិទ្ធិស្របច្បាប់ដែលចុះបញ្ជីត្រឹមត្រូវ»។
អភិបាលខេត្តឧត្តរមានជ័យ លោក ប៉ែន កុសល្យ មានប្រសាសន៍ថា លោកមិនចង់ឃើញការប៉ះទង្គិចគ្នា ឬហិង្សាណាមួយរវាងពលរដ្ឋ និងសមត្ថកិច្ច ក្នុងទឹកដីដែលលោកកំពុងគ្រប់គ្រងនោះទេ ប៉ុន្តែសំណុំរឿងនេះបានធ្លាក់ដល់ដៃតុលាការ ដែលហួសពីដែនសមត្ថកិច្ចរបស់លោកក្នុងការដោះស្រាយ។
លោកបន្តថា ប្រសិនបើពលរដ្ឋទាំងនោះជាប្រជាពលរដ្ឋក្រីក្រពិតប្រាកដមែន និងបានចូលទៅរស់នៅលើដីជម្លោះយូរឆ្នាំ ដោយមានឯកសារ ឬមានភស្តុតាងគ្រប់គ្រាន់ នោះពួកគេអាចដាក់សំណើទៅរដ្ឋបាលខេត្ត ដើម្បីឱ្យលោកសម្របសម្រួលជាមួយក្រុមហ៊ុន ដើម្បីកាត់ឆ្វៀលជូនពួកគេ។
លោកបន្ថែមថា៖ «តែពេលនេះ សំណុំរឿងនេះ វាបានទៅដល់ដៃតុលាការហើយ វាហួសពីសមត្ថភាពយើងក្នុងការដោះស្រាយ។ ប្រសិនបើបងប្អូនប្រជាពលរដ្ឋគាត់ប្តឹងមកយើងទៅ យើងអាចទៅសម្របសម្រួលជូនគាត់ ហើយថាគាត់មានអីសម្អាង! គាត់រស់នៅលើដីហ្នឹងយ៉ាងម៉េច! យើងអាចកាត់ឆ្វៀលបាន ប្រសិនជាពួកគាត់មានឯកសារច្បាស់លាស់»។
វីអូឌី មិនអាចរកការឆ្លើយតបពីលោក ឃុត ចន្ថា ដែលអ្នកភូមិប្រាប់ថាជាតំណាងក្រុមហ៊ុន សុខ សំណាង បានទេ នៅថ្ងៃព្រហស្បតិ៍នេះ។
ប៉ុន្តែសារព័ត៌មានក្នុងស្រុកមួយបានស្រង់សម្តីតំណាងក្រុមហ៊ុនរូបនេះយកមកចុះផ្សាយកាលពីខែកុម្ភៈ ឆ្នាំ២០២២នេះថា មានពលរដ្ឋជិត ២០០គ្រួសារ មកពីបណ្តាខេត្តផ្សេងៗ បានចូលទៅទន្ទ្រានកាន់កាប់លើដីរបស់ក្រុមហ៊ុន ស្ថិតនៅភូមិអូរក្រូច ឃុំត្រពាំងប្រាសាទ ស្រុកត្រពាំងប្រាសាទ ខេត្តឧត្តរមានជ័យ។
កាលពីខែមិថុនា ឆ្នាំ២០១២ រដ្ឋាភិបាលបានចេញអនុក្រឹត្យមួយកាត់ដីទំហំ១ ៨៦៥ហិកតា ពីដែនជម្រកសត្វព្រៃគូលែនព្រហ្មទេព ស្ថិតនៅភូមិសាស្ត្រខេត្តឧត្តរមានជ័យ ដើម្បីសម្បទានទៅឱ្យក្រុមហ៊ុន សុខ សំណាង វិនិយោគលើវិស័យដំណាំកសិ-ឧស្សាហកម្ម និងដំណាំកៅស៊ូ៕