ក្រុមអាជីវករនៅក្នុងតំបន់រមណីយដ្ឋានអង្គរ បានប្រមូលផ្ដុំគ្នាស្នើសុំឱ្យមានកិច្ចអន្តរាគមន៍មួយ ដើម្បីឱ្យពួកគេអាចបន្តសកម្មភាពលក់ដូរបាននៅក្នុងតំបន់នេះ។
ករណីនេះកើតឡើងបន្ទាប់ពីមន្ត្រីបានបញ្ជាឱ្យម្ចាស់តូបលក់វត្ថុអនុស្សាវរីយ៍ និងភោជនីយដ្ឋាន ប្រមាណជា៥៧ទីតាំងក្នុងបរិវេណរមណីយដ្ឋានអង្គរ រុះរើទីតាំងរបស់ពួកគេ និងចាកចេញពីតំបន់ ត្រឹមថ្ងៃសុក្រសប្ដាហ៍នេះ។
អាជីវករលក់វត្ថុអនុស្សាវរីយ៍អាយុ៥៥ឆ្នាំមួយរូប អ្នកស្រី អី រាម បានឱ្យដឹងនៅថ្ងៃពុធម្សិលមិញថា អាជ្ញាធរបានបញ្ជាឱ្យពួកគេចាកចេញដោយមិនផ្តល់ដំណោះស្រាយ [ទីតាំងលក់ដូរថ្មី] អ្វីឡើយ។
ករណីនេះបានធ្វើឱ្យពលរដ្ឋចំនួន១៧១នាក់ដែលពាក់ព័ន្ធ កាលពីថ្ងៃចន្ទកន្លងទៅ បានប្រមូលគ្នាផ្ដល់ស្នាមមេដៃ និងបានផ្ញើលិខិតទៅកាន់លោកនាយករដ្ឋមន្ត្រី ហ៊ុន សែន សុំឱ្យមានកិច្ចអន្តរាគមន៍មួយ បន្ទាប់ពីអាជ្ញាធរបានជូនដំណឹងដល់ពួកគេឱ្យបញ្ឈប់យកទំនិញថ្មីមកលក់ឱ្យភ្ញៀវទេសចរតទៅទៀត។
យោងតាមការបញ្ជាក់ឱ្យដឹងពីមន្រ្តី ការស្នើឱ្យមានការរុះរើតូបរបស់អាជីវកទាំងនេះ គឺធ្វើឡើងដោយសារតែតំបន់នេះស្ថិតនៅក្នុងរមណីយដ្ឋានអង្គរ ខណៈសកម្មភាពនេះ [លក់ដូរ] អាចប៉ះពាល់ដល់តំបន់បេតិកភណ្ឌពិភពលោកដែលទទួលស្គាល់ដោយអង្គការយូណេស្កូមួយនេះ។
នៅក្នុងលិខិតរបស់ពលរដ្ឋជាអាជីវករដែលផ្ញើជូនលោក ហ៊ុន សែន បានលើកឡើងថា អាជ្ញាធរជាតិអប្សរា កាលពីថ្ងៃទី០៥ ខែមីនា ឆ្នាំ២០២០ បានអនុញ្ញាតឱ្យពួកគេផ្លាស់ប្ដូរទីតាំងលក់ក្នុងបរិវេណរមណីយដ្ឋានអង្គរ ទៅកាន់តំបន់ដែលត្រូវបានរៀបចំជាផ្លូវការនៅខាងមុខប្រាសាទវិញ។
អ្នកស្រី អី រាម ថា៖ «កាលពីពេលកន្លងទៅ យើងធ្លាប់បានយល់ព្រមក្នុងការផ្លាស់ទៅកាន់ទីតាំងថ្មីនេះហើយ ដោយសារតែវាជាសំណើរបស់រដ្ឋាភិបាលក្នុងការកែលម្អបរិស្ថានក្នុងតំបន់ប្រាសាទអង្គរវត្ត»។
ទោះជាយ៉ាងណា អ្នកស្រីបន្ថែមថា ការផ្ដល់ជូននេះ [ផ្លាស់ប្ដូរទៅកាន់ទីតាំងថ្មី] បច្ចុប្បន្នហាក់មិនមានទៀតឡើយ។
អ្នកស្រីបន្តថា៖ «[កាលពីពេលកន្លងទៅ] ពួកគេធ្លាប់បានស្នើសុំយើងឱ្យផ្តិតមេដៃទទួលយកទីតាំងលក់ថ្មីនៅមុខប្រាសាទ។ ប៉ុន្តែបច្ចុប្បន្ននេះ នៅទីតាំងថ្មីនោះ គឺមានអាជីវករលក់ពេញអស់ទៅហើយ ខណៈពួកយើងដែលនៅសេសសល់ គឺគ្មានកន្លែងសម្រាប់លក់ដូរឡើយ»។
អ្នកស្រីថា៖ «ជាដំណោះស្រាយ ពួកគេបានស្នើឱ្យយើងទៅកាន់តំបន់រុនតាឯកវិញ។ តើយើងអាចរកប្រាក់ចំណូលនៅទីនោះបានដោយរបៀបណា?»
គួរបញ្ជាក់ថា តំបន់រុនតាឯក ដែលមានចម្ងាយប្រមាណជា២០គីឡូម៉ែត្រពីភាគខាងកើតប្រាសាទអង្គរវត្ត និងក្បែរអាកាសយានដ្ឋានអន្តរជាតិថ្មីក្នុងខេត្តសៀមរាបនេះ គឺជាទីតាំងដែលត្រូវបានរៀបចំដោយមន្ត្រីសម្រាប់ផ្ដល់ជូនដល់ពលរដ្ឋដែលរុះរើចេញពីឧទ្យានអង្គរ។
ទោះជាយ៉ាងណា អាជីវករដែលប្រមូលផ្ដុំគ្នាដាក់ញត្តិទៅកាន់លោក ហ៊ុន សែន លើកឡើងថា ពួកគេមិនទាន់មានការសម្រេចចិត្តផ្លាស់ទៅកាន់តំបន់រុនតាឯកខាងលើនេះនៅឡើយទេ ខណៈពួកគេមិនដឹងថាត្រូវប្រកបមុខរបរអ្វីដើម្បីចិញ្ចឹមជីវិតនៅទីតាំងថ្មីនោះឡើយ។
ទាក់ទិននឹងករណីនេះ អ្នកស្រី អី រាម បន្ថែមថា ពួកគេនឹងបន្តស្នាក់នៅទីតាំងចាស់ដដែល រហូតដល់អាជ្ញាធរអាចរកទីតាំងលក់ដូរសមស្របថ្មីឱ្យពួកគេបាន។
អ្នកស្រីថា៖ «យើងមិនមែនប្រឆាំងនឹងពួកគេឡើយ ដោយយើងនឹងរុះរើចេញដោយខ្លួនឯង ប្រសិនបើពួកគេមានដំណោះស្រាយត្រឹមត្រូវសម្រាប់យើង។ វាគឺជាបញ្ហាដ៏ធំមួយសម្រាប់យើង»។
លោក ហ៊ី សាយ ប្រធានមន្ទីររៀបចំដែនដី នគរូបនីយកម្ម និងសំណង់ និងសុរិយោដីខេត្តសៀមរាប បានឱ្យដឹងកាលពីថ្ងៃពុធថា ការរុះរើទៅកាន់តំបន់រុនតាឯក គឺធ្វើឡើងសម្រាប់ប្រជាពលរដ្ឋដែលមានផ្ទះក្នុងឧទ្យានអង្គរតែប៉ុណ្ណោះ។
សម្រាប់ករណីអាជីវករលក់ដូរនៅរមណីយដ្ឋានអង្គរវិញ លោកថា៖ «អាជ្ញាធរមូលដ្ឋានបានជូនដំណឹងពួកគេឱ្យរុះរើតូបចេញ ដោយការងារនេះបានចាប់ផ្តើមធ្វើហើយ ប៉ុន្តែមិនមានការកំណត់ថ្ងៃសម្រាប់ពួកគេនោះទេ»។
ជាមួយគ្នានេះ លោកបន្តថា អង្គការយូណេស្កូក៏ធ្លាប់បានព្រមានរដ្ឋាភិបាលកម្ពុជាពីរដងរួចមកហើយកាលពីពេលកន្លងទៅ ទាក់ទងនឹងផលប៉ះពាល់របស់អ្នករស់នៅក្នុងឧទ្យានអង្គរមកលើប្រាសាទផងដែរ។
លោកបានបន្ថែមថា ការរុះរើនេះគឺអាជ្ញាធរបានជូនដំណឹងឱ្យពួកគេធ្វើឡើងដោយស្ម័គ្រចិត្ត ហើយក្នុងនោះក៏ពុំមានការប្រើប្រាស់កងកម្លាំងលើពលរដ្ឋ ឬអាជីវករនោះដែរ។
លោកថា៖ «ពួកគេភាគច្រើនបានយល់ ហើយបានស្ម័គ្រចិត្តធ្វើការរុះរើដោយខ្លួនឯង។ ទាក់ទងនឹងនីតិវិធីបន្ទាប់សម្រាប់អ្នកដែលមិនព្រមចាកចេញ ខ្ញុំមិនទាន់ច្បាស់នៅឡើយទេ»៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Angkor Wat Vendors Petition PM to Remain in Temple Park