សកម្មជនចលនាមាតាធម្មជាតិ នៅថ្ងៃព្រហស្បតិ៍នេះ បានស្នើរដ្ឋាភិបាលបង្ហាញពីប្រភពអ្នកដែលបានទិញឈើ និងទំហំទឹកប្រាក់ដែលបានមកពីការលក់ឈើនៅតំបន់ភ្នំតាម៉ៅ ក្នុងខេត្តតាកែវ។
ការស្នើនេះបានធ្វើឡើងក្រោយពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន កាលពីថ្ងៃទី៣១ ខែកក្កដា ធ្លាប់បានលើកឡើងថា អាជ្ញាធរថ្នាក់ក្រោម បានកាប់ព្រៃឈើនៅក្នុងតំបន់សួនសត្វភ្នំតាម៉ៅ ដើម្បីយកឈើលក់ ហើយយកថវិកាចូលរដ្ឋ និងទុកដីឱ្យក្រុមហ៊ុន ឡេង ណាវ៉ាត្រា ធ្វើការអភិវឌ្ឍ។ តែយ៉ាងណា ក្រោយមានប្រតិកម្មពីមហាជន រដ្ឋាភិបាលបានបញ្ឈប់ការឈូសឆាយដីព្រៃនៅតំបន់នោះវិញ ក្រោយពីបានឈូសឆាយអស់ប្រមាណ៦០០ហិកតា។
សកម្មជនបរិស្ថាននៃចលនាមាតាធម្មជាតិ កញ្ញា ឡុង គន្ធា បានបង្ហាញចង្ងល់តាមរយៈវីដេអូឃ្លីបដែលមានរយៈពេលជាង១នាទី នៅលើបណ្តាញសង្គមហ្វេសប៊ុក ទៅកាន់រដ្ឋាភិបាល ទាក់ទងនឹងការឈូសឆាយដីព្រៃ និងការដឹកឈើចេញនៅតំបន់ភ្នំតាម៉ៅ កាលពីពេលថ្មីៗនេះ។ កញ្ញាបានលើកឡើងថា ពាក់ព័ន្ធនឹងការឈូសឆាយព្រៃឈើអស់ប្រមាណ៦០០ហិកតានៅតំបន់ភ្នំតាម៉ៅនោះ ក្រសួងកសិកម្មធ្លាប់បានអះអាងថាបានយកទៅលក់ដើម្បីប្រមូលថវិកាចូលរដ្ឋ តែក្រសួងមិនបានបង្ហាញថាយកទៅលក់នៅកន្លែងណា និងទទួលបានថវិកាចំនួនប៉ុន្មាននោះទេ។
កញ្ញាថា៖ «ហេតុនេះហើយខ្ញុំមានចម្ងល់កាន់តែខ្លាំង ថាតើក្រសួងយកឈើនោះយកទៅលក់នៅឯណា ហើយបានលុយចំនួនប៉ុន្មាន ព្រោះព័ត៌មាននេះហាក់មិនទាន់បានផ្សាយទាល់តែសោះ តើបងប្អូនមានការឆ្ងល់ដូចខ្ញុំដែរឬទេ?»
យុវជនចលនាមាតាធម្មជាតិ លោក លី ចាន់ដារ៉ាវុធ មានប្រសាសន៍ថា ក្នុងនាមជាពលរដ្ឋខ្មែរម្នាក់ លោកមិនចង់ឱ្យមានការកាប់ព្រៃឈើនៅតំបន់ភ្នំតាម៉ៅនោះទេ ប៉ុន្តែបើជ្រុលជាកាប់រួចទៅហើយ លោកចង់ឱ្យរដ្ឋាភិបាលបង្ហាញចំនួនទឹកប្រាក់ដែលបានមកពីការលក់ព្រៃឈើនោះ ដើម្បីឱ្យប្រជាពលរដ្ឋបានដឹង និងបង្ហាញពីតម្លាភាពលើចំណូលចំណាយថវិការដ្ឋ ជាជាងការលាក់បាំងព័ត៌មាន។
លោកថា៖ «ដូច្នេះហើយយើងក៏ឆ្ងល់ដែរថា ព្រៃឈើ៦០០ហិកតាហ្នឹងលក់បានលុយប៉ុន្មាន ដើម្បីយកលុយចូលរដ្ឋហ្នឹង! ហើយវាជាចំណែកមួយក្នុងការរដ្ឋាភិបាលមានការទទួលខុសត្រូវ ជាពិសេសឱ្យបានតម្លាភាពក្នុងការធ្វើចំណូលនិងចំណាយហ្នឹង»។
វីអូឌី មិនទាន់អាចសុំការឆ្លើយតបពីរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន នៅឡើយទេ ខណៈអ្នកនាំពាក្យក្រសួងកសិកម្ម លោក ស្រី វុឌ្ឍី នៅពុំទាន់អាចបញ្ជាក់បានទេ ដោយរង់ចាំរបាយការណ៍ពីរដ្ឋបាលព្រៃឈើសិន។
ចំណែក ប្រធាននាយកដ្ឋានឧទ្យានសួនសត្វភ្នំតាម៉ៅ លោក ញឹក រតនៈពេជ្យ បញ្ជាក់យ៉ាងខ្លីថា លោកមិនមានព័ត៌មានជុំវិញការដឹកឈើដែលបានឈូសឆាយចេញនៅតំបន់ភ្នំតាម៉ៅទេ គ្រាន់តែដឹងថា កន្លងមក មានពលរដ្ឋនៅតំបន់នោះមួយចំនួនបាននាំគ្នាដឹកឈើតូចៗដែលបានឈូសឆាយចេញពីតំបន់នោះយកទៅប្រើប្រាស់។
លោកថា៖ «មានទាន់ដឹងណា! មានតែប្រជាពលរដ្ឋគាត់ធ្វើអុសធ្វើអី រួចពីហ្នឹង នៅហ្នឹងទាំងអស់តើ! អត់មានទេៗ! មានឈើណា! ដឹកឈើតូចៗហ្នឹង»។
មន្រ្តីគម្រោងតស៊ូមតិ នៃគម្រោងអ្នកការពារព្រៃឈើ នៃបណ្ដាញសមាគមយុវជនកម្ពុជា លោក សាន ម៉ាឡា មានប្រសាសន៍ថា តាមរយៈការចុះទៅសង្កេតនៅតំបន់ភ្នំតាម៉ៅកន្លងមក ពិតជាមានប្រជាពលរដ្ឋមួយចំនួនបានចូលទៅដឹកឈើតូចៗដែលងាប់យកទៅធ្វើអុសមែន ប៉ុន្តែលោកជឿថា នៅមានប្រភេទឈើល្អៗ និងឈើប្រណិតជាច្រើនទៀត ដែលនៅក្នុងតំបន់អភិរក្សនោះ។ ករណីនេះ លោកសង្ឃឹមថា រដ្ឋាភិបាលនឹងបង្ហាញតម្លាភាព និងព័ត៌មានជុំវិញព្រៃឈើដែលបានឈូសឆាយនេះ ដើម្បីឆ្លើយតបទៅនឹងចម្ងល់របស់ប្រជាពលរដ្ឋ។
លោកថា៖ «រដ្ឋាភិបាលត្រូវតែបង្ហាញតម្លាភាព ហើយពន្យល់ដោយមានការអះអាងច្បាស់លាស់ មិនមែនគ្រាន់តែឆ្លើយបដិសេធថា ប្រជាពលរដ្ឋជាអ្នកប្រមូលឈើ រួចក៏ចប់នោះទេ ដោយសាររដ្ឋាភិបាលជាអ្នកសម្រចចិត្ត និងចុះហត្ថលេខាឱ្យមានការឈូសឆាយ»។
ផ្ទៃដីព្រៃភ្នំតាម៉ៅ ទំហំជិត៦០០ហិកតាដែលស្ថិតនៅក្រោមការគ្រប់គ្រងដោយរដ្ឋបាលព្រៃឈើ ត្រូវបានកាប់បំផ្លាញ និងឈូសឆាយ គិតចាប់តាំងពីចុងខែកក្កដា រហូតដល់ដើមខែសីហាកន្លងទៅ បន្ទាប់ពីតំបន់នេះត្រូវបានរដ្ឋាភិបាលប្រគល់ទៅឱ្យក្រុមហ៊ុនឯកជនមួយចំនួន ក្នុងនោះ ក្រុមហ៊ុនចំនួន២ដែលត្រូវបានគេស្គាល់ថាជាកម្មសិទ្ធិលោក ឡេង ណាវ៉ាត្រា និងលោក ឃុន សៀ។
ទោះជាយ៉ាងណា ការដោះដូរ និងអភិវឌ្ឍន៍តំបន់ភ្នំតាម៉ៅនេះ ត្រូវបានលោកនាយករដ្ឋមន្ត្រី ហ៊ុន សែន កាលពីថ្ងៃទី៧ ខែសីហា កន្លងទៅ បានចេញបទបញ្ជាភ្លាមៗឱ្យលុបចោលទាំងអស់ ដោយរក្សាទុកតំបន់ភ្នំតាម៉ៅឱ្យនៅដដែល ក្រោយមានប្រតិកម្មពីមហាជនយ៉ាងច្រើន ហើយលោកក៏បានបញ្ជាឱ្យក្រុមឈូសឆាយទទួលខុសត្រូវក្នុងការដាំដើមឈើឡើងវិញ។
ព្រះមហាក្សត្រខ្មែរបានចេញព្រះរាជក្រឹត្យមួយ កាលពីថ្ងៃទី១៩ ខែសីហា ឆ្នាំ២០២២ ដោយដាក់តំបន់ភ្នំតាម៉ៅ ជាតំបន់ឧទ្យានសួនសត្វ ព្រៃការពារ ដើម្បីធានានូវនិរន្តរភាពនៃការថែរក្សាអភិរក្សព្រៃឈើនិងសត្វព្រៃនៅតំបន់ដែលមានភាពចម្រូងចម្រាសមួយនេះ៕
