មន្ត្រីផ្នែកទំនាក់ទំនងសាធារណៈម្នាក់បានស្នើឱ្យវីអូឌីដកឈ្មោះក្រុមហ៊ុន Zhengheng Group ចេញពីអត្ថបទព័ត៌មានដែលបានផ្សាយអំពីប្រតិបត្តិការឆបោក ដោយសន្យាផ្តល់ប្រាក់មួយចំនួន និងបាននិយាយថាក្រុមហ៊ុនកំពុងជួយអាជ្ញាធរក្នុងការបង្ក្រាបអាជីវកម្មខុសច្បាប់នៅទីតាំងរបស់ខ្លួនក្នុងខេត្តកោះកុង។
បន្ទាប់ពី វីអូឌី បដិសេធមិនធ្វើតាមសំណើ មន្ត្រីរូបនោះបានផ្ញើអ៊ីម៉ែលមក ដោយនិយាយថា៖ «យើងនឹងចាត់វិធានការតាមផ្លូវច្បាប់ពីបទបង្ខូចឈ្មោះ និងមានបំណងវាយប្រហារមកលើក្រុមហ៊ុន Zhengheng Group មិនថានៅអាមេរិក ឬអាស៊ី»។
លោក ថង ហុងហេង (Thong Hongheng) ដែលបានណែនាំខ្លួនថាជាជំនួយការនៅទីភ្នាក់ងារ PBS PR បានផ្ញើអ៊ីម៉ែលមក វីអូឌី កាលពីថ្ងៃទី៧ ខែកញ្ញា ឆ្នាំ២០២២ ដោយសុំឱ្យ វីអូឌី «កែប្រែបន្តិចបន្តួច» នូវព័ត៌មានអំពីទីតាំងឆបោកនៅគម្រោងរបស់ក្រុមហ៊ុន យូញៀន ឌីវីឡុបមិន គ្រុប (Union Development Group) ក្នុងខេត្តកោះកុង ដោយដកឈ្មោះបុគ្គលសំខាន់ៗ និងព័ត៌មានរបស់បណ្តាក្រុមហ៊ុនជាសមាជិក។
លោក ថង ហុងហេង បាននិយាយនៅក្នុងអ៊ីម៉ែលថា៖ «តំបន់អភិវឌ្ឍន៍តារាសាគររបស់កម្ពុជា ក៏ដើរតួក្នុងបេសកកម្មនៃគំនិតផ្ដួចផ្ដើម [ផ្លូវមួយ ខ្សែក្រវាត់មួយ]។ ដូច្នេះ រដ្ឋាភិបាលចិន និងកម្ពុជា ក៏យកចិត្តទុកដាក់យ៉ាងខ្លាំងចំពោះកិច្ចការនេះដែរ។ អ្នកអភិវឌ្ឍន៍ក៏មានឆន្ទៈក្នុងការសហការជាមួយរដ្ឋាភិបាល និងនគរបាលក្នុងតំបន់ ហើយនឹងមិនបិទបាំងក្រុមហ៊ុនដែលខុសច្បាប់ឡើយ»។
បន្ទាប់ពីប្រាប់ថា វីអូឌី អាចកែតម្រូវអត្ថបទខ្លួន លុះណាតែមានកំហុសឆ្គងតែប៉ុណ្ណោះ លោក ថង ហុងហេង បានផ្ញើ «សេចក្ដីព្រាងដែលបានកែសម្រួល» នៃអត្ថបទព័ត៌មាននេះ ដោយដកចេញនូវកថាខណ្ឌចំនួន៦ ដែលនិយាយអំពីក្រុមហ៊ុន Zhengheng នាយកក្រុមហ៊ុន និងបុត្រសម្ពន្ធរបស់ខ្លួន។
លោក ថង ហុងហេង បាននិយាយនៅក្នុងអ៊ីម៉ែលថា៖ «ចាប់តាំងពី វីអូឌី ភាសាអង់គ្លេស [VOD English] បានបង្ហាញជាសាធារណៈនូវរចនាសម្ពន្ធក្រុមហ៊ុន និងបុគ្គលសំខាន់ៗរបស់ក្រុមហ៊ុន Zhengheng Group នៅក្នុងអត្ថបទព័ត៌មាន វាបានបង្កផលប៉ះពាល់ជាអវិជ្ជមានដល់ក្រុមហ៊ុន ពួកគេ [ក្រុមហ៊ុន] សង្ឃឹមថា VOD English នឹងលុបអត្ថបទ ឬកែប្រែខ្លឹមសារសំខាន់នៅក្នុងអត្ថបទ»។
លោកបន្ថែមថា៖ «ក្រុមហ៊ុននឹងបង់ថ្លៃសេវាសម្រាប់ការលុប និងកែតម្រូវអត្ថបទនេះ»។
នៅពេលទទួលបានដំណឹងថា វីអូឌី មានបំណងផ្សាយអត្ថបទព័ត៌មានអំពីការផ្តល់ប្រាក់ លោក ថង ហុងហេង បានបញ្ជាក់ថា៖ «យើងបាននិយាយថា យើងអាចផ្តល់ថ្លៃសេវាសម្រាប់ការលុប និងកែតម្រូវអត្ថបទជាការគោរព និងយោគយល់ចំពោះអ្នកសារព័ត៌មាន»។
លោកបន្ថែមថា៖ «ក្រុមហ៊ុន Zhengheng Group សហការជាមួយរដ្ឋាភិបាលកម្ពុជា ក្នុងការប្រយុទ្ធប្រឆាំងនឹងឧក្រិដ្ឋកម្ម ហើយការវាយប្រហារមកលើក្រុមហ៊ុន Zhengheng Group ដោយមានជំនួយពីប្រព័ន្ធផ្សព្វផ្សាយព័ត៌មានក៏ជាបទឧក្រិដ្ឋដែរ។ យើងនឹងចាត់វិធានការតាមផ្លូវច្បាប់ចំពោះប្រព័ន្ធផ្សព្វផ្សាយដែលមានបំណងបង្ខូចឈ្មោះ និងវាយប្រហារមកលើក្រុមហ៊ុន Zhengheng Group មិនថានៅអាមេរិក ឬអាស៊ី»។
យោងតាមគណនីហ្វេសប៊ុករបស់លោក ថង ហុងហេង បានបង្ហាញថា បុគ្គលរូបនេះគឺជាអ្នកបកប្រែឱ្យក្រុម ZhengHeng។
អ្នករាយការណ៍ព័ត៌មាន វីអូឌី បានរកឃើញព័ត៌មានអំពីរចនាសម្ពន្ធ និងទំនាក់ទំនងរបស់ក្រុមហ៊ុន Zhengheng Group ជាមួយនឹងរមណីយដ្ឋាន ឡងបេ (Long Bay) នៅតាមអ៊ីនធឺណិត។ អ្នករាយការណ៍ព័ត៌មានបានព្យាយាមផ្ញើសំណួរទៅកាន់អាសយដ្ឋានអ៊ីម៉ែលចំនួន៣ ដែលមាននៅលើគេហទំព័ររបស់ក្រុមហ៊ុន Zhengheng ក្នុងអំឡុងពេលសរសេរអត្ថបទដើម។ នៅពេលដែលអ៊ីម៉ែលចំនួន២មិនដំណើរការ អ្នករាយការណ៍ព័ត៌មាន វីអូឌី បានទៅដល់ការិយាល័យរបស់ក្រុមហ៊ុន Zhengheng ក្នុងរាជធានីភ្នំពេញ ហើយបានសួររកអាសយដ្ឋានទំនាក់ទំនង និងមានគេប្រាប់ថាអាសយដ្ឋានអ៊ីម៉ែលមួយគឺត្រឹមត្រូវ ប៉ុន្តែក្រុមហ៊ុន Zhengheng មិនបានឆ្លើយតបឡើយនៅពេលនោះ។ នៅសប្តាហ៍នេះ វីអូឌី បានផ្ញើអ៊ីម៉ែលមួយផ្សេងទៀតទៅកាន់អាសយដ្ឋានអ៊ីម៉ែលដែលគេប្រាប់ថាត្រឹមត្រូវ ប៉ុន្តែមិនមានការឆ្លើយតបឡើយ៕
រាយការណ៍បន្ថែមដោយ Danielle Keeton-Olsen និង Ananth Baliga
បកប្រែនិងសម្រួលចេញពីអត្ថបទដើមភាសាអង់គ្លេស៖ PR Rep Offers Money to Remove Company From UDG Scam Article
