ការស្ទង់មតិមួយបានបង្ហាញថា ការគាំទ្រនាយករដ្ឋមន្ត្រីជប៉ុន លោក ហ្វូមីអូ គីស៊ីដា (Fumio Kishida) ក្នុងរយៈពេលចុងក្រោយនេះ បានធ្លាក់ចុះដល់កម្រិតទាបបំផុត ចាប់តាំងពីលោកឡើងកាន់តំណែង។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។
ករណីនេះកើតឡើងដោយសារតែសាធារណជនមានការមិនពេញចិត្ត ទាក់ទងនឹងការរៀបចំពិធីបុណ្យសពអតីតនាយករដ្ឋមន្ត្រីជប៉ុន លោក ស៊ិនហ្សូ អាបេ (Shinzo Abe) ដែលពុំមានការពន្យល់ឱ្យបានច្បាស់លាស់។
យោងតាមការស្ទង់មតិដោយទីភ្នាក់ងារសារព័ត៌មានជប៉ុនជីជី (Jiji) ការគាំទ្រលោក ហ្វូមីអូ គីស៊ីដា បានធ្លាក់ចុះដល់៣២,៣ភាគរយ ពីចំនួន៤៤,៣ភាគរយ កាលពីខែមុន ខណៈតួលេខនេះគឺកាន់តែកៀកទៅកាន់កម្រិតគ្រោះថ្នាក់ ៣០ភាគរយ ដែលអាចនឹងបង្កឱ្យរដ្ឋាភិបាលជួបប្រទះបញ្ហាក្នុងការអនុវត្តរបៀបវារៈនយោបាយរបស់ខ្លួន។
ជាមួយគ្នានេះ ការស្ទង់មតិដដែលបន្ថែមថា អ្នកដែលមិនគាំទ្ររដ្ឋាភិបាលរបស់លោក ហ្វូមីអូ គីស៊ីដា ក៏បានកើនឡើងដល់៤០ភាគរយផងដែរ។
គួរបញ្ជាក់ថា អតីតនាយករដ្ឋមន្ត្រីជប៉ុន លោក ស៊ិនហ្សូ អាបេ (Shinzo Abe) បានស្លាប់បាត់បង់ជីវិត បន្ទាប់ពីរងនូវការបាញ់ប្រហារពីក្រោយខ្នងដោយខ្មាន់កាំភ្លើងមួយរូប ខណៈលោកកំពុងថ្លែងសុន្ទរកថាមួយនៅទីក្រុង Nara ភាគខាងលិចប្រទេសជប៉ុន កាលពីខែកក្កដាកន្លងទៅ។
ទាក់ទិននឹងករណីនេះ រដ្ឋាភិបាលជប៉ុនក៏បានសម្រេចរៀបចំពិធីបុណ្យសពថ្នាក់ជាតិទ្រង់ទ្រាយធំមួយក្នុងទីក្រុងតូក្យូ នាថ្ងៃទី២៧ ខែកញ្ញា ខាងមុខនេះ ដែលគ្រោងនឹងត្រូវចំណាយថវិកាប្រមាណជា១២លានដុល្លារក្នុងការរៀបចំ។
ទោះជាយ៉ាងណា ករណីនេះក៏បានរងនូវការរិះគន់ផងដែរ ខណៈការស្ទង់មតិជាបន្តបន្ទាប់បានបង្ហាញថា សាធារណជនជប៉ុនភាគច្រើនមិនគាំទ្រឱ្យមានការរៀបចំពិធីបុណ្យសពថ្នាក់ជាតិជូនលោក អាបេ ឡើយ ដោយពួកគេលើកឡើងថា ការរៀបចំពិធីបុណ្យដោយលោកនាយករដ្ឋមន្រ្តី ហ្វូមីអូ គីស៊ីដា នេះគឺមិនមានការពន្យល់ពីមូលហេតុឱ្យបានគ្រប់គ្រាន់៕