ប្រជាពលរដ្ឋមានជម្លោះដីធ្លីនៅឃុំចំនួន២ នៃស្រុកព្រៃនប់ ខេត្តព្រះសីហនុ អំពាវនាវទៅរដ្ឋាភិបាលឱ្យជួយដោះស្រាយ និងដោះលែងពលរដ្ឋ៤នាក់ឱ្យមានសេរីភាពវិញ ក្រោយអាជ្ញាធរដាក់គ្រឿងចក្រឈូសឆាយផ្ទះសម្បែងផលដំណាំ និងចាប់ខ្លួនពលរដ្ឋដាក់ពន្ធនាគារក្រោមជម្លោះដីធ្លីនេះ។
ពលរដ្ឋម្នាក់ដែលអះអាងថានៅស្រុកព្រៃនប់ លោក ទឹម សុភ័ក្រ ប្រាប់វីអូឌីនៅថ្ងៃសុក្រនេះថា ប្រជាពលរដ្ឋចំនួន៣៣៤គ្រួសារ បានចូលទៅអាស្រ័យផលលើដីប្រហែល១០០ហិកតា ស្ថិតនៅភូមិស្មាច់ដែង ឃុំរាម និងភូមិពូធឿង ឃុំបិតត្រាង ស្រុកព្រៃនប់ ខេត្តព្រះសីហនុ តាំងពីឆ្នាំ២០០៤ និងឆ្នាំ២០០៥ ជាបន្តបន្ទាប់រហូតមកដល់បច្ចុប្បន្ននេះ។
លោកបន្តថា អាជ្ញាធរបានទទួលស្គាល់ការកាន់កាប់របស់ប្រជាពលរដ្ឋកាលពីជំនាន់គ្រប់គ្រងដោយអតីតអភិបាលខេត្តព្រះសីហនុ លោក យន្ត មីន ហើយបានសម្រេចកាត់ឆ្វៀលចេញពីដីគម្របព្រៃឈើ និងមានការឯកភាពពីក្រសួងកសិកម្មផងដែរ។
ប៉ុន្តែលោកថា កាលពីពេលថ្មីៗនេះ អាជ្ញាធរខេត្តព្រះសីហនុបានដាក់គ្រឿងអមដោយកម្លាំងសមត្ថកិច្ចចម្រុះរាប់រយនាក់ចុះរុះរើ ឈូសឆាយផ្ទះ និងផលដំណាំពលរដ្ឋអស់ ព្រមទាំងបានចាប់ខ្លួនពលរដ្ឋ៤នាក់ដាក់ពន្ធនាគារថែមទៀត ដោយចោទពួកគាត់ថាបានទៅចូលទន្ទ្រានដីក្រុមហ៊ុន «សីហនុវីល ស្តេសល អ៊ីខននើមី ហ្សូន» នៃតំបន់សេដ្ឋកិច្ចពិសេស SIHANOUK VILLE SEZ ដោយខុសច្បាប់ទៅវិញ។
លោកបន្ថែមថា៖ «ខ្ញុំសូមអំពាវនាវដល់ប្រមុខរដ្ឋាភិបាល សម្តេច ហ៊ុន សែន ជួយរកយុត្តិធម៌ជូនរងគ្រោះ អ្នកទន់ខ្សោយក្រខ្សត់។ ពេលដែលអាជ្ញាធរដាក់គ្រឿងចក្រមកឈូសឆាយអ៊ីចឹង ធ្វើឱ្យពលរដ្ឋខាតបង់ទ្រព្យសម្បតិ្ត គ្មានកន្លែងរស់នៅ នាំគ្នាបោះតង់ជ្រកតាមព្រៃ កូនយំពេញព្រៃគួរឱ្យអាណោចអាធ័មណាស់។ យើងខ្មែរដូចគ្នា បើមានបញ្ហាអីមួយ វាគួរតែដោះស្រាយគ្នាតាមនីតិវិធីទៅ»។
ពលរដ្ឋម្នាក់ទៀតដែលសុំមិនបញ្ចេញឈ្មោះដោយបារម្ភពីសុវត្ថិភាព និយាយថា ករណីអាជ្ញាធរដាក់កម្លាំងចុះបង្ក្រាបនិងឈូសឆាយផ្ទះពលរដ្ឋ គឺជាការគប់គិតគ្នាជាប្រព័ន្ធរបស់អាជ្ញាធរខេត្ត ដើម្បីយកដីរបស់ពួកគាត់ចែកគ្នាតែប៉ុណ្ណោះ ខណៈតម្លៃដីនៅខេត្តព្រះសីហនុហក់ឡើងខ្ពស់។
ពលរដ្ឋរូបនេះបន្តថា កន្លងមក មានមន្ត្រី និងបុគ្គលមានលុយមានអំណាចមួយចំនួន បានទៅដេញពលរដ្ឋចេញពីដីជម្លោះនោះ ដោយអះអាងថាជាដីរបស់ខ្លួន ប៉ុន្តែពលរដ្ឋមិនព្រមចេញ ហើយក្រោយមកទៀត អាជ្ញាធរចាប់ផ្តើមចោទពលរដ្ឋថាចូលកាន់កាប់ដីរដ្ឋ និងដីក្រុមហ៊ុនតំបន់សេដ្ឋកិច្ចពិសេសដោយខុសច្បាប់ទៅវិញ។
លោកបន្ថែមថា៖ «ហើយមួយទៀត អាជ្ញាធរចោទថា ប្រជាពលរដ្ឋរស់នៅ[លើ]ដីកម្មសិទ្ធិរបស់គេ តែការពិតពួកខ្ញុំរស់នៅតាំងពីឆ្នាំ២០០៤ម៉្លេះ មានដំណាំស្វាយ ដូង ខ្នុរ និងដំណាំផ្សេងៗទៀត ប៉ុន្តែឥលូវនេះ ខ្ទេចអស់ហើយ វាឈូសឆាយ កាយកប់ចោល ជាន់ចោលអស់ ហើយឥលូវនេះរកតែមួយសន្លឹកក៏គ្មានផង។ ការពិតដីហ្នឹងរដ្ឋាភិបាលកាត់ឆ្វៀលឱ្យប្រជាពលរដ្ឋអស់ហើយតើ! ប៉ុន្តែដោយសារដីតំបន់នេះវាមានតម្លៃ អ៊ីចឹងអ្នកមានលុយមានអំណាច គាត់គប់គិតគ្នាយកធ្វើកម្មសិទ្ធិ ហើយចោទពលរដ្ឋថាទន្ទ្រានយកដីគេ។ និយាយទៅ វាអយុត្តិធម៌ណាស់»។
កាលពីថ្ងៃទី១២ ខែសីហា ឆ្នាំ២០២២ រដ្ឋបាលខេត្តព្រះសីហនុបានចេញសេចក្តីប្រកាសព័ត៌មានមួយ ដោយបានអំពាវនាវដល់ប្រជាពលរដ្ឋឱ្យចាកចេញពីដីរបស់ក្រុមហ៊ុន «សីហនុវីល ស្តេសល អ៊ីខននើមី ហ្សូន» នៃតំបន់សេដ្ឋកិច្ចពិសេស SIHANOUK VILLE SEZ ជាបន្ទាន់។
រដ្ឋបាលខេត្តព្រះសីហនុបានឱ្យដឹងថា មានពលរដ្ឋជាច្រើនគ្រួសារបានចាញ់បោកមេខ្យល់ ដោយបាននាំគ្នាចូលទៅសង់ខ្ទមរាប់រយខ្នងលើដីរបស់ក្រុមហ៊ុនដែលមានបណ្ណកម្មសិទ្ធិតាំងពីឆ្នាំ២០០៨ ហើយរដ្ឋបាលខេត្តនេះក៏បានព្រមានចាត់វិធានការច្បាប់តឹងរ៉ឹងចំពោះពលរដ្ឋណាដែលរឹងរូសមិនព្រមចាកចេញផងដែរ។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ ប្រាប់វីអូឌីតាមតេឡេក្រាមថា ក្រោយចេញសេចក្តីប្រកាសព័ត៌មាននេះ គឺមានពលរដ្ឋមួយចំនួនមិនព្រមចាកចេញ ហើយនៅថ្ងៃទី១៦ ខែសីហា ឆ្នាំ២០២២ រដ្ឋបាលខេត្តបានចុះអប់រំណែនាំឱ្យពលរដ្ឋទាំងនោះរុះរើខ្ទមម្តងទៀត ប៉ុន្តែពលរដ្ឋមួយចំនួនប្រដាប់ទៅដោយកាបិត ចម្ពាមកៅស៊ូ ដុំថ្ម និងដបប្រេងសាំង បានចេញមុខតវ៉ាប្រឆាំងរហូតដល់ប្រើអំពើហិង្សាលើក្រុមការងារចម្រុះរបស់ខេត្ត។
អ្នកនាំពាក្យរូបនេះបន្តថា ក្នុងប្រតិបត្តិការនោះ សមត្ថកិច្ចបានចាប់ខ្លួនពលរដ្ឋ៤នាក់បញ្ជូនទៅតុលាការផងដែរ។
យ៉ាងណា មន្ត្រីសមាគមសម្ព័ន្ធសហគមន៍កសិករកម្ពុជា លោក ស៊ុន សុផាត បានទទូចដល់អាជ្ញាធរពាក់ព័ន្ធ ជាពិសេសអាជ្ញាធរថ្នាក់ជាតិ ត្រូវចុះសិក្សាស្រាវជ្រាវផ្ទាល់ឱ្យបានច្បាស់លាស់ ថាតើពលរដ្ឋទាំងនោះពិតជាបានទៅអាស្រ័យផលយូរដូចពួកគេអះអាងឬយ៉ាងណា ហើយត្រូវដោះស្រាយបញ្ហាជម្លោះដីធ្លីនេះឱ្យយុត្តិធម៌និងតម្លាភាពផងដែរ។
លោក ស៊ុន សុផាត បន្តថា តាមលោកដឹង គឺមានពលរដ្ឋមួយចំនួនបានទៅកាន់កាប់និងអាស្រ័យផលលើដីគម្របព្រៃឈើឆ្នាំ២០០២ នៅក្នុងតំបន់កំពុងមានជម្លោះនោះយូរមកហើយដែរ។
លោកបន្ថែមថា៖ «ខ្ញុំសុំឱ្យអាជ្ញាធរនិងក្រុមហ៊ុនត្រូវមានការយោគយល់និងអនុគ្រោះដល់ប្រជាពលរដ្ឋដែលគាត់បានចូលទៅរស់នៅនិងអាស្រ័យតំបន់នោះផង ហើយមុនរុះរើផ្ទះពលរដ្ឋ ត្រូវបង្ហាញឯកសារជូនដំណឹងឱ្យពួកគាត់ដឹងជាមុនផងដែរ កុំឱ្យជូនដំណឹងភ្លាម ចុះរុះរើភ្លាម វាមិនល្អនោះទេ វានឹងធ្វើឱ្យជួបការលំបាក»។
កាលពីឆ្នាំ២០០៨ រដ្ឋាភិបាលបានចេញអនុក្រឹត្យមួយកាត់ដីទំហំ២ ០១៧,១៤ហិកតា ពីគម្របព្រៃឈើឆ្នាំ២០០២ ធ្វើអនុបយោគ និងប្រគល់សិទ្ធិកាន់កាប់ទៅឱ្យក្រុមហ៊ុន «សីហនុវិល ស្ពេសល អ៊ីខននើមី ហ្សូន» ដើម្បីអភិវឌ្ឍជាតំបន់សេដ្ឋកិច្ចពិសេស «SIHANOUK VILLE SEZ»៕