ប្រធានាធិបតីអាមេរិក លោក ចូ បៃឌិន បានប្រកាសផ្ដល់ជំនួយជាកញ្ចប់សព្វាវុធថ្មី ក្នុងទំហំទឹកប្រាក់៦០០លានដុល្លារបន្ថែមទៀត ដើម្បីជួយយោធាអ៊ុយក្រែនប្រយុទ្ធតទល់នឹងសង្រ្គាមឈ្លានពានរបស់រុស្ស៊ី។ នេះបើតាមលិខិតជូនដំណឹងរបស់សេតវិមានផ្ញើទៅកាន់ក្រសួងការបរទេស កាលពីថ្ងៃព្រហស្បតិ៍ ដែលត្រូវបានយកមកចុះផ្សាយដោយទីភ្នាក់ងារសារព័ត៌មាន Reuters។
យោងតាមមន្ទីរបញ្ចកោណ (Pentagon) កញ្ចប់ដែលអាមេរិកផ្ដល់ជូនទៅអ៊ុយក្រែននេះ រួមមាន ប្រព័ន្ធរ៉ុក្កែតចល័ត ហាយម៉ាស (HIMARS) វ៉ែនតាយោធាប្រើប្រាស់ពេលយប់ ឧបករណ៍បោសសម្អាតមីន គ្រាប់កាំភ្លើងផ្លោង105mm 155mm ខណៈថវិកាមួយចំនួនទៀតក៏នឹងត្រូវប្រើប្រាស់សម្រាប់ការអប់រំ និងការបណ្តុះបណ្តាលយោធាផងដែរ។
មន្ទីរបញ្ចកោណបន្ថែមថា៖ «ដើម្បីបំពេញតាមតម្រូវការដល់អ៊ុយក្រែនក្នុងសមរភូមិដែលកំពុងវិវត្ត សហរដ្ឋអាមេរិកនឹងបន្តធ្វើការជាមួយសម្ពន្ធមិត្តនិងដៃគូរបស់ខ្លួន ដើម្បីផ្តល់ឱ្យអ៊ុយក្រែននូវសមត្ថភាពសំខាន់ៗ ដើម្បីជួយឱ្យពួកគេអាចតទល់នឹងរុស្ស៊ីបាន»។
ភាពតានតឹងរវាងរុស្ស៊ី និងអ៊ុយក្រែន ក្នុងរយៈពេលចុងក្រោយនេះ បានចាប់ផ្ដើមកើនឡើងខ្លាំងបន្ទាប់ពីរុស្ស៊ីបានបើកការឈ្លានពានទ្រង់ទ្រាយធំទៅលើប្រទេសក្បែរខាងរបស់ខ្លួនមួយនេះ ដែលធ្វើឡើងបន្ទាប់ពីការប្រកាសសង្រ្គាមមួយដោយប្រធានាធិបតី លោក វ្លាឌីមៀរ ពូទីន។
ជាការឆ្លើយតប សហរដ្ឋអាមេរិក និងសម្ពន្ធមិត្តរបស់ខ្លួន បានសម្រេចដាក់ទណ្ឌកម្មយ៉ាងធ្ងន់ធ្ងរជាបន្តបន្ទាប់លើរុស្ស៊ី ខណៈដែលខ្លួនក៏បានផ្គត់ផ្គង់អាវុធ និងជំនួយជាបន្តបន្ទាប់ក្នុងទំហំទឹកប្រាក់រាប់ពាន់លានដុល្លារសម្រាប់ជួយគាំទ្រដល់វិស័យការពារជាតិអ៊ុយក្រែនផងដែរ៕
