ក្រសួងការបរទេសអាមេរិក បានឱ្យដឹងថា អាមេរិកមានការព្រួយបារម្ភអំពីការពង្រឹងទំនាក់ទំនងកាន់តែស៊ីជម្រៅរវាងចិន និងរុស្ស៊ី។ នេះបើយោងតាមការចេញផ្សាយរបស់ទីភ្នាក់ងារសារព័ត៌មាន CNA នៅថ្ងៃសុក្រនេះ។
ការថ្លែងលើកឡើងពីក្ដីបារម្ភនេះ ត្រូវបានធ្វើឡើងបន្ទាប់ពីប្រធានាធិបតីចិន លោក ស៊ី ជីនពីង បានជួបជាមួយប្រធានាធិបតីរុស្ស៊ី លោក វ្លាឌីមៀរ ពូទីន ដោយផ្ទាល់នៅក្នុងប្រទេសអ៊ូសបេគីស្ថាន (Uzbekistan) កាលពីថ្ងៃព្រហស្បតិ៍ម្សិលមិញនេះ។
ថ្លែងក្នុងសន្និសីទសារព័ត៌មានមួយកាលពីថ្ងៃព្រហស្បតិ៍ អ្នកនាំពាក្យក្រសួងការបរទេសសហរដ្ឋអាមេរិក លោក Ned Price បានឱ្យដឹងថា ការពង្រឹងទំនាក់ទំនងកាន់តែស៊ីជម្រៅរវាងចិន និងរុស្ស៊ីនេះ មិនមែនធ្វើឡើងតែក្នុងរយៈពេលមួយថ្ងៃ មួយសប្តាហ៍ ឬមួយខែឡើយ ប៉ុន្តែអាចនឹងធ្វើឡើងក្នុងរយៈពេលជាច្រើនឆ្នាំ។
លោកថា៖ «ជាការពិតណាស់ យើងបានសង្កេតឃើញថា ទំនាក់ទំនងរវាងពួកគេ គឺកាន់តែមានភាពស៊ីជម្រៅ។ ករណីនេះបានបង្កឱ្យមានជាការព្រួយបារម្ភមិនមែនត្រឹមតែយើងប៉ុណ្ណោះទេ ប៉ុន្តែវាក៏អាចជាក្ដីបារម្ភដល់បណ្ដាប្រទេសជុំវិញពិភពលោក ចំពោះទំនាក់ទំនងនេះផងដែរ»។
គួរបញ្ជាក់ថា លោក ស៊ី ជីនពីង កាលពីថ្ងៃពុធកន្លងទៅ បានចាកចេញពីប្រទេសចិន សម្រាប់ដំណើរទស្សនកិច្ចរយៈពេលមួយសប្ដាហ៍ ទៅកាន់តំបន់អាស៊ីកណ្ដាល ខណៈនៅថ្ងៃព្រហស្បតិ៍ម្សិលមិញនេះ រូបលោកក៏បានជួបជាមួយលោក ពូទីន ដោយភាគីទាំង២ ក៏ជួបពិភាក្សាគ្នាលើប្រធានបទមួយចំនួន ដែលរួមមានបញ្ហានៅអ៊ុយក្រែនផងដែរ។
ទាក់ទិននឹងករណីនេះ ប្រធានាធិបតីសហរដ្ឋអាមេរិក លោក ចូ បៃឌិន កាលពីពេលកន្លងទៅ ក៏ធ្លាប់បានព្រមានលោកប្រធានាធិបតី ស៊ី ជីនពីង អំពីផលវិបាកដែលចិនអាចនឹងទទួលបាន ប្រសិនបើប្រទេសមួយនេះផ្ដល់ការគាំទ្រណាមួយ ដើម្បីជួយឱ្យរុស្ស៊ីរួចផុតពីផលប៉ះពាល់នៃទណ្ឌកម្មរបស់លោកខាងលិច ឬផ្តល់ជំនួយផ្នែកយោធាជាដើមនោះ។
ទោះជាយ៉ាងណា ប្រទេសចិនបានបដិសេធម្ដងហើយម្ដងទៀតនូវផែនការបែបនេះ ក្នុងនោះខ្លួនក៏ធ្លាប់ច្រានចោលការអះអាងរបស់មន្ត្រីអាមេរិក ដែលថា រុស្ស៊ីបានព្យាយាមស្វះស្វែងរកជំនួយយោធាពីខ្លួននៅអ៊ុយក្រែនផងដែរ និងបានចោទអាមេរិកថាបានផ្សព្វផ្សាយព័ត៌មានមិនពិត ដែលធ្វើឱ្យស្ថានការណ៍ជម្លោះកាន់តែធ្ងន់ធ្ងរបន្ថែមទៀត៕