អង្គការយូនីសេហ្វប្រចាំកម្ពុជាបានលើកឡើងថា តួលេខចុងក្រោយពីការអង្កេតប្រជាសាស្ត្រនិងសុខភាពកម្ពុជាឆ្នាំ២០២២ បង្ហាញថា ៤៣ភាគរយ(៤៣%) នៃកុមារដែលបានអង្កេតបានរាយការណ៍ថា ពួកគេត្រូវបានគេដាក់វិន័យនៅក្នុងផ្ទះ ដោយប្រើអំពើហិង្សាលើរាងកាយ។
ការអះអាងនេះ ធ្វើឡើងក្នុងសេចក្តីប្រកាសព័ត៌មានរួមមួយកាលពីថ្ងៃសុក្ររបស់អង្គការយូនីសេហ្វ(UNICEF) ប្រចាំកម្ពុជា និងក្រសួងសង្គមកិច្ច អតីតយុទ្ធជន និងយុវនីតិសម្បទា ស្តីពីការវាយតម្លៃផែនការសកម្មភាព ដើម្បីទប់ស្កាត់ និងឆ្លើយតបចំពោះអំពើហិង្សាលើកុមារនៅកម្ពុជា ២០១៧-២០២១។
លើកឡើងក្នុងសេចក្តីប្រកាសព័ត៌មាននោះ នាយិកាយូនីសេហ្វប្រចាំកម្ពុជា លោកស្រី ហ្វ័រូហ្គ ហ្វយូហ្សិថ មានប្រសាសន៍ថា អំពើហិង្សាលើកុមារមានផលប៉ះពាល់យ៉ាងធ្ងន់ធ្ងរ ដែលមិនត្រឹមតែប៉ះពាល់ដល់ជីវិតបុគ្គលប៉ុណ្ណោះទេ ប៉ុន្តែថែមទាំងអាចបំផ្លាញសហគមន៍ទាំងមូល និងមនុស្សជំនាន់ក្រោយទៀតផង។
លោកស្រីបន្តថា ការវាយតម្លៃនេះបង្ហាញពីវឌ្ឍនភាពនៅក្នុងផ្នែកមួយចំនួន ប៉ុន្តែនៅមានកិច្ចការជាច្រើនទៀតដែលត្រូវធ្វើ ដូចដែលបានកត់សម្គាល់ផងដែរ នៅក្នុងអនុសាសន៍របស់គណៈកម្មាធិការស្តីពីសិទ្ធិកុមារកាលពីខែមិថុនាឆ្នាំនេះ។ បន្ថែមពីនេះ ការបញ្ចប់សេចក្តីព្រាងច្បាប់ស្តីពីកិច្ចការពារកុមារនាពេលខាងមុខ និងការបង្កើនការវិនិយោគលើកម្លាំងការងារក្នុងវិស័យសុខុមាលភាពសង្គម និងកម្មវិធីទប់ស្កាត់នានា មានសារៈសំខាន់ខ្លាំងណាស់ ប្រសិនបើយើងចង់ថែរក្សាសុវត្ថិភាពកុមារ និងកាត់ផ្តាច់វដ្តមិនចេះចប់នៃអំពើហិង្សាដែលបង្កផលប៉ះពាល់ដល់គ្រួសារយ៉ាងច្រើនរាប់មិនអស់។
ទោះជាយ៉ាងណាក៏ដោយលោកស្រីថា ការវាយតម្លៃនេះបានសង្កេតឃើញថា ការអនុវត្តផែនការសកម្មភាពស្ថិតនៅក្នុងដំណាក់កាលដំបូងនៅឡើយ ហើយចាំបាច់ត្រូវប្រមូលភស្តុតាងបន្ថែមទៀតអំពីផលប៉ះពាល់។ នេះគឺជាការព្រួយបារម្ភពិសេសមួយ ដោយហេតុថា ជំងឺរាតត្បាតជាសកលកូវីដ-១៩ បានកើតឡើងក្នុងអំឡុងពេលនៃឆ្នាំអនុវត្តផែនការសកម្មភាពនេះ ហើយការសិក្សាជាសកលបានបង្ហាញថា រយៈពេលនេះអាចមានការកើនឡើងនៃអំពើហិង្សាលើកុមារ។
យូនីសេហ្វលើកឡើងក្នុងសេចក្តីប្រកាសព័ត៌មានថា ៖«តួលេខចុងក្រោយពីការអង្កេតប្រជាសាស្ត្រនិងសុខភាពកម្ពុជាឆ្នាំ២០២២ បង្ហាញថា ៤៣% នៃកុមារដែលបានអង្កេតបានរាយការណ៍ថា ពួកគេត្រូវបានគេដាក់វិន័យនៅក្នុងផ្ទះ ដោយប្រើអំពើហិង្សាលើរាងកាយ»។
សេចក្តីប្រកាសព័ត៌មានដដែលក៏បានលើកឡើងប្រសាសន៍របស់រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក វង សូត ថា ផ្អែកតាមការវាយតម្លៃលើផែនការសកម្មភាពដើម្បីទប់ស្កាត់ និងឆ្លើយតបចំពោះអំពើហិង្សាលើកុមារឆ្នាំ២០១៧-២០២១ ប្រទេសកម្ពុងកំពុងស្ថិតនៅលើផ្លូវត្រឹមត្រូវក្នុងការទប់ស្កាត់អំពើហិង្សាលើកុមារ។
លោកបន្តថា ជាទិសដៅទៅមុខ កម្ពុជានឹងបន្តកិច្ចខិតខំប្រឹងប្រែងឱ្យកាន់តែសកម្មក្នុងការធានាថា កុមារមានសុវត្ថិភាពនៅគ្រប់ទីកន្លែង ដូចជានៅផ្ទះ សាលារៀន និងក្នុងសហគមន៍ ។ ជាងនេះទៅទៀតលោកថា រាជរដ្ឋាភិបាលប្តេជ្ញាយ៉ាងមុតមាំចំពោះការធានាឱ្យបានថា កុមារទាំងអស់នឹងរស់នៅក្នុងបរិយាកាសមួយប្រកបដោយភាពអំណោយផលដល់ការលូតលាស់ ព្រមទាំងទទួលបានការចិញ្ចឹមបីបាច់ និងកិច្ចការពារនានា សំដៅបញ្ចប់ឱ្យបានអំពើហិង្សាលើកុមារក្នុងគ្រប់ទម្រង់។ ជាងនេះទៀតលោកថា រាជរដ្ឋាភិបាលនឹងសម្រេចឱ្យបាននូវការប្ដេជារបស់កម្ពុជាក្នុងក្របខណ្ឌតំបន់ និងសកលតាមរយៈការអនុវត្តនូវផែនការ និងគោលនយោបាយជាតិនានាដែលបានដាក់ចេញ៕