សហគមន៍​ក្បាលរមាស​ខេត្តស្ទឹងត្រែង​ស្នើ​អាជ្ញាធរ​បង្កើត​ដី​សមូហភាព​ឱ្យ​បាន​៣ពាន់​ហិកតា

ទីតាំងដែលពលរដ្ឋអះអាងថា ជាកន្លែងដែលក្រុមហ៊ុនបានឈូសឆាយចូលដល់ដី «សហគមន៍ក្បាលរមាស» របស់ពួកគេ ស្ថិតនៅស្រុកសេសាន ខេត្តស្ទឹងត្រែង។ (ផ្ដល់ឱ្យ)

សហគមន៍ក្បាលរមាស ​ស្នើឱ្យ​អាជ្ញាធរជួយការពារព្រៃឈើរបស់​ពួកគេ​ពីក្រុមហ៊ុនចិន​ ស៊ីវ​ ហ្កិច (SevGek) និងពន្លឿនការបង្កើតដីសមូហភាព​របស់ពួកគេ​ប្រមាណ៣ពាន់ហិកតាបន្ថែមទៀត។

សហគមន៍ជនជាតិពូនង នៅភូមិក្បាលរមាស ឃុំក្បាលរមាស​ ស្រុកសេសាន ខេត្តស្ទឹងត្រែង​ បានអះអាងថា ក្រុមហ៊ុន​ចិន ​ស៊ីវ​ ហ្កិច​ បានចាប់ផ្ដើមកាប់ឈើ និងឈូសឆាយព្រៃសហគមន៍ក្នុងតំបន់​ដែលពួកគេស្នើ​ឱ្យអាជ្ញាធរ​បង្កើត​ដីសមូហភាព​។

ប្រជាសហគមន៍ជនជាតិពូនង លោក ឡាត់ វិបុល អាយុ២៦ឆ្នាំ បានឱ្យដឹងថា ​ក្រុមហ៊ុនចិនជួល​កម្មករជាង​១០​នាក់​​ទៅកាប់ឈើ​ប្រណិត​ៗ រួមមាន ផ្ចឹក ​សុក្រំ ជាដើម​​ ក្នុងដែនដី​សហគមន៍​ជនជាតិពូនង។

លោកបន្តថា​ សហគមន៍បានចុះល្បាត​ជាទៀងទាត់ដែរ តែយ៉ាងណា​ការខិតខំរបស់​សហគមន៍​មិនទទួលបានជោគជ័យនោះទេ ចំណែក​ឯ​អាជ្ញាធរមូលដ្ឋាន​ក៏មិនបានអើពើ​លើការស្នើសុំរបស់សហគមន៍នោះដែរ។

លោក​បន្ថែមថា ​ក្រុមហ៊ុន​បានឈូសដី​សហគមន៍​អស់ប្រមាណ​២០ហិកតារួចទៅ​ហើយ ដោយមិនបញ្ចូលការឈូសកន្លងមកអស់ប្រហែល​១ពាន់​ហិកតានោះទេ។ លោកថា ក្រោយឈូសឆាយ ក្រុមហ៊ុនមិនបានដាំ​ដំណាំអ្វីទាំងអស់​ ខណៈដែល​សហគមន៍បែរជាមិនមាន​ឈើធ្វើផ្ទះទៅវិញ​។

លោកថា៖ «​ឈើប្រភេទហ្នឹង គឺគាត់ចាត់ទុកថាប្រភេទឈើ​ដែលល្អមួយ​សម្រាប់ការសាងសង់ផ្ទះរបស់គាត់ ​ព្រោះសហគមន៍បច្ចុប្បន្នកំពុងសាងសង់ផ្ទះឡើងវិញ ក្រោយពីផ្ទះ​នៅភូមិចាស់របស់គាត់ត្រូវបានទឹកលិច។​ អ៊ីចឹងម្នាក់ៗព្យាយាមប៉ុនណាដើម្បីធ្វើផ្ទះរបស់គាត់​ ប៉ុន្តែឥលូវរកឈើធ្វើផ្ទះមួយក៏មិនបានដែរ​»។

ប្រធានសហគមន៍ក្បាលរមាស អ្នកស្រី ស្រាំង ឡាញ់​ បានលើកឡើងថា ​ក្រុមហ៊ុនចិនបានចាប់ផ្ដើម​កាប់ឈើ​សហគមន៍របស់ពួកគេតាំង​ពីខែមិថុនារហូតដល់បច្ចុប្បន្ន​។ អ្នកស្រីបារម្ភថា​ ប្រសិនបើបន្តការឈូសឆាយបន្តទៀត សហគមន៍នឹងបាត់បង់ព្រៃទាំងស្រុង ក្នុងនោះក៏មាន​ព្រៃអារក្ខ​របស់ពួកគាត់ផងដែរ​។

អ្នកស្រីថា​៖ ​«​សម្រាប់សហគមន៍ទាំងអស់​ធ្លាប់ថែរក្សាការពារព្រៃឈើហ្នឹង មានការសោកស្ដាយ​មែនទែន​ ហើយមួយទៀតក៏ព្រួយបារម្ភយ៉ាងខ្លាំង​បើអាជ្ញាធរមូលដ្ឋានយើង​មិនជួយទប់ស្កាត់បញ្ឈប់ទេ​ មិនយូរទេ ប្រហែលមួយខែពីរខែទៀត​​នឹងបាត់បង់ហើយព្រៃឈើដែលសហគមន៍កំពុងថែរក្សាការពារហ្នឹង»។

ប្រធានសហគមន៍ជនជាតិពូនងនេះបន្តថា​ កន្លងទៅ​ ពួកគេ​បានស្នើទៅកាន់​អាជ្ញាធរ រួមទាំងដាក់លិខិតទៅកាន់​សាលាខេត្តទៀត តែពុំមានការចូលរួមការពារនោះទេ​ តែយ៉ាងណា អ្នកស្រីស្នើសុំ​សាជាថ្មីទៅកាន់មន្រ្តីពាក់ព័ន្ធទាំងអស់​ចូលរួមការពារព្រៃសហគមន៍ និងចុះបញ្ជីដីសមូហភាព​ចំនួន​៣ពាន់ហិកតា​ដែលជាអាយុជីវិត ជំនឿ និងអត្តសញ្ញាណរបស់ពួកគេ​។

វីអូឌី មិនទាន់អាចសុំការឆ្លើយតបពី​មេភូមិក្បាលរមាស លោក ក្រុក យូ បាននៅឡើយទេ។ ចំណែកមេឃុំ​ក្បាលរមាស លោក មែន សុបុល ថាលោកកំពុងជា​ប់រវល់​។

តែយ៉ាងណា​ នាយករង​រដ្ឋបាលខេត្តស្ទឹងត្រែង លោក ម៉ែន គុង បានគូសបញ្ជាក់ថា ក្រុមហ៊ុន​បានឈូសឆាយលើ​ដីដែលរដ្ឋាភិបាលផ្ដល់ឱ្យនោះទេ និងមិនបានឈូសចូលក្នុងដីសហគមន៍ ចំណែកឯការស្នើចុះបញ្ជី​ដីសមូហភាព​របស់ជនជាតិដើមពូនងនេះ ខាងថ្នាក់ខេត្តកំពុងពិចារណា​នៅឡើយ​។

លោកថា​៖ ​«ក្រុមការងារជំនាញ​ ក៏ដូចជា​សមត្ថកិច្ចអាជ្ញាធរមូលដ្ឋាន គាត់បានចុះទៅហើយ ​តំបន់មូលដ្ឋានដែលក្រុមហ៊ុន[ធ្វើការឈូសឆាយ] ​ក្នុងផែនទីរបស់ក្រុមហ៊ុន គឺគាត់ធ្វើក្នុង​​ក្របខណ្ឌក្រុមហ៊ុនទេ​»។​

អ្នកសម្របសម្រួលអង្គការអាដហុកប្រចាំខេត្តស្ទឹងត្រែង លោក ប៊ី វ៉ាន្នី មានប្រសាសន៍ថា ​ចំពោះការមិនអើ​ពើលើការ​ការពារព្រៃឈើ ឬបង្កើតដីសហគមន៍សមូហភាពរបស់ជនជាតិដើមភាគតិច​ពូនងនេះ​ បានបង្ហាញពីការមិន​យក​ចិត្តទុកដាក់​លើកង្វល់របស់ពលរដ្ឋនោះទេ។

សង្គមស៊ីវិលរូបនេះជំរុញឱ្យ​អាជ្ញាធរថ្នាក់ជាតិ​ចុះមកដោះស្រាយ​បញ្ហាដែល​អូសបន្លាយ​រាប់ឆ្នាំនេះ​ ដើម្បីការពារសិទ្ធិរបស់ជនជាតិដើមភាគតិចដែលកំពុងរងបញ្ហាប្រឈមនេះ​។

លោកថា៖ «ការមិនអើពើ មិនដោះស្រាយបញ្ហារបស់ប្រជាពលរដ្ឋ​ គឺជាការបង្ហាញថា​ អាជ្ញាធរមិនបានចាត់ទុកប្រជាពលរដ្ឋជាម្ចាស់អំណាចទេ​ ហើយបានធ្វើឱ្យប៉ះពាល់ទៅដល់​មុខមាត់របស់រដ្ឋាភិបាល​ ក៏ដូចជា​អាជ្ញាធរខេត្តខ្លួន​ឯង ​មិនមានការពឹងពាក់ ឬមិនមានសុវត្ថិភាព​ ឬមិនមានការពារសន្តិសុខរបស់ពួកគាត់​»។​

គួរបញ្ជាក់ថា ​កាលពីដើមខែមករា ឆ្នាំ​២០២០ ប្រធានមន្ទីរ​រៀបចំ​ដែនដី​ នគរូបនីយកម្ម​ និងសំណង់​ និងសុរិយោដី​ ខេត្តស្ទឹងត្រែង បាន​​ចុះបញ្ជីដី​សហគមន៍ក្បាលរមាស​តែ​៩៤១ហិកតាប៉ុណ្ណោះ​ បើទោះបី​ជា​​​ប្រជាសហគមន៍ទាមទារ​​ការចុះបញ្ជីសរុប​យ៉ាងតិចណាស់​៣ពាន់ហិកតាក៏ដោយ​៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។

អត្ថបទទាក់ទង

សូមផ្ដល់មតិយោបល់លើអត្ថបទនេះ