តាមរយៈវីដេអូមួយដែលត្រូវបានគេបង្ហោះចែកចាយដោយអ្នកប្រើប្រាស់បណ្ដាញសង្គម ក្នុងនោះគេសង្កេតឃើញស្ត្រីជាជនជាតិវៀតណាមមួយរូបបានស្នើសមត្ថកិច្ចឱ្យជួយសង្រ្គោះខ្លួនចេញពីទីតាំងប្រតិបត្តិការឆបោកមួយនៅក្នុងខេត្តព្រះសីហនុ។
ទោះជាយ៉ាងណា សមត្ថកិច្ចបានឱ្យដឹងថា ស្ត្រីរូបនេះត្រូវបាននាំយកចេញពីទីតាំងខាងលើ និងបច្ចុប្បន្នកំពុងស្ថិតក្នុងដំណើរការបញ្ជូនត្រលប់ទៅកាន់ប្រទេសកំណើតវិញហើយ។
យោងតាមវីដេអូមួយដែលត្រូវបានចែកចាយបន្តជាង៥ម៉ឺនដងលើបណ្ដាញសង្គមហ្វេសប៊ុក បានបង្ហាញឱ្យឃើញថា ស្ត្រីជាជនជាតិវៀតណាមខាងលើនេះបានស្រែកយំដើម្បីសុំឱ្យមានការជួយសង្គ្រោះ ចេញពីបង្អួចនៃបន្ទប់លេខ៨១៩ ដោយតាមរយៈការសង្កេតដោយអ្នកយកព័ត៌មាន វីអូឌី នៅបរិវេណនៃទីតាំងប្រតិបត្តិការឆបោកនោះ គឺជាអាគារជីនប៉ី៤ (Jin Bei 4)។
ទាក់ទិននឹងករណីនេះ រដ្ឋបាលខេត្តព្រះសីហនុ កាលពីថ្ងៃទី១៥ ខែកញ្ញា ក៏បានចេញសេចក្តីថ្លែងការណ៍មួយ ដើម្បីបកស្រាយបំភ្លឺពាក់ព័ន្ធនឹងវីដេអូដែលត្រូវបានបង្ហោះនេះផងដែរ។
រដ្ឋបាលខេត្តបានអះអាងថា ស្ត្រីរូបនេះធ្វើការនៅក្រុមហ៊ុនមួយស្ថិតនៅសង្កាត់លេខ៤ ក្រុងព្រះសីហនុ ដែលមានលក្ខខណ្ឌការងារតឹងរ៉ឹង ដោយតម្រូវឱ្យគាត់ធ្វើការច្រើនម៉ោងពី១៤ទៅ១៥ម៉ោងក្នុងមួយថ្ងៃ ដោយពេលចូលធ្វើការដំបូង ខាងក្រុមហ៊ុនក៏បានប្រាប់ថា ត្រូវធ្វើការ៦ខែ ទើបអាចស្នើសុំឈប់បាន។
បន្ទាប់ពីធ្វើការបានជិត៣ខែ ខាងក្រុមហ៊ុនក៏បានឱ្យគាត់ចុះកុងត្រាថ្មី ជាលាយលក្ខណ៍អក្សរជាមួយក្រុមហ៊ុន ដោយធ្វើការរយៈពេល៦ខែទៀត ជាហេតុធ្វើឱ្យគាត់មិនពេញចិត្ត។
ក្រោយមកទៀត ស្ត្រីជនជាតិវៀតណាមខាងលើនេះ ក៏ទទួលបានដំណឹងថាម្តាយរបស់គាត់មានជំងឺ ដូច្នេះហើយគាត់បានស្នើសុំក្រុមហ៊ុនឈប់ធ្វើការ តែក្រុមហ៊ុនមិនព្រម ទើបគាត់ប្តឹងសមត្ថកិច្ចឱ្យមកជួយគាត់យកចេញពីក្រុមហ៊ុនតែម្តង។
ទាក់ទងនឹងករណីដែលស្រ្តីខាងលើនេះអះអាងនៅក្នុងវីដេអូឃ្លីបថា គាត់បានឃើញជនជាតិចិននៅក្នុងក្រុមហ៊ុនមានអាវុធខ្លីប្រើប្រាស់ រដ្ឋបាលខេត្តក៏បានបញ្ជាក់ថាជារឿងមិនពិតឡើយ ខណៈស្រ្តីរូបនេះគ្រាន់តែឮគេនិយាយបន្តគ្នាដោយគ្មានប្រភពច្បាស់លាស់ឡើយ។
រដ្ឋបាលខេត្តបន្តថា៖ «មូលហេតុដែលគាត់ធ្វើបែបនេះ គឺគាត់ចង់ឱ្យសមត្ថកិច្ចមកជួយយកគាត់ចេញពីក្រុមហ៊ុនឱ្យបានលឿន ព្រោះគាត់ចង់ត្រលប់ទៅប្រទេសកំណើត ដើម្បីមើលម្តាយឈឺ»។
ជាមួយគ្នានេះ រដ្ឋបាលខេត្តក៏បានអំពាវនាវដល់ស្ថាប័នសារព័ត៌មាន និងអ្នកប្រើប្រាស់បណ្តាញសង្គម សូមបញ្ឈប់ការផ្សព្វផ្សាយនិងចែករំលែកនូវព័ត៌មានបំភ្លៃ ដែលខុសពីហេតុការណ៍បានកើតឡើងពិតប្រាកដ ដែលធ្វើឱ្យសាធារណមតិមានការភ័ន្តច្រឡំ។
អ្នកនាំពាក្យសាលាខេត្តព្រះសីហនុ លោក ឃាង ភារម្យ បានឱ្យដឹងកាលពីថ្ងៃសុក្រសប្ដាហ៍មុនថា ស្រ្តីរូបនេះត្រូវបានបញ្ជូនទៅកាន់ការិយាល័យអន្តោប្រវេសន៍ហើយ។
ទោះជាយ៉ាងណា ប្រភពខាងលើនេះពុំបានពន្យល់លម្អិតថាតើស្រ្តីខាងលើនេះមុនដំបូងចូលមកកាន់ប្រទេសកម្ពុជាដោយវិធីណាឡើយ។
បុគ្គលិកនៃអង្គការមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) ប្រចាំខេត្តព្រះសីហនុ មួយរូប ដែលសុំមិនបញ្ចេញឈ្មោះ បានលើកឡើងថា អង្គការរបស់ខ្លួនក៏ធ្លាប់បានធ្វើការជួយសង្គ្រោះ៥ករណីផងដែរ ដែលក្នុងនោះរួមមានមនុស្ស៥០នាក់។
ទោះជាយ៉ាងណា បុគ្គលិករូបនេះបន្តថា អាជ្ញាធរជានិច្ចកាលតែងតែចេញមុខបដិសេធរាល់ការលើកឡើងមួយចំនួនរបស់ជនរងគ្រោះ។
ប្រភពដដែលបន្ថែមថា៖ «ពួកគេ [អាជ្ញាធរ] តែងតែលើកឡើងថាជារឿងមិនពិត ហើយប្រតិបត្តិការខុសច្បាប់ទាំងឡាយក៏កម្រនឹងត្រូវបានលើកឡើងក្នុងរបាយការណ៍របស់សមត្ថកិច្ចផងដែរ។ ពួកគេមិនដែលបង្ហាញអត្តសញ្ញាណក្រុមហ៊ុនដែលបំពានច្បាប់ទាំងនោះឡើយ ដែលក្នុងនោះពួកគេថាសាធារណជនចែករំលែកព័ត៌មានក្លែងក្លាយ។ របាយការណ៍[របស់សមត្ថកិច្ច]ភាគច្រើន គឺតែងតែចេញមកបដិសេធ និងលាក់ករណីនានា។ វាមានបញ្ហាច្រើនទៀត ប៉ុន្តែវាពិបាកសម្រាប់យើងក្នុងការរៀបរាប់»។
គួរបញ្ជាក់ថា អាជីវកម្មខុសច្បាប់នានានៅក្នុងខេត្តព្រះសីហនុ និងជុំវិញប្រទេសកម្ពុជា បាននិងកំពុងដំណើរការប្រតិបត្តិការឆបោកតាមប្រព័ន្ធអនឡាញយ៉ាងសកម្ម ខណៈកម្មកររាប់ពាន់នាក់ដែលត្រូវបានគេបញ្ជូនឱ្យមកធ្វើការដោយបង្ខំនៅក្នុងអាជីវកម្មទាំងនោះ ក៏ត្រូវបានរាយការណ៍ថាមិនអាចចាកចេញពីទីតាំងការងាររបស់ពួកគេផងដែរ។
កម្មករដែលភាគច្រើនជាជនបរទេសទាំងនោះមកពីប្រទេសចិន តៃវ៉ាន់ ថៃ វៀតណាម ម៉ាឡេស៊ី និងឥណ្ឌូនេស៊ី៕
បកប្រែនិងសម្រួលចេញពីអត្ថបទដើមភាសាអង់គ្លេស៖ Woman Pleads in Khmer for Scam Rescue