ក្រសួងការងារ និងបណ្ដុះបណ្ដាលវិជ្ជាជីវៈ ប្រកាសថា ប្រាក់ឈ្នួលអប្បបរមារបស់កម្មករនិយោជិតផ្នែកវាយនភណ្ឌកាត់ដេរ និងផលិតស្បែកជើង ឡើងបាន៦ដុល្លារសម្រាប់ឆ្នាំ២០២៣ ដែលមានន័យថា ចាប់ពីថ្ងៃទី១ ខែមករា ឆ្នាំ២០២៣ កម្មករនឹងទទួលបានប្រាក់ឈ្នួលគោលចំនួន២០០ដុល្លារ។
កាលពីថ្ងៃទី១៣ ខែកញ្ញា ឆ្នាំ២០២២ ក្រុមប្រឹក្សាជាតិប្រាក់ឈ្នួលអប្បបរមាបានបន្តជួបពិភាក្សាគ្នា ដើម្បីរកចំណុចរួមមួយក្នុងការកំណត់ប្រាក់ឈ្នួលគោលសម្រាប់កម្មករនៅឆ្នាំ២០២៣ ដោយក្នុងនោះ ក្រុមសហជីពមានតួលេខចំនួន៣ផ្សេងគ្នា រួមមាន ២០៦ដុល្លារ, ២១០ដុល្លារ និង២១៣ដុល្លារ។
ចំណែកតំណាងនិយោជកបានដាក់តួលេខ១៩៧ដុល្លារ និងរដ្ឋាភិបាលបានស្នើ ១៩៨ដុល្លារ។
ប្រធានសហភាពចលនាកម្មករកម្ពុជា លោក ប៉ាវ ស៊ីណា ដែលចូលរួមកិច្ចប្រជុំចុងក្រោយនៅថ្ងៃទី២១ ខែកញ្ញានេះ បានឱ្យដឹងថា ក្រុមប្រឹក្សាជាតិប្រាក់ឈ្នួលអប្បបរមាបានសម្រេចយកតួលេខ១៩៨ដុល្លារ ហើយលោកនាយករដ្ឋមន្ត្រី ហ៊ុន សែន ផ្តល់ឱ្យ២ដុល្លារបន្ថែមទៀត ដែលធ្វើឱ្យប្រាក់ឈ្នួលគោលកម្មករសម្រាប់ឆ្នាំ២០២៣ ឡើងដល់២០០ដុល្លារ។
ប្រាក់ឈ្នួលអប្បបរមារបស់កម្មករនិយោជិតផ្នែកវាយនភណ្ឌកាត់ដេរ និងផលិតស្បែកជើង សម្រាប់ឆ្នាំ២០២២ គឺ១៩៤ដុល្លារ៕