រដ្ឋមន្ត្រីក្រសួងមហាផ្ទៃ លោក ស ខេង ហាក់បានស្ដីបន្ទោសមន្ត្រីទៅលើភាពយឺតយ៉ាវទប់ស្កាត់បទល្មើសនានា រួមទាំងការបើកល្បែងខុសច្បាប់នៅក្នុងខេត្តព្រះសីហនុ ដោយលើកឡើងថា ការដែលរដ្ឋាភិបាលចំណាយលុយរាប់លានដុល្លារដើម្បីអភិវឌ្ឍ មិនមែនចង់ឱ្យខេត្តនេះក្លាយជាឋានសួគ៌ល្បែងខុសច្បាប់នោះទេ។
នេះបើតាមការថ្លែងរបស់លោក ស ខេង ក្នុងកិច្ចប្រជុំជាមួយមន្ត្រីពាក់ព័ន្ធ រួមទាំងក្រសួងយុត្តិធម៌ កាលពីថ្ងៃទី១៩ ខែកញ្ញា ឆ្នាំ២០២២ នៅទីស្ដីការក្រសួងមហាផ្ទៃ ដែលត្រូវបានដកស្រង់សម្តីមកចុះផ្សាយលើទំព័រហ្វេសប៊ុករបស់លោក។
លោក ស ខេង ថ្លែងថា ចាប់ពីថ្ងៃទី១៨ ខែសីហា ដល់ថ្ងៃទី១៨ ខែកញ្ញា ឆ្នាំ២០២២ ក្រសួងបានទទួលបណ្ដឹងសរុបចំនួន២៨៩ករណី ពាក់ព័ន្ធនឹងការជួញដូរមនុស្ស និងបង្ខាំងមនុស្សខុសច្បាប់ ពីសាម៉ីជន សាច់ញាតិ ស្ថានទូត និងអង្គការអន្តរជាតិមួយចំនួន ក្នុងនោះ ខេត្តព្រះសីហនុ មាន២១២ករណី ជាខេត្តនាំមុខគេ។ លោកគូសបញ្ជាក់ថា ឆ្លងកាត់ការអនុវត្តជាក់ស្ដែង និងចុះស្រាវជ្រាវពីមន្ត្រីជំនាញ ៩៥ភាគរយនៃពាក្យបណ្ដឹងជាការពិត ហើយសមត្ថកិច្ចបានជួយសង្គ្រោះជនរងគ្រោះចំនួន១៧៦នាក់ មាន៨សញ្ជាតិ ក្នុងនោះ ខេត្តព្រះសីហនុមានច្រើនជាងគេ។
លោកបន្តទៀតថា ភាគច្រើននៃជនរងគ្រោះ គឺធ្វើការនៅកន្លែងអាជីវកម្មល្បែងភ្នាល់អនឡាញខុសច្បាប់ ដែលការណ៍នេះនឹងជំរុញឱ្យមានបទល្មើសជួញដូរមនុស្សគ្រប់ទម្រង់ បទល្មើសគ្រឿងញៀន ភេរវកម្ម លួចឆក់ប្លន់ បទល្មើសជំរិតទារប្រាក់ ធ្វើទារុណកម្ម ឃាតកម្ម ការសងសឹក ការប្រើប្រាស់អាវុធខុសច្បាប់ បទល្មើសអន្តោប្រវេសន៍ខុសច្បាប់ និងបទល្មើសសម្អាតប្រាក់ បង្កផលប៉ះពាល់ដល់ការកសាងយុត្តិធម៌សង្គម។
លោក ស ខេង គូសបញ្ជាក់ថា៖ «រាជរដ្ឋាភិបាលបានចំណាយថវិកាប្រមាណជាង២០០លានដុល្លារ ដើម្បីកសាងហេដ្ឋារចនាសម្ពន្ធក្នុងក្រុងព្រះសីហនុ ហើយការវិនិយោគផ្លូវល្បឿនលឿនប្រមាណ២ ០០០លានដុល្លារ និងការកែលម្អផ្លូវជាតិលេខ៤នោះ មិនមែនដើម្បីបម្រើឱ្យឋានសួគ៌នៃល្បែងខុសច្បាប់នោះទេ ក្នុងបំណងទាក់ទាញការវិនិយោគត្រឹមត្រូវ អ្នកទេសចរត្រឹមត្រូវ ដើម្បីបានចំណូលកសាងប្រទេសជាតិទាំងមូល»។
បន្ថែមពីនេះ ក្រោយពីបិទបញ្ចប់កិច្ចប្រជុំ លោក ស ខេង បានប្រាប់ក្រុមអ្នកសារព័ត៌មានថា រដ្ឋាភិបាលកំពុងព្យាយាមពន្លត់ភ្លើងនេះ តាមរយៈការពង្រឹងវិធានការអនុវត្តច្បាប់ សង្គ្រោះជនរងគ្រោះ ដាក់ទោសជនល្មើស រួមទាំងវិធានការគ្រប់គ្រងជនបរទេសដែលមកស្នាក់នៅកម្ពុជាដើម្បីប្រកបការងារ។
លោកថា៖ «យើងពន្លត់ភ្លើង បើយើងមិនដោះអាហ្នឹងទេ មេរោគសង្គមហ្នឹង វារីករាលដាលបទល្មើសផ្សេងៗទៀតនៅក្នុងសង្គម»។
ជុំវិញបញ្ហានេះ សហរដ្ឋអាមេរិក តាមរយៈក្រសួងការបរទេសរបស់ខ្លួន កាលពីថ្ងៃទី១៩ ខែកក្កដា ឆ្នាំ២០២២នេះ បានដាក់កម្ពុជាក្នុងបញ្ជីខ្មៅរបស់ខ្លួន ដោយសម្អាងថា ការជួញដូរជនបរទេសចូលមកក្នុងប្រទេសកម្ពុជាកំពុងមានការកើនឡើង ក៏ដូចជាការរំលោភបំពានផ្សេងទៀតពាក់ព័ន្ធនឹងវិស័យការងារ ហើយមន្ត្រីមួយចំនួនសមគំនិតក្នុងប្រតិបត្តិការឆបោកតាមប្រព័ន្ធអ៊ីនធឺណិត។
ក្រៅពីនេះ អាមេរិកក៏បានអំពាវនាវឱ្យកម្ពុជាបង្កើនកិច្ចខិតខំប្រឹងប្រែងអនុវត្តច្បាប់ប្រឆាំងនឹងប្រតិបត្តិការឆបោកតាមអ៊ីនធឺណិត រួមទាំងការចោទប្រកាន់ពីការងារដោយបង្ខំ និងប្រឆាំងនឹងមន្ត្រីដែលសមគំនិតក្នុងប្រតិបត្តិការឆបោកនេះ និងឧក្រិដ្ឋកម្មជួញដូរដែលពាក់ព័ន្ធ។
នាយកកម្មវិធីអង្គការតម្លាភាពកម្ពុជា លោក អ៊ឹម នរិន្ទ ធ្លាប់ប្រាប់ VOD ថាក្រោយពីមានការបង្ក្រាបនៅទីក្រុងម៉ាកាវ ប្រទេសចិន នាប៉ុន្មានឆ្នាំមកនេះ កម្ពុជាហាក់បានក្លាយជាជម្រកសុវត្ថិភាពដល់ឧក្រិដ្ឋជន ដើម្បីប្រតិបត្តិការបទឧក្រិដ្ឋតាមប្រព័ន្ធអនឡាញ។
លោកបារម្ភថា កម្ពុជាអាចនឹងរអិលធ្លាក់ទៅក្នុងបញ្ជីខ្មៅនៃការលាងលុយខុសច្បាប់ និងអាចប្រឈមនឹងបញ្ហាជាច្រើន រួមទាំងហានិភ័យប្រព័ន្ធធនាគារពាក់ព័ន្ធនឹងការផ្ទេរប្រាក់តាមយន្តការអន្តរជាតិ បើវិធានការទប់ស្កាត់ការជួញដូរមនុស្សគ្មានប្រសិទ្ធភាព ខណៈកម្ពុជាជាប់ក្នុងបញ្ជីប្រផេះ ឬប្រទេសតាមដានលាងលុយកខ្វក់ ៤ឆ្នាំមកនេះ។
តែយ៉ាងណា លោកយល់ថា កម្ពុជាអាចរើខ្លួនរួចពីវិធានទាំងនោះបាន បើការអនុវត្តច្បាប់ឈានទៅទប់ស្កាត់បទឧក្រិដ្ឋប្រទាក់ក្រឡាគ្នាបាន ហើយត្រូវបានគេមើលឃើញថា កម្ពុជាលែងជាជម្រកសុវត្ថិភាពរបស់ឧក្រិដ្ឋជន។
លោកថា៖ «មិនជាការលំបាកទេ ឱ្យតែប្រទេសកម្ពុជាយកអនុសាសន៍ដែលគេមាន យកមកអនុវត្ត ពង្រឹងការអនុវត្តច្បាប់នៅក្នុងប្រទេសកម្ពុជា ធានាថាកម្ពុជាមិនក្លាយជាជម្រកសម្រាប់ជនឧក្រិដ្ឋ ធ្វើការបង្ក្រាបទៅលើជនឧក្រិដ្ឋហ្នឹង ហើយធានាថាយើងលែងជាជម្រករបស់ជនឧក្រិដ្ឋដែលអាចប្រើប្រាស់ប្រទេសយើងដើម្បីចាប់ជំរិត ឬក៏លាងលុយតទៅទៀតទៅ គេនឹងមើលឃើញ ហើយយើងនឹងមិនធ្លាក់ទៅក្នុងស្ថានភាពកាន់តែធ្ងន់ធ្ងរទៀតនោះទេ»។
ចំណែកអ្នកសិក្សាផ្នែកភូមិសាស្ត្រនយោបាយ លោក វណ្ណ ប៊ុនណា វិញ មើលឃើញថា បញ្ហានេះកើតចេញពីអំពើពុករលួយប្រទាក់ក្រឡាគ្នា រហូតដល់សែស្រឡាយថ្នាក់ដឹកនាំ ដែលត្រូវបង្ក្រាបជាប្រព័ន្ធ ទើបអាចទប់ស្កាត់បាន។
លោកថា៖ «រឿងដែលសំខាន់ជំរុញឱ្យកើតមានបញ្ហានេះ គឺអំពើពុករលួយនេះតែម្តង ដោយសារតាមការរាយការណ៍ព័ត៌មានរបស់អាហ្សាហ្ស៊ីរ៉ាហ្នឹង គឺបានបង្ហាញអំពីសែស្រឡាយប្រទាក់ក្រឡាគ្នាក្នុងរឿងហ្នឹង រហូតដល់មានសាច់ញាតិថ្នាក់ដឹកនាំធំៗ។ អ៊ីចឹងទេ! បញ្ហាអំពើពុករលួយ វាជាដើមទុន ឬជាដើមចមធ្វើឱ្យបញ្ហាហ្នឹងកើតឡើងផងដែរ»។
យ៉ាងណា លោក ស ខេង រំឭកមន្ត្រីពាក់ព័ន្ធថា ដើម្បីធានាឱ្យកិច្ចប្រតិបត្តិការនៃការប្រយុទ្ធប្រឆាំងអំពើជួញដូរមនុស្ស ជួយដូរកម្លាំងពលកម្ម និងអាជីវកម្មផ្លូវភេទនោះ ការអភិវឌ្ឍប្រទេសជាតិត្រូវប្រកាន់គោលការណ៍នីតិរដ្ឋ មិនមែនដោយផ្អែកលើល្បែងស៊ីសងខុសច្បាប់នោះទេ។
ដោយឡែក បើតាមសេចក្តីប្រកាសព័ត៌មានរបស់រដ្ឋបាលខេត្តព្រះសីហនុ ចុះថ្ងៃទី១៨ ខែកញ្ញា ឱ្យដឹងថា ក្រោយសមត្ថកិច្ចបានចុះត្រួតពិនិត្យអាគារមួយកន្លែងឈ្មោះ ស៊ីង សាន ទីង (Xinshan Great Wall Park) ក្នុងសង្កាត់លេខ៣ ក្រុងព្រះសីហនុ កាលពីពេលថ្មីៗនេះ សមត្ថកិច្ចបានរកឃើញទីតាំងនោះជាប់ពាក់ព័ន្ធនឹងបទល្មើសបង្ខាំងមនុស្សខុសច្បាប់។
ប្រភពដដែលបញ្ជាក់ថា ប្រតិបត្តិការបង្ក្រាបពេលនោះ ជនសង្ស័យចំនួន១២នាក់ត្រូវបានចាប់ខ្លួនបញ្ជូនទៅសាកសួរនៅស្នងការដ្ឋាននគរបាលខេត្ត ខណៈទីតាំងនោះតម្រូវឱ្យផ្អាកធ្វើអាជីវកម្មបណ្តោះអាសន្ន ដើម្បីបើកផ្លូវឱ្យសមត្ថកិច្ចបន្តស៊ើបអង្កេតពាក់ព័ន្ធករណីបង្ខាំងមនុស្ស ជួញដូរមនុស្ស និងការធ្វើទារុណកម្ម៕