អតីតចៅសង្កាត់ព្រែកព្រះស្ដេចម្នាក់ នៅខេត្តបាត់ដំបង មកពីគណបក្សសង្គ្រោះជាតិដែលតុលាការបានរំលាយ បានច្រានចោលលើភស្តុតាងដែលតុលាការយកមកដាក់បន្ទុក ដោយថា សម្រង់សម្ដីដែលតុលាការយកចេញពីការសន្ទនាតាមទូរសព្ទនោះជាសម្ដីរបស់បុគ្គលម្នាក់ទៀត។
ការច្រានចោលនេះបានធ្វើឡើងអំឡុងពេលសាលាដំបូងរាជធានីភ្នំពេញ បន្តបើកសវនាការលើសំណុំរឿងសកម្មជនគណបក្សសង្គ្រោះជាតិដែលតុលាការបានរំលាយ ក្នុងនោះ តុលាការបានសួរដេញដោលលោក ខាន់ ប៊ុនផេង ដែលជាអតីតចៅសង្កាត់ព្រែកព្រះស្ដេច មកពីកូតាគណបក្សសង្គ្រោះជាតិដែលត្រូវតុលាការរំលាយ ក្នុងសំណុំរឿង «រួមគំនិតក្បត់»។
ក្នុងបន្ទប់សវនាការ ចៅក្រមជម្រះ លោកស្រី អ៊ុក រ៉េតគន្ធា បានសួរទៅកាន់លោក ខាន់ ប៊ុនផេង ថាទទួលបទល្មើសទេ? និងស្គាល់ឈ្មោះ សេង សុខឡេង ដែរឬទេ? ជាដើម។
ឈរនៅរង្វង់ក្រចកសេះ រាងស្គម ពាក់ម៉ាស់ជាប់ជានិច្ច លោក ខាន់ ប៊ុនផេង បានរៀបរាប់ក្នុងអង្គសវនាការថា ចាប់តាំងពីគណបក្សសង្គ្រោះជាតិរំលាយមក រូបលោកមិនបានធ្វើសកម្មភាពនយោបាយទៀតទេ ដោយនៅផ្ទះជួយការងារភរិយា និងយកចៅទៅសាលារៀន។
លោកចាត់ទុកការចោទប្រកាន់របស់តុលាការថាខុសពីការពិត និងជារឿងអយុត្តិធម៌សម្រាប់រូបលោក។
លោកថា៖ «ខ្ញុំនៅផ្ទះ មិនបានចូលរួមកិច្ចការនយោបាយ នេះជាការពិត។ ខ្ញុំបញ្ជាក់នេះជាការពិត ខ្ញុំមិនដែលចូលរួមធ្វើសកម្មភាពអ្វីឡើយ។ ការចោទប្រកាន់ខ្ញុំខុសពីការពិត។ សូម្បីមិត្តភក្តិ ខ្ញុំមិនដែលហ៊ានជួប ខ្ញុំសូមតែសេចក្ដីសុខប៉ុណ្ណោះ ប៉ុន្តែវាមិនបានសុខទៀត»។
លោក ខាន់ ប៊ុនផេង បន្តថា លោកស្គាល់ឈ្មោះ សេង សុខឡេង ដោយសារឈ្មោះនេះជាអ្នករស់នៅក្នុងភូមិជាមួយគ្នា ប៉ុន្តែឈ្មោះ សេង សុខឡេង មានសតិមិនប្រក្រតីឡើយ ហើយអ្នកភូមិនៅទីនោះក៏ដឹងដែរ។
លោកបញ្ជាក់ថា ឈ្មោះ សេង សុខឡេង នេះហើយដែលតែងទូរសព្ទមកគាត់និយាយរឿងដំណើរវិលត្រលប់របស់លោកស្រី មូរ សុខហួរ ព្រមទាំងនិយាយរឿងឡើងមករាជធានីភ្នំពេញ។ លោកបញ្ជាក់ថា ក្នុងមួយថ្ងៃ ឈ្មោះ សេង សុខឡេង បានទូរសព្ទមកយ៉ាងតិច២ទៅ៣ដងនិយាយរឿងនេះ បើទោះបីជាលោកមិនទទួលទូរសព្ទក៏ដោយ ក៏បុគ្គលរូបនេះនៅតែធ្វើទុក្ខបុកម្នេញដោយរំខានលោកមិនឱ្យធ្វើការងារអ្វីបានទេ។
លោកថា៖ «ខ្ញុំស្គាល់! គាត់ជាមនុស្សមានសតិមិនគ្រប់គ្រាន់ទេ។ ខ្ញុំនិយាយនេះ មិនមែនប្រមាថទេ អ្នកនៅភូមិជាមួយគាត់ គេដឹងគ្រប់គ្នា។ គាត់ចង់និយាយអីទៅកាន់អ្នកណា គឺគាត់ត្រូវតែនិយាយ ហើយគាត់និយាយមក ខ្ញុំលែងប្រកាន់ហើយ។ ក្នុងមួយថ្ងៃ គាត់ខលមកខ្ញុំ ២ទៅ៣ដង ខ្ញុំធ្លាប់ប្លុក[លេខ]គាត់ចោល ប៉ុន្តែគាត់ខឹង និងជិះម៉ូតូមករករឿងដល់ផ្ទះខ្ញុំ។ ក្រោយមក ខ្ញុំទទួលគាត់ដោយបើកទូរសព្ទចោល ឱ្យគាត់និយាយអ្វីនិយាយទៅ។ ចំពោះ សេង សុខឡេង ខ្ញុំចាត់ទុកគាត់ជាពលរដ្ឋម្នាក់មានសតិមិនគ្រប់គ្រាន់ ខ្ញុំមិនដែលតបតជាមួយគាត់ទេ ព្រោះបើខ្ញុំមិនលើកទូរសព្ទ គាត់រំខានខ្ញុំ ធ្វើអីមិនកើតទេ»។
ក្រោយពីចៅក្រមជម្រះ បញ្ចប់ការសួរដេញដោលនោះ តំណាងអយ្យការ លោក សេង ហៀង ក៏បានអានសារដែលដកស្រង់ចេញពីហ្វេសប៊ុករបស់លោក សម រង្ស៊ី, លោក អេង ឆៃអ៊ាង និងលោក ហេង ដារ៉ារ៉ូ ជាដើម និងបានសួរទៅលោក ខាន់ ប៊ុនផេង ពីទំនាក់ទំនងជាមួយថ្នាក់ដឹកនាំនៅក្រៅប្រទេសរបស់គណបក្សសង្គ្រោះជាតិដែលតុលាការបានរំលាយ។
ក្រៅពីបង្ហាញសារហើយ តំណាងអយ្យការក៏អានសម្រង់សម្ដីដែលដកស្រង់ចេញពីការសន្ទនាតាមទូរសព្ទជាមួយឈ្មោះ សេង សុខឡេង មកសួរដេញដោលលោក ខាន់ ប៊ុនផេង ផងដែរ។
លោកថា៖ «តើលោកធ្លាប់ទំនាក់ទំនងជាមួយសកម្មជន CNRP ទេ? ស្គាល់លោក អេង ឆៃអ៊ាង ទេ? តើធ្លាប់ឃើញសារលោក អេង ឆៃអ៊ាង ផុសទេ? ចុះលោក សម រង្ស៊ី ផុស ធ្លាប់ឃើញទេ? ធ្លាប់មានទំនាក់ទំនងជាមួយថ្នាក់ដឹកនាំក្រៅប្រទេសទេ? តើធ្លាប់ទទួលបានសារពីលោកស្រី មូរ សុខហួរ ទេ? តើគាំទ្រសារនេះទេ? ។ល។»។
សារដែលតំណាងអយ្យការអាននោះ ជាសារប្រកាសធ្វើមាតុភូមិនិវត្តន៍របស់លោកស្រី មូរ សុខហួរ ដោយភ្ជាប់ជាមួយការអំពាវនាវឱ្យប្រជាពលរដ្ឋ និងសកម្មជនចូលរួមទៅទទួលលោកស្រី នាថ្ងៃទី៤ ខែមករា ឆ្នាំ២០២១ ខណៈលោក សម រង្ស៊ី នឹងត្រលប់មកពេលក្រោយ។
ជាការឆ្លើយតប លោក ខាន់ ប៊ុនផេង បានរៀបរាប់ក្នុងបន្ទប់សវនាការថា រូបលោកធ្លាប់ឮដំណឹងពីដំណើរវិលត្រលប់របស់លោកស្រី មូរ សុខហួរ តាមរយៈសារព័ត៌មាន និងបណ្ដាញសង្គម ប៉ុន្តែមិនទទួលបានសារពីថ្នាក់ដឹកនាំដែលឱ្យកៀរគរសកម្មជនឡើងមករាជធានីភ្នំពេញឡើយ។ ចំណែកទំនាក់ទំនងជាមួយថ្នាក់ដឹកនាំនៅក្រៅប្រទេស លោកថាក៏មិនមានដែរ។
ចំពោះសម្រង់សម្ដីដែលតំណាងអយ្យការមកសួរនោះ លោក ខាន់ ប៊ុនផេង អះអាងថាមិនមែនជាសំឡេងរបស់លោកឡើយ តែជាសម្ដីរបស់លោក សេង សុខឡេង ដែលទាក់ទងទៅគាត់ ហើយនិយាយរឿងទាំងអស់នេះ។
លោក ខាន់ ប៊ុនផេង បានច្រានចោលបទចោទប្រកាន់ និងភស្តុតាងដែលតុលាការដាក់បន្ទុក ហើយថា រឿងនេះ រូបលោកបានបញ្ជាក់តាំងពីនៅដំណាក់កាលចៅក្រមស៊ើបសួរមកម៉្លេះ។
លោកថា៖ «សម្ដីនេះជាសម្ដី សេង សុខឡេង ខលមកខ្ញុំ! ហើយម៉េចបានជាយកសម្ដី សេង សុខឡេង និយាយ មកដាក់ឈ្មោះខ្ញុំជាអ្នកនិយាយទៅវិញ? រឿងដំណើរវិលត្រលប់របស់លោកស្រី មូរ សុខហួរ រឿងឱ្យលុយ៥ម៉ឺន[រៀល]ឡើងមកភ្នំពេញ មកដល់មានកន្លែងស្នាក់នៅអីជាដើម សម្ដីនេះជាសម្ដី សេង សុខឡេង ទាំងអស់»។
យ៉ាងណា មេធាវីការពារក្ដីឱ្យលោក ខាន់ ប៊ុនផេង គឺលោក សំ សុគង់ បានឡើងសួរកូនក្ដីបញ្ជាក់បន្ថែម និងបានប្រាប់ទៅចៅក្រមជម្រះថា អ្វីដែលតំណាងអយ្យការចោទសួរ និងភស្ដុតាងដាក់បន្ទុកនោះ មិនមែនជាចម្លើយកូនក្ដីរបស់លោកទេ ប៉ុន្តែជាចម្លើយរបស់ឈ្មោះ សេង សុខឡេង។
លោកថា៖ «របាយការណ៍ឈ្មោះ សេង សុខឡេង ដូចនឹងរបាយការណ៍កូនក្ដីខ្ញុំ ហាក់ដូចជា Copy និង Past អ៊ីចឹង»។
លោក សំ សុគង់ បានស្នើទៅចៅក្រមឱ្យផ្ទៀងផ្ទាត់របាយការណ៍ និងចម្លើយកូនក្ដី និងចម្លើយឈ្មោះ សេង សុខឡេង ខណៈប្រធានក្រុមប្រឹក្សាជំនុំជម្រះ លោកស្រី អ៊ុក រ៉េតគន្ធា ក៏បានឱ្យក្រឡាបញ្ជីអានរបាយការណ៍ក្នុងអង្គសវនាការ។
ក្រោយបើកសវនាការសួរដេញដោលពេញមួយព្រឹក នាថ្ងៃព្រហស្បតិ៍នេះ ប្រធានក្រុមប្រឹក្សាជំនុំជម្រះបានសម្រេចផ្អាក ដោយសវនាការនេះនឹងបន្តនៅថ្ងៃទី៦ ខែតុលា ខាងមុខ។
មន្រ្តីការពារសិទ្ធិមនុស្សនៃសមាគមអាដហុក លោក យី សុខសាន្ត ដែលឃ្លាំមើលពីដំណើរការនៃសវនាការនេះ យល់ថា ព្រះរាជអាជ្ញា និងចៅក្រម គួរតែពិចារណានិងពិនិត្យមើលភស្ដុតាងច្បាស់លាស់ មុននឹងចោទប្រកាន់ទៅលើបុគ្គលណាម្នាក់។
លោកថា៖ «នៅពេលដែលលោក សំ សុគង់ គាត់លើកហេតុផលថា នេះមិនមែនជាសម្ដី ខាន់ ប៊ុនផេង ហើយជាសម្ដីរបស់លោក សេង សុខឡេង មានន័យថា សមត្ថកិច្ចក្លែងឯកសារដើម្បីមកចោទប្រកាន់មកលើលោក ខាន់ ប៊ុនផេង។ ចំណុចនេះឯងដែលជាចំណុចមួយដែលធ្វើឱ្យតុលាការ ហាក់ដូចជាតុលាការមិនបានពិចារណាទៅភស្តុតាងដាក់បន្ទុកដែលចោទប្រកាន់មកលើគាត់ ហើយចាប់គាត់ឃុំមុនទៀត ទៅចាប់គាត់ទាំងនៅក្នុងផ្ទះ ចំណុចហ្នឹងអយុត្តិធម៌ណាស់។ បើសិនជារឿងហ្នឹងជារឿងនយោបាយ គួរកាត់ក្ដីគាត់តាមហេតុផលនយោបាយទៅ។ ប៉ុន្តែបើសិនរឿងហ្នឹងជារឿងនយោបាយហើយ យើងប្រតិដ្ឋភស្តុតាងទៅ ហើយយកមកចោទគាត់ វាអយុត្តិធម៌ណាស់! ហើយមតិជាតិ និងអន្តរជាតិ គេរិះគន់ទៅលើស្ថាប័នហ្នឹង»។
សវនាការសំណុំរឿង «រួមគំនិតក្បត់» នេះ ពាក់ព័ន្ធនឹងការកៀរគរនិងគាំទ្រដំណើរវិលត្រលប់មកកម្ពុជាជាលើកទី២ របស់លោកស្រី មូរ សុខហួរ នាថ្ងៃទី៤ ខែមករា ឆ្នាំ២០២១។
បើតាមតំណាងអយ្យការ សំណុំរឿង «រួមគំនិតក្បត់» ដែលមានជនជាប់ចោទ៣៩នាក់នេះ ត្រូវបានបំបែកជា២សំណុំរឿង ក្នុងនោះ សំណុំរឿងជនជាប់ចោទ២នាក់ រួមមាន កញ្ញា សៅ ឧសភា និងលោក អៀ ចាន់ណា កំពុងស្ថិតក្នុងដំណាក់កាលចៅក្រមស៊ើប។
ក្នុងចំណោមជនជាប់ចោទទាំង៣៩នាក់ គឺមានវត្តមានក្នុងបន្ទប់សវនាការតែ៣នាក់ទេ ក្នុងនោះមានលោក គង់ ម៉ាស់, លោក ខាន់ ប៊ុនផេង និងលោក វឿង សំណាង ដោយអ្នកទាំងនេះកំពុងជាប់នៅពន្ធនាគារព្រៃស ខណៈថ្នាក់ដឹកនាំនិងសកម្មជនផ្សេងទៀតនៅក្រៅប្រទេស ហើយខ្លះទៀតនៅកម្ពុជា៕
